Zeremi 6 - NYANMIƐN NDƐ'N 1998

Nyrɛnnɛn dan kun su wa tɔ Zerizalɛm klɔ'n su

¹ «Bɛnzamɛn i osu nunfuɛ mun, an `jaso Zerizalɛm be ko fia. An `bo awɛ Tekoa lɔ. An `sie nzɔliɛ kun Bɛt-Akerɛm lɔ. Nyrɛnnɛn dan kpa kun fin mɛn'n i nglo lɔ su ba.

² Siɔn b'ɔ ti klanman, b'ɔ klo i wun siesielɛ'n, m'an yo man ɔ si-man wie se kun.

³ Bua kankanfuɛ'm be nin be bua mun b'a bɛ i wun lɛ tranlɛ. B'a kplan be tannin sua mun i wun sɛsɛsɛ. Be lɛ be nnɛn'm be didiwlɛ bé ti nun ti nun.

⁴ Be kpan se kɛ: ‹Man e nin be e ko kun. Man e wɔ wia jran. Cuekee! Sɛnzɛ'n su kɔ tɔlɛ, e wawɛ'm be su yo tɛnndɛn.

⁵ E `jaso e `wɔ kɔnguɛ E `ko bubu bé sua kpakpa mun.›

⁶ Anannganman b'ɔ sie mɛn wunmuan'n waan: ‹An `kpɛ waka nan an `fa kplan akpa Zerizalɛm wun.› Klɔ sɔ'n nin fɔ bulɛ fata. Sran mianmianlɛ'n yɛ ɔ ti i nunfuɛ'm be junman-an.

⁷ I klunwi sa'n ɔ nyrɛn kɛ nzue ti b'ɔ nyrɛn viaa'n sa. I wun ndɛ nga be ti'n, i kwlaa ti sa tɛtɛ nin sran mianmianlɛ ndɛ ngunmin. Cɛn kwlaa a ´to ɔ́ nyin-ɔn, ɔ ti sran nga b'a bo be kannin ɔ nin nga be su fɛ'n be ngunmin.

⁸ Zerizalɛm: ‹Nian ɔ́ wun. Ɔ'a yo-man sɔ-ɔ, e nin wɔ e ´bu. N ´fa wɔ n kaci aawlɛ flɛnnɛn, sran fi su tran-man wɔ su.› »

Nvle nga i waan ɔ ti-man Anannganman i nuan ndɛ'n

⁹ Anannganman b'ɔ sie mɛn wunmuan'n waan: «Man be isa-isa Izraɛlfuɛ be onga mun, kɛ b'a ti vinyi mma b'a sin nan be su niɛn-niɛn i ja nun ekun sa. Man be fa bé sa'n wlan-wlan vinyi sama'n su bla kɛ vinyi tifuɛ mun sa.»

(Zeremi waan)

¹⁰ ?Wan yɛ n ´kan ndɛ n ´kle i-ɔ? ?Wan yɛ n ´fa sa'n n ´sie i nyrun b'ɔ ´fɛ i su sie su-ɔ? B'a bu be sukpɔ nun waka. Ɔ man be sie bé su-ɔ ɔ yo-man ye. Be srisri. Anannganman i ndɛ'n, i tielɛ yo-man be fɛ kun.

¹¹ Ya ng'ɔ kun min'n ti-man blɛblɛ. N suɛn i bo-ɔ ɔ suan-man kun. «Yi i nglo guɛ i ba kanngan nga be wlan akpɔ'n su'm be su. Yi i nglo gbanflɛn'n be anyia'm be nun. Be ´fa yasua mun nin bé yi mun, be ´tra sran kpɛnngbɛn mun nin oke kpa mun, be ´fa be kɔ.

(Anannganman waan)

¹² Bé sua'm be ´yo sran uflɛ'm be liɛ. Be fie mun nin bé yi mun be ´yo sran uflɛ liɛ wie. Mín sa ´kan mɛn nga nunfuɛ'm be kwlaa.» Anannganman'n yɛ ɔ kan sɔ-ɔ.

¹³ «Afin sran nga be lɛ-man nyrun o, nga be lɛ nyrun o, be bɔbɔ be like liɛ nyanlɛ akunndan cɛ yɛ be bu-ɔ. Min nuan ijɔfuɛ o, min nyrun jranfuɛ o, be kwlaa be ti gblɛfuɛ.

¹⁴ Be ´fua min nvlefuɛ'm bé kannin nin-ɔn, be fa yo ngowa. Be waan sa fi su ju-man. Be waan lika'n ti fɔun, kusu wuun lika'n ti-man fɔun.

¹⁵ Sa tɛtɛ nga be yoli'n, ɔ yo-man be ya! Like nga be flɛ i nyannzuɛn'n, be si-mɛn i. I sɔ'n ti kusu sran nga be ´tɔ'n, be nin be yɛ be ´tɔ-ɔ. Blɛ nga e nin be e yia nun'n, be ´fin ase.»

¹⁶ Anannganman'n wan yoo: «An `jran atin'm be su nian. Ajalɛ nga amu'an fɛ i lɛ'n, an `jran kan nan amun nian. An `usa be bɔ be fali laa atin mun'n. An `kunndɛ atin kpa'n an `fa su nan amu'an di alaje .» Sanngɛ be waan: «Cɛcɛ, e kpli-man su.»

¹⁷ N sieli sasafuɛ mun klɔ'n su kɛ be `se be kɛ: «An `sie amún su, awɛ'n tɛ.» Sanngɛ be waan: «E sie-man é su.»

¹⁸ Ɔ man nvle-nvlefuɛ mun, an `tie. Sa ng'ɔ wa ju be su'n, Izraɛl nvle'n nunfuɛ mun, man amún su ti.

¹⁹ Asiɛ'n sufuɛ mun, amun `tie. N wa fa nyrɛnnɛn wie n ´yi nvle sɔ'n i nunfuɛ'm be su. Akunndan tɛtɛ nga be bu'n, i su nyrɛnnɛn-ɔn. Afin b'a fa-man bé su b'a sie-man min ndɛ'n i bo. Be yoli min mmla bɔ n kleli be'n be finfin.

²⁰ ?Ansans nga an ko fɛ i Seba'n, ɔ fata min nguɛ? ?Ayre fanninfannin nga amun ko fɛ i mɛn wie nun mmua lɔ ba'n, ɔ fata min nguɛ? Nnɛn nga an fa yi tɛ nga be yrɛ i nnɛn'n kɔlikɔli'n, be yo-man min klanman. Amun sraka'm be jɔ-man min klun.

²¹ I sɔ'n ti Anannganman'n wan yoo: «N wa fa ninnge wie mun n ´sie nvle sɔ'n i nunfuɛ'm be atin'n su n ´fa yi be ase. Man siɛ mun nin be mma mun, nin be tranfuɛ mun, nin be janvuɛ mun, be kwlakwla be wu.»

Siɔnfuɛ'm be kpɔfuɛ'm be fin mɛn'n i nglo lɔ yɛ be ba-a

²² Anannganman'n wan yoo: «Nvle kun nunfuɛ'm be fin mɛn'n i nglo lɔ lika'n nun be su ba. Nvle dan kun nunfuɛ'm b'a jaso mɛn'n i bue kun lɔ be su ba.

²³ Ta nin cua o sonja sɔ'm bé sa nun. Be yo be ninnge liɛ sinnzin su, be si-man aunnvuɛ. Nganniɛn nga be yo'n ɔ tɛ kɛ jenvie yɛ ɔ su bo sa. B'a fu b'a tran be nnɛn kpanngɔ'm be su. B'a jranjran tɔɔn! A wun be sa-a, ɔ waan sran kunngba-a. Siɔnfuɛ mun be nin be su wa kun.»

(Izraɛlfuɛ'm be waan)

²⁴ Kɛ e tili jasin sɔ'n, e sa sin bubuli ye, ye akunndan'n sanngannin, e klun kanndannin ye, yɛ srɛ kunnin ye kɛ bla b'ɔ su wa wu ba'n sa.

²⁵ Nán amun fite be wɔ blo lɔ. Nán an wɔ atin'm be su. E kpɔfuɛ'm be o lɔ, be ´ko kun amun. Ɔ lɛ-man lika kun nga nyrɛnnɛn'n nun-man lɛ-ɔ.

(Anannganman waan)

²⁶ «Min sran mun, an `wla bajɛ tralɛ. An `la kondo ndutre nun. An `yo sɛ kɛ amun wa klikli'n ɔ'a wu sa. An `to sɛ jue ng'ɔ kle sunlɛ kpa'n, yɛlɛ kɛ like sacifuɛ'n su wa fu amun nun ɔ ´tɔ amun su.»

Sika nga be yi i nun fiɛn nin-ɔn ɔ yo-man ye'n (Anannganman waan)

²⁷ «Zeremi, m'an fa wɔ m'an sie min nvle'n nun kɛ sika tɔnfuɛ sa. Sie be wafa'n i nzɔliɛ, yi be nun fiɛn'n kɛ be fa yi sika nun fiɛn'n sa.»

(Zeremi waan)

²⁸ Be kekleke liɛ'n ti kɛ aaba annzɛ blalɛ sa, ɔ lɛ-man be nun kun. Be ti abla difuɛ, be kwlaa be ti sa tɛ yofuɛ.

²⁹ Ajuin difuɛ'n ɔ fita i sin nun lele ngbɛn. Sɛ be waan be nian sin'n i lolɛ b'ɔ lo'n ti'n, wuun sunmun'n ɔ klo lele ɔ wie. Be tɔn jɛtɛ ufue'n ngbɛn, nán i nun fiɛn'n yɛ ɔ ko wie-ɔ.

³⁰ Be flɛ be kɛ sika b'ɔ lɛ-man nyrun. Be lɛ-man nyrun Anannganman i sa nun.