Zeremi 51 - NYANMIƐN NDƐ'N 1998

¹ Anannganman'n wan yoo: «N wa yo man aunngban kekle kpa ng'ɔ saci like'n ɔ ´fita Babilɔni mɛn'n nun. N ´fa fita Kaldefuɛ'm be su.

² N wa sunman sran mun kɛ be ko sanngan be nun nan be bo sanndi kɛ aunngban'n su sanngan ijre'n nun sa. Be ´wie lɔ ninnge'm be ´fɛn. I sɔ nyrɛnnɛn cɛn liɛ nun'n, sran'm be ´fin wa be ´fin wa, yɛ be ´ju guɛ i su-ɔ.

³ Nán be man be ta tofuɛ'm be atin man be to be ta'n. Nán be man be sonja'm be atin man be nyan bé ti be wla like kokloko bɔ be fa kata be wue'n su'n. Nán an yo be sonja gbanflɛn'm be blɛblɛ. An `nunkun be alɛ mma'm be kwlaa sekeseke.

⁴ Man be wu Babilɔni mɛn sɔ'n nun lɔ. Man be gua klɔ gua'n su flɛnnɛnnɛn.

⁵ Sa tɛ nga Izraɛlfuɛ mun nin Zidafuɛ'm be yoli Izraɛl Nyanmiɛn'n bɔ i nzuɛn nin klɔ sran liɛ'n ti-man kun'n, be di-mɛn i yalɛ. Sanngɛ ɔ nin sɔ ngba'n, Anannganman b'ɔ sie mɛn wunmuan'n ɔ'a wanndi-man be.

⁶ An `wanndi Babilɔni lɔ be bla. Amun kwlaa be `wanndi. Nán be kun amun ngbɛn bé sa tɛ'n ti. Anannganman i klunngbɔ tulɛ blɛ'n yɛ ɔ'a ju yɛ. Sa nga Babilɔni fa yoli i wiengu mun'n, Anannganman ɔ ´yi be mɛn i .

⁷ Babilɔni o Anannganman'n i sa nun laa kɛ sika ɔkwlɛ klowa sa. Klowa sɔ'n nun nzan'n, ɔ boli asiɛ wunmuan'n. Nvle-nvlefuɛ nga be nɔnnin i sɔ nzan liɛ'n, be boli sa, be wun-man sa wlɛ kun .

⁸ Kpɛkuun Babilɔni yɛ ɔ'a a tɔ yɛ, yɛ klowa'n yɛ ɔ'a bo yɛ. Be `sun i! Be `kunndɛ ayre tɛ i kannin'n nun. Sɛ i kannin sɔ'n ɔ ´fafa mɛn i o !

⁹ E yoli Babilɔni lele ngbɛn. Nán juejue yɛ ɔ ko yo-ɔ. Nga, man e yaci i lɛ e wɔ é mɛn kunngun'm be nun ke! Anannganman su sa nga ɔ'a tɔ i su yɛ'n, nán kan ngowa sa-a .

¹⁰ Anannganman'n ɔ'a yi e ndɛ fɛ'n i nglo. An `bla e wɔ Siɔn e ko kan sa nga e Nyanmiɛn'n ɔ'a yo ɔ'a man ye'n.

¹¹ Akunndan nga Anannganman'n ɔ'a fa'n yɛlɛ Babilɔni nunnunlɛ. I yɛ ɔ wlawla Medi famiɛn mun kɛ be nin i be `yia nun nin-ɔn. Ɔ ´kunndɛ kɛ ɔ `tu i klunngbɔ i sua'n dunman nun. An `kpita amun cua'm bé nuan. An `sua be klɔun an `gua be amun pata'm be nun.

¹² An `man flanga'n su man be wun kɛ amun su di be klɔ wun talɛ wun junman. Be bɔ be nian amun su'n, man be sɔn. Amun `siesie be sɛsɛsɛ. Amun `sua Babilɔnifuɛ'm be wun aya. Akunndan nga Anannganman fɛli i Babilɔni wun'n, i nuan yialɛ su like yɛ ɔ o lɛ-ɔ.

¹³ Nja b'ɔ tran nzue dan'n i nuan'n, nja bɔ i bo ninnge'n be di-man be yalɛ'n, ɔ liɛ ɔ'a wie andɛ .

¹⁴ Anannganman b'ɔ sie mɛn wunmuan'n ɔ tali i bɔbɔ i wun nda. I wan yoo: ‹Sran nga be wa ju gua ɔ su'n, nán sa yolɛ-ɔ. A wun be sa-a, ɔ waan lalo mun-ɔn.› Be yɛ be ´bo sro be ´gua ɔ wun nin-ɔn.

¹⁵ I kwlalɛ b'ɔ kwla'n man ɔ yili asiɛ'n. I ngwlɛlɛ'n man ɔ wlali mɛn'n i bo ase. I ngwlɛlɛ'n man ɔ trɛli nglo lɔ'n nun kɛ tannin sa.

¹⁶ I nɛn b'ɔ ´uke sa'n, kpɛkuun nyanmiɛn su lɔ nzue'n b'a kan b'a bo nun. Nzue'n ɔ mlan dan kpa asiɛ'n i bue kun lɔ. Ɔ man nyanmiɛn'n ɔ kpa sin kpɛkuun nzue'n tɔ. Sɛ e ´kwla se'n, aunngban'n fin i sua'n nun lɔ fite.

¹⁷ Sran'm be kwlaa be yo sinnzin, sa wlɛ bɔ be wun-man'n ti. Ajuin difuɛ nga be yi amuɛn mun'n, be wun nyannzuɛn. Be wun kɛ bé sa nuan like sɔ'n ɔ ti finfin like. Nguan fi nun-man be nun.

¹⁸ Be ti ninnge finfin, be nin finfin yolɛ fata. Cɛn nga Anannganman'n ´tu be fɔ'n, be ´wie nunnun.

¹⁹ Sanngɛ sran ng'ɔ ti kɛ Zakɔb osufuɛ'm be anyanbeun like sa'n, ɔ ti-man kɛ be sa. Afin i yɛ ɔ ti mɛn wunmuan'n i yifuɛ nin-ɔn. Sran sɔ'n, Izraɛl ti i liɛ mlɔnmlɔn. I dunman'n yɛlɛ Anannganman b'ɔ sie mɛn wunmuan'n.»

Awieliɛ'n ɔ'a wie Babilɔni

²⁰ Anannganman waan: «Babilɔni, laa a ti kɛ marto sa yɛ a o mín sa nun yɛ n fa kpuke nvle-nvle'm be nun-ɔn. A ti kɛ alɛ like sa yɛ a o mín sa nun yɛ n fa nunkun mɛnmɛn mun-ɔn.

²¹ I nnɛn kpanngɔ mun o, be su fufuɛ mun o, wɔ yɛ n fa wɔ n fa kpuke be nun-ɔn. I kakaklolo mun o, be nun fufuɛ mun o, wɔ yɛ n fa wɔ n fa kpuke be nun-ɔn.

²² I yasua mun o, i bla mun o, wɔ yɛ n fa wɔ n fa kpuke be nun-ɔn. I oke mun o, i ba kanngan mun o, wɔ yɛ n fa wɔ n fa kpuke be nun-ɔn. I gbanflɛn mun o, i talua mun o, wɔ yɛ n fa wɔ n fa kpuke be nun-ɔn.

²³ I nnɛn kankanfuɛ mun o, i nnɛn mun o, i lika tutufuɛ mun o, i lika tutulɛ ninnge mun o, i nvle siefuɛ mun o, i lika su kpɛn mun o, wɔ yɛ n fa wɔ n kpuke be nun-ɔn.

²⁴ Sanngɛ andɛ, an `ko nian Babilɔni lɔ be `nian. An `ko nian Kalde mɛn'n nunfuɛ mun be `nian. Sa nga be fa yoli Siɔn'n, m'an yi i kwlakwla'n m'an man be kpan!»

²⁵ Anannganman wan yoo: «Like sacifuɛ kpli, se kɛ sɛ, e nin wɔ y'a nyɛn i andɛ. Nja b'ɔ nunkun asiɛ wunmuan'n, n wa to mín sa'n m bla wɔ. N ´su wɔ bo oka'n b'ɔ ti kpangba'n i ti su nglo lɔ n ´yi wɔ ase. N wa yo man a ´kaci sin mlɔnmlɔn.

²⁶ Ɔ man oka wunmuan kun kɛ wɔ sa'n, be kunndɛ sua bo ase wlalɛ yɛbuɛ wɔ su-ɔ, be su nyɛn-mɛn i kun, nan nán se kɛ sua cɔnjɔ su yɛbuɛ. A ´yo sa flɛnnɛnnɛn!» Anannganman'n yɛ ɔ kan sɔ-ɔ.

²⁷ «An `kplan flanga mɛn'n nun. An `fita nnɛn wɛ'n nun nvle-nvle'm be nun lɔ. An `kpa sran kpanngban kpa man be nin Babilɔni be ko kun. An `flɛflɛ nvle-nvle'm be nunfuɛ mun. Ɔliɛ Ararat lɔfuɛ mun nin Mini lɔfuɛ mun, ɔ nin Askenazfuɛ mun. An `siesie sran man be kpa sonja i sɔ mɛn liɛ'm be nun. An `fa nnɛn kpanngɔ kpanngban kpa kɛ lalo mun sa man be nin i wɔ kunlɛ.

²⁸ An `kpa sran kpanngban kpa Medi famiɛn'm bé sa nun. Kan kwlaa bɔ Medi mɛn'n nun nvle siefuɛ mun nin lika su kpɛn'm be o lɛ'n, an `ko kpa sran lɔ.

²⁹ Babilɔni i wun akunndan nga Anannganman'n buli'n, kɛ bɔ ɔ su yo i su sa'n, asiɛ ɔ lɛ kejelɛ! Anannganman'n man Babilɔni mɛn ɔ'a kaci i liɛ kɛ aawlɛ flɛnnɛn wie sa. Sran ba kun sa ijɔ-man su kun.

³⁰ Babilɔni alɛ kunfuɛ kpakpa'm b'a kun-man alɛ'n kun. B'a wluwlu be fiawlɛ'm be nun sɛsɛsɛ. Bé wun ɔ'a fɔ mlɔnmlɔn. B'a kaci kɛ bla sin sa siɛn'n. Be kpɔfuɛ'm b'a bubu be klɔ'n i wun anuan mun. B'a fa sin b'a yi bé sua'm be nun.

³¹ Sran'n wie wanndi ko to i wiengu wanndifuɛ'n, jasin bofuɛ'n, wie to wie atin nun. Jasin bofuɛ'm be su be wun su. Be kan bé wun ndɛndɛ be ko bo jasin'n kle Babilɔni famiɛn'n. Be waan: ‹Ee, e kpɔfuɛ'm b'a fa klɔ wunmuan'n.›

³² Be jinjin atin'm be su sɛsɛsɛ. Klɔ'n i kekle lika'n, b'a fa sin b'a yi nun. E alɛ kunfuɛ'm be si-man wie se kun.»

³³ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Be sili Babilɔni su danme. Be sili su danme kɛ lika wie bɔ ɔ cɛ kan be su wa bo ble nun'n sa.»

Anannganman'n ´tu i nvle'n i klunngbɔ (Siɔnfuɛ'm be waan)

³⁴ «Nɛbikadnɛzar b'ɔ ti Babilɔni famiɛn'n ɔ'a yo-man ye blɛblɛ, ɔ kunnin ye mlɔnmlɔn. Ɔ'a gua ye lɛ kɛ kpongbo bɔ like fi nun-man nun kun'n sa. Ɔ mɛnnin e kɛ wuo ɔ'a mɛn like sa. E sa nun like kpakpa'n, ɔ wieli i kwlaa di trili. Kpɛkuun ɔ tuli ye i mɛn'n nun.

³⁵ Sa nga Babilɔni fa wlali ye nun'n, man i su sa'n tɔ i bɔbɔ i ti'n su. Kunlɛ nga be kunnin ye'n, man i su sa'n tɔ Kaldefuɛ sɔ'm be su.» Kɛ Zerizalɛmfuɛ'm be kan sa.

*

³⁶ Anannganman'n kusu wan yoo: «N ´de amun ti ngondin'n n ´tu. N ´tu amun klunngbɔ'n. N wa yo man Babilɔni jenvie'n ɔ `wie nun. I nzue ti'n ´wie nun.

³⁷ Babilɔni ´kaci yɛbuɛ kwle. Lɔ yɛ nsoso'm be ´la-a. Sran fi su ijɔ-man su kun. Be wun i sa-a, bé nuan'n yɛ ɔ ´bo bé wun-ɔn. Nyrɛnnɛn yɛ ɔ ´yo sa ngbɛn-ɔn.

³⁸ Kɛ e ´se yɛ'n, tianlɛ'n yɛ Babilɔnifuɛ mun be tian kɛ asɔmɔli wie bɔ b'a kpɛ cro'n sa. Kpanlɛ yɛ be kpan kɛ nnɛn wie bɔ b'a kpɛ cro'n sa.

³⁹ Kɛ awe'n ko ti be'n, n wa man be aliɛ fɛfɛ kpa man be ´di. Be ´di, be ´nɔn nzan'n lele be ´bo. Kpɛkuun lafilɛ nga be lafi-ɔ be tinnge-man'n yɛ be wa lafi-ɔ.» Anannganman'n yɛ ɔ kan sɔ-ɔ.

⁴⁰ «N ´fa be n ´kɔ nnɛn kunwlɛ lɔ kɛ bua sa annzɛ kɛ boli sa.»

Babilɔni i su sɛ jue

⁴¹ ?Ɔ yo sɛ ti yɛ Sesak ɔ'a tɔ sa-a? Ɔliɛ klɔ'n nga i dunman'n ɔ'a fu kɛ be fu-man'n, nvle wie ɔ'a a fɛ i bɔ cɛ! Ɔ yo sɛ ti yɛ Babilɔni ɔ'a bubu flɛnnɛnnɛn sa mɛnmɛn be afiɛn-ɔn! Be wun-man nvle kun b'ɔ fɛli i-ɔ.

⁴² Jenvie'n wɔli lele ko kɛtɛli i su kplu! Ɔ mɛnnin i bi!

⁴³ Babilɔni klɔ'n, b'a bubu i sa flɛnnɛnnɛn! Ɔ'a kaci kɛ aawlɛ flɛnnɛn sa. Sran ba kun sa ijɔ-man su kun. Sran ba kun sa sin-man su.

⁴⁴ Anannganman'n wan yoo: «Babilɔni lɔ amuɛn nga be flɛ i kɛ Bɛl'n, e nin i y'a nyɛn i. Like ng'ɔ dili'n, n ´yo man ɔ ´fi. Ɔ man nvle-nvlefuɛ nga be kɔ lɔ beblebe'n, be ´yaci lɔ kɔlɛ. Talɛ ng'ɔ si Babilɔni wun'n, ɔ'a bu ɔ'a tɔ.

⁴⁵ Min nvlefuɛ mun, an `jaso lɔ. Man sran kun kpli i bɔbɔ i ti. An `jaso min ya dan'n i bo.

⁴⁶ Be waan be waan ndɛ nga be kɛnkɛn i mɛn'n nun'n, nán ɔ kun amun srɛ. Afuɛ nga, be kan ndɛ wie unkun-unkun! Nán amún sa sin bubu amun. Afuɛ ekun be ´kan uflɛ! Siefuɛ wlɛfuɛ uflɛ ɔ wa tu siefuɛ wlɛfuɛ laa'n.

⁴⁷ Nan yoo: Cɛn wie lele e nin Babilɔni amuɛn mun e ´yia nun. Ɔ man Babilɔni mɛn wunmuan'n ɔ ´wun nyannzuɛn. Lɔfuɛ nga be wu'n, be fuɛn'n ´yo wannzo.

⁴⁸ Kɛ Babilɔni mɛn'n i nunnunfuɛ'n nga be fin nglo lɔ ´ba'n, nganniɛn dan kun ´tɛ asiɛ'n su nin nyanmiɛn su lɔ.» Anannganman'n yɛ ɔ kan sɔ-ɔ.

( Nyanmiɛn nuan ijɔfuɛ'n waan)

⁴⁹ Babilɔnifuɛ'm be kunnin Izraɛlfuɛ sunman. An `se kɛ sɛ: «Babilɔni bɔ asiɛ'n i lika kun nga i nunfuɛ'n b'a kun-man sran nun'n ɔ nun-man'n lɛ'n, be wa kun lɔfuɛ'm be wie. Izraɛlfuɛ'm be kunlɛ bɔ be kunnin be'n ti .

⁵⁰ Amún nga kusu bɔ b'a nyan-man amun b'a kun-man amun'n, an `wanndi be wɔ, nán an ka amun osu'n nun lɛ. Sanngɛ kan kwlaa bɔ amun wo'n, nán amún wla fi Anannganman'n. Man Zerizalɛm i ndɛ lo amun.»

(Izraɛlfuɛ'm be waan)

⁵¹ «Ee! Kɛ e ko wun nyannzuɛn'n yɛ e wunnin i-ɔ. Kɛ aofuɛ'm be wluli Anannganman'n i sua nun'n, bɔ be ´kpɛ nzowa'n, é nyin'n guali ase kekleke!»

(Nyanmiɛn waan)

⁵² «I sɔ'n ti, cɛn kun, e nin Babilɔni lɔ amuɛn mun e ´yia nun. Babilɔni mɛn wunmuan'n nun'n ɔ ti be nga be o wulɛ'n be fɛfɛlɛ ngunmin.

⁵³ Sɛ bɔ Babilɔni fu lele ju nyanmiɛn su lɔ'n, sɛ i fiawlɛ'n yo klanman'n, sɛ b'ɔ ko fia kplɛ'n, kannzɛ ɔ yo sɛ'n m bɔbɔ n ´sunman i nunnunfuɛ mun be ´ko to i lɔ.» Anannganman'n yɛ ɔ kan sɔ-ɔ.

( Nyanmiɛn nuan ijɔfuɛ'n waan)

⁵⁴ «Amun `sie amún su, be kpan Babilɔni lɔ. Kaldefuɛ'm be klɔ lɔ nganniɛn dan kun tɛ.

⁵⁵ Anannganman'n su nunnun Babilɔni'n. I ti be ti-man Babilɔnifuɛ'm be kpanlɛ kun. Babilɔni i kpɔfuɛ'm be bo sro saa, ɔ waan jenvie'n yɛ ɔ su bo-ɔ, wie kusu nzue yɛ ɔ su bo nun-ɔn.

⁵⁶ Lika sacifuɛ'n wo balɛ. Ɔ nin Babilɔni su wa yia nun. Ɔ wa tra Babilɔni i safunyrɛn mun. Ɔ ´bubu be ta'm be nun. Afin Anannganman'n ti Nyanmiɛn kun b'ɔ sran kun i sa ng'ɔ yo'n i su yɛ ɔ nian yo i wie-ɔ.

⁵⁷ Babilɔni famiɛn'n i awlo lɔ sran dandan mun, nin afɔtuɛ manfuɛ mun, nin nvle siefuɛ mun, nin lika i su kpɛn mun, ɔ nin safunyrɛn mun, m ´man be nzan be ´nɔn be ´bo be ´lafi. Be su tinnge-man kun. Famiɛn nga be flɛ i kɛ Anannganman'n b'ɔ sie mɛn wunmuan'n yɛ ɔ kan sɔ-ɔ.»

⁵⁸ I kunngba'n i wan yoo: «Babilɔni klɔ'n i wun talɛ gbendengble mun, be ´wie bubu. I anuan nglo-nglo mun'n, sin'n ´di be ngba. Sran nga be ´di i sɔ junman'n, be ´fɛ ngbɛn. Be ´di i sɔ junman'n be ´man sin'n .»

Ndɛ nga be klɛ yili i Efrat nzue ba nun'n

⁵⁹ Sedesias b'ɔ ti Zida famiɛn'n, kɛ be sieli i famiɛn'n, i afuɛ nnan'n su'n b'ɔ ´kɔ Babilɔni'n, ɔ nin Maazeza i wa bɔ be flɛ i Sɛraza b'ɔ Neriza i anunman'n yɛ be ɔli-ɔ. Sɛraza ti i awlo lɔ sonja su kpɛn. Kɛ be ´kɔ'n, Zeremi mannin Sɛraza i ngaliɛ.

⁶⁰ Nyrɛnnɛn sa fanunfanun ng'ɔ wa tɔ Babilɔni su'n, Zeremi klɛli i kwlakwla'n fluwa kun nun. Ndɛ sɔ mun yɛ b'a dun mmua b'a kan be ndɛ nin-ɔn.

⁶¹ Kpɛkuun ɔ seli Sɛraza kɛ yoo: «Kɛ a ju Babilɔni lɔ'n, kanngan ndɛ ng'ɔ o yɛ mun kwlakwla, nán ɔ́ wla fi su!

⁶² Kpɛkuun `kan gua su kɛ: ‹Anannganman, ɔ bɔbɔ yɛ a kannin lika nga ndɛ kɛ be `nunnun i-ɔ, ɔ nin i sran mun o, ɔ nin i nnɛn mun o! Wɔ yɛ ɔ waan like fi su tran-man su kun, nan ɔ ´bubu flɛnnɛnnɛn, man be su kplɛn-mɛn i kun nin-ɔn.›

⁶³ Kɛ a ko wie i kanngan ko guɛ i lɔ'n, fa yɛbuɛ kun fa cici fluwa'n, kpɛkuun fa yi Efrat nzue'n nun.

⁶⁴ Kpɛkuun se kɛ yoo: ‹Kɛ Babilɔni i liɛ'n ´wie kɛ nga sa. Nyrɛnnɛn nga Anannganman'n ´fa yi i su'n, ɔ su fin-man nun fite-man kun. Sran'm be ´fɛ ngbɛn .› » Zeremi i ndɛ'n i awieliɛ'n yɛ.