Zeremi 7 - NYANMIƐN NDƐ'N 1998

Nán an lafi ndɛ finfin'm be su

¹ Anannganman'n kannin ndɛ kleli Zeremi.

² I waan ɔ ko jran Nyanmiɛn i sua'n i anuan'n nun nan ɔ `kan ndɛ ng'ɔ o yɛ'n man sran'm be ti: «Zidafuɛ mun, amun `tie ndɛ nga Anannganman kan'n, amun bɔ an sin anuan nga nun'n, an ko koto Anannganman'n i bo'n.

³ Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹An `yaci ajalɛ bɔ amun tu'n nin nyoliɛ tɛtɛ'n bɔ amun yo'n nan n ´yaci amun lika nga nun wa.

⁴ Nán amun lafi ndɛ finfin nga be kɛn i yɛ'n su be se kɛ: Wa yɛ Anannganman i sua'n wo-ɔ, Anannganman i sua'n, Anannganman i sua'n.

⁵ Sɛ an yaci ajalɛ tɛtɛ nin nyoliɛ tɛtɛ'n, sɛ an yo ng'ɔ fata'n be man be wiengu'n,

⁶ sɛ an yo-man aofuɛ nin aika ba, ɔ nin angboti bla'm be tɛtɛ'n, sɛ an yaci sran nga b'a yo-man sa'm be kunlɛ lika nga nun wa'n,

⁷ i liɛ n ´yaci amun lika nga nun wa. N ´yaci amun mɛn nga n fa mannin amun nannan mun b'ɔ ti amun liɛ titi'n i nun.

⁸ Sanngɛ amun liɛ'n, ndɛ finfin ng'ɔ yo-man like fi ye'n i su yɛ amun lafi-ɔ.

⁹ Awie wualɛ nin sran kunlɛ, nin sran'm bé yi'm be kunndɛlɛ'n, ɔ nin nda talɛ ato nun'n, yɛ ɔ ti amun junman-an. Amun sɔ amuɛn nga be flɛ i Baal'n. An fa amún wun wla amuɛn bɔ amun si-man be laa bɔ ngbɛn'n bé sa nun.

¹⁰ Kpɛkuun amun kunngba'n an ba min nyrun sua bɔ min dunman yɛ ɔ o su'n nun. An ko se kɛ: Y'a fite nun. An ´se sɔ nan amu'an kwla yo amun tete sa sɔ'n ekun.

¹¹ ?Sua kpa bɔ min dunman'n wo su'n, ɔ ti amun nyrun kɛ awiefuɛ'm be fiawlɛ sa ? N wun i sɔ.› » Anannganman'n yɛ ɔ kan sɔ-ɔ.

¹² «Sɛ amun waan n ´laka'n, an `ko nian mín sua ng'ɔ o Silo lɔ'n kan n trannin lɔ laa'n. An `ju lɔ be nian like nga n fa yoli Izraɛlfuɛ'm bɔ be ti min nvle nunfuɛ'n be sa tɛtɛ bɔ be yo'n i dunman nun.

¹³ Amun kusu, sa nga amun yoli i lɛ'n ti'n, m boli amun ndɛ kan klelɛ'n bo nglɛmun nun. N kan n flannin nun lelele, nán tielɛ yɛ an ko tie-ɔ. N flɛli amun lelele, nán min su yɛ an ko tɛ-ɔ.

¹⁴ I ti'n, sa kunngba nga n fa yoli Silo'n yɛ n ´fa yo sua nga min dunman'n wo su yɛ'n bɔ i su yɛ an lafi'n, ɔ nin lika nga n fa mannin amun nin amun nannan mun nin-ɔn .

¹⁵ N ´yi amun ase kɛ n fa yili amun niaan Efraimfuɛ'm be ase'n sa.»

Srɛlɛ bɔ Nyanmiɛn tɛ-man su'n

¹⁶ «Zeremi, nán srɛ nvle nga nunfuɛ'm be ti kun. Nán sun flɛ min, nán kpata min be dunman nun. Nán bo wɛ, afin n su di-man su.

¹⁷ ?Like nga be yo i Zida klɔ'm be su'n nin Zerizalɛm akpɔ'm be su'n, ɔ bɔbɔ ɔ́ nyin ta-man nun?

¹⁸ Nian! Ba kanngan'm be ko isa yie yɛ bé si'm be fa trɔ sin-ɔn. Be nin'm be kusu be fɔtɔ sanmlɛn yɛ be fa tɔn gato be man amuɛn nga be flɛ i Astarte, bɔ i suan dunman yɛlɛ Nyanmiɛn Su Famiɛn Bla nin-ɔn.»

¹⁹ Anannganman wan yoo: «?Like nga be yo i lɛ'n, min yɛ be su yo min-ɔn? Be bɔbɔ yɛ be su yo be wun-ɔn. Ɔ ti be bɔbɔ be nyrun nyannzuɛn.»

²⁰ I sɔ'n ti Anannganman Nyanmiɛn'n waan: «Nian, min ya'n, min ya dan'n i nuan like ɔ wa ju lika nga su, ɔ ´ju sran nin nnɛn'm be su. Ɔ ´ju bo nun waka nin fie su ninnge'm be su. Ɔ wa jue kɛ sin sa, be nuɛn i-ɔ ɔ su yo-man ye.»

Nvle kun bɔ i nunfuɛ'm be ti-man be Nyanmiɛn'n i ndɛ'n

²¹ Anannganman b'ɔ ti Izraɛl Nyanmiɛn'n b'ɔ sie mɛn wunmuan'n wan yoo: «An `fa amun tɛ nga be yra be nnɛn'n kɔlikɔli'n an `fa uka tɛ kun nga'm be nnɛn liɛ'n su nan amun `di.

²² Afin kɛ n fali amun nannan mun Ezipt mɛn'n nun lɔ fiteli'n, m'an kan-man ndɛ fi m'an kle-man be. M'an man-man be mmla sraka wafa nnyɔn sɔ'n be su.

²³ Ndɛ nga n fa sieli be nyrun'n yɛlɛ kɛ: sɛ an tie mín nuan ndɛ'n, n ´yo amun Nyanmiɛn, amun kusu amun ´yo min sran mun. An `nian atin nga n `kle amun'n cɛ be `fa su nan amu'an di alaje.

²⁴ Sanngɛ b'a sie-man bé su nan se kɛ tielɛ yɛ be ´tie-ɔ. Be klun klo akunndan liɛ'n su yɛ be fali-ɔ. Be nzuɛn tɛ akunndan bɔ be kaci i-ɔ ɔ kaci-man'n i su yɛ be fali-ɔ. B'a ɔ-man be nyrun, bé sin yɛ be ɔli-ɔ.

²⁵ Kɛ ɔ fin cɛn bɔ amun nannan'm be tuli Ezipt lɔ lele b'ɔ ´fa ju ndɛ'n, m'an yaci-man min sufuɛ'm be sunmanlɛ amun wun. M boli mín nuan ijɔfuɛ'm be sunmanlɛ bo nán ndɛ-ɔ.

²⁶ Sanngɛ amu'an fa-man bé ti b'a de-man nan se kɛ i su falɛ yɛ amun ´fa-a. An yoli nyin kekle. Amún sa tɛ liɛ'n trali amún nannan'm be liɛ'n.»

²⁷ «Zeremi, a kan ng'ɔ o lɛ'n kle be-ɔ, be su fa-man bé ti de-man. A flɛ be-ɔ, be su tɛ-man wɔ su.

²⁸ Kpɛkuun se be kɛ: ‹Nvle nga nunfuɛ'm be tie-man Anannganman be Nyanmiɛn'n i aniɛn'n. Be tu be fɔ-ɔ, be fa-man. Tranlɛ nga be nin sran tran-an be kpɔci-mɛn i'n, ɔ ti-man amun nzuɛn kun, ɔ ti-man amun ndɛ kun.› »

Sran'm be Nunnunlɛ Kongo'n

²⁹ «Zidafuɛ mun, an `kpɛkpɛ amún ti muɛn b'ɔ kle kɛ min liɛ yɛlɛ amun'n, nan an `guɛ i blo. An ´to sɛ jue kpɔlɛ nga be su ti treketreke'n be su. Afin m'an yi amun blo. Yɛlɛ kɛ amun ti akpasua kun bɔ amu'an fɔkɔ mín anwlɛn.»

³⁰ Anannganman'n waan: «Sa nga Zidafuɛ'm be yoli'n, ɔ'a yo-man min fɛ mlɔnmlɔn. Be fali be tete ninnge'm be sieli i sua bɔ min dunman'n wo su'n nun, be fali fiɛn kɛnnin i.

³¹ Be kplannin sraka yiwlɛ lika Tɔfɛt b'ɔ o Bɛn-Inɔm kongo'n nun lɔ'n nun, yɛ be fa be mma yasua mun nin bla mun be yra be be yi sraka. Kusu wuun n nian se-man be kɛ be yo i sɔ like le. I sɔ akunndan nian ba-man mín ti nun le.»

³² Anannganman'n waan: «I sɔ'n ti cɛn wie wa ju bɔ be ´flɛ Tɔfɛt nin Inɔm kongo'n be dunman uflɛ. Be ´flɛ be kɛ: Sran'm be Nunnunlɛ Kongo. Be su wun-man fuɛn'm be siewlɛ kun. Tɔfɛt lɔ yɛ be ´ko sie be siɛn nin-ɔn.

³³ Fuɛn sɔ mun yɛ be ´kaci apɛtɛkuasi nin nsoso'm be aliɛ-ɔ. Be ´di i sa-a sran fi su kankan-man be bo.

³⁴ N ´yo man Zida klɔ'm be su nin Zerizalɛm akpɔ'm be su bo srolɛ nin aklunjuɛ jue tolɛ'n ɔ ´wie. Gbanflɛn nga b'a ja bla uflɛ uflɛ'n nin talua nga b'a ja bian uflɛ uflɛ'n be jue tolɛ'n ɔ ´wie. Afin mɛn'n ɔ ´wie nunnun.»