Zeremi 50 - NYANMIƐN NDƐ'N 1998

Babilɔni i tɔlɛ nin Izraɛl i ti nyanlɛ

¹ Ndɛ nga Anannganman'n fa wlɛli i nuan ijɔfuɛ Zeremi nuan kɛ ɔ kan man Babilɔni nin i mɛn mun'n yɛ:

² «Be `kan jasin'n be kle mɛnmɛn mun. Be kɛn i weiin. Be `kan, nán be fia su. Be `se kɛ: ‹Babilɔni tɔli, Bɛl i nyin ɔ'a gua ase. Mɛrɔdak bubuli. Babilɔni lɔ ninnge nga be su be'n bé nyin ɔ'a gua ase. Lɔ amuɛn'm be bubuli.›

³ Nvle kun fin nglo lɔ lika liɛ'n nun su ba. Sɛ n ´kwla se'n, ɔ nin i be wa yia nun. Ɔ wa saci lika'n, ɔ ´kaci kɛ aawlɛ flɛnnɛn sa! Sran su tran-man su kun. I sran o, i nnɛn o, be ´bo sanndi.

⁴ I sɔ blɛ'n nun yɛ Izraɛlfuɛ mun nin Zidafuɛ mun be ´ba likawlɛ nin-ɔn, be ´ba'n, wuun be ´sun. Be ´kunndɛ Anannganman be Nyanmiɛn'n.» Anannganman'n yɛ ɔ kan sɔ-ɔ.

⁵ «Be ´usa be kɔwlɛ'n i osu atin. Be ´usa Siɔn i osu atin. Be ´se kɛ: ‹Amun man e fa e wun e ´cici Anannganman'n. E nin i e ´tra aenguɛ kun bɔ é wla su fi-mɛn i le.›

⁶ Min nvle'n yoli kɛ bua fa kun bɔ b'a mlin'n sa. Be kankanfuɛ'm be mlinnin be. Ɔ man be wlan oka'm be su sa daan! Be fu oka nga su, be jra be ko fu kpɔlɛ nga su. Be si-man be osu atin'n kun .

⁷ Be bɔ be nin be yia nun'n, be di be. Be kpɔfuɛ'm be se kɛ: ‹Be bɔbɔ yɛ be yoli bé wun-ɔn, afin be fɔnnin Anannganman'n i wun. I bɔ yɛ man be ko nyan bé ti'n, i bɔ yɛ bé nannan'm be fa cici bé wla'n, be fɔnnin i wun.›

⁸ An `wanndi, an `fin Babilɔni mɛn'n nun fite. An `fin mɛn sɔ'm be nun fite. An `fite kɛ boli kpakpuɛ wie bɔ sɛ be ´kɔ lika-a be dun be wiengu'm be nyrun'n sa .

⁹ Yɛlɛ kɛ m bɔbɔ min n wa yia nglo lɔ lika'n nun nvle-nvle dandan mun. Man be nin Babilɔni be wa kun. Be wa jrɛn i wun sɛsɛsɛ. Be ta'm be ´yo kɛ alɛ kunfuɛ kpakpa'm be liɛ'n sa. Sɛ be to be-ɔ be su to fuan-man.

¹⁰ Be ´fɛn Babilɔni mɛn nunfuɛ'm be bo ninnge mun. Be bɔ be ´fɛn'n, be ´fɛn i kpa man be klun ´jɔ.» Anannganman'n yɛ ɔ kan sɔ-ɔ.

¹¹ «Nanwlɛ! Man amun klun jɔ, man amun wunnɛn'n blibli amun! Amun bɔ an nɛnnɛnnin mín bo ninnge mun'n, amun `tu kpɛn kɛ nannin ba bɔ b'a kpɛn ijre nun'n sa. An `kpan kɛ nnɛn kpanngɔ mun sa.

¹² Sanngɛ an `nian kɛ amún nin ɔ'a wun nyannzuɛn-ɔn. An `nian kɛ bla ng'ɔ wuli amun'n i nyin ɔ'a gua ase-ɔ. I yɛ ɔ'a ka nvle'm be siɛn-ɔn. I mɛn'n ɔ'a kaci kɛ aawlɛ flɛnnɛn bɔ nzue tɔ-man lɔ'n sa!»

¹³ Anannganman ɔ'a fɛ i wun ya. I ti sran tran-man nun kun. I ti ɔ ´kaci flɛnnɛn! Sran nga be ´sin Babilɔni'n, kɛ be wun sa ng'ɔ juli i su'n, be ´yo i finfin. Kɛ be wun sacilɛ bɔ ɔ'a saci'n, be srisri i.

¹⁴ Ta tofuɛ mun, an `sin be wa jranjran Babilɔni wun sɛsɛsɛ. Amun `to i wun ta. Nán an se kɛ amun ´yaci ta mma'n wie lɛ. Ɔ fɔnnin Anannganman wun ngboko, an `to i wun ta.

¹⁵ Amun `bo sin yiɛ i nan amun `kpan alɛ kpanlɛ. An `nian, ɔ'a mɛn i sa'n su. I sasawlɛ sua'm be su bu be gua. I klɔ wun talɛ'n ɔ'a wie bu. Anannganman'n su tu i klunngbɔ. An `tu amun klunngbɔ be guɛ i su. Sa ng'ɔ fa yo sran mun'n, an `fa yo i wie.

¹⁶ An `fuɛn i su ble guafuɛ mun nin i su ble kpɛfuɛ mun. Kɛ alɛ'n yri kpa'n, man be `wanndi wɔ be klɔ. Man be wanndi wɔ be mɛn'n nun.

¹⁷ Izraɛl ti kɛ bua bɔ asɔmɔli'm b'a fuɛn i bɔ ɔ'a mlin'n sa. Sran ng'ɔ dun mmua dili i'n yɛlɛ Asiri famiɛn'n. Kpɛkuun Babilɔni famiɛn'n kusu ɔ wa boboli i owie'n.

¹⁸ Ɔ man i ti Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Sa nga n fa yoli Asiri famiɛn'n, i kunngba'n yɛ n ´fa yo Babilɔni famiɛn'n nin i mɛn nin-ɔn.

¹⁹ N ´fa Izraɛl n sɛ i sin i osu. N ´fɛ i n sɛ i sin Karmɛl nin Bazan lɔ didiwlɛ'm be nun. I klun ´jɔ Efraim oka'm be su nin Galaad mɛn'n nun.

²⁰ I blɛ sɔ nun'n, be ´kunndɛ sa tɛ nga Izraɛl yoli'n lele ngbɛn. Be su wun-mɛn i le. Sa tɛ nga Zida yoli'n, be ´kunndɛ lele ngbɛn. Be su wun-man kan ɔ sinnin-ɔn. Afin be bɔ n yacili be lɛ'n, n ´yaci bé wun sa n ´cɛ be .

²¹ A nin Mɛrataim nvle'n be ko kun. A nin Pɛkɔdfuɛ mun be ko kun. Kun be, nunkun be! Nán be nun kun sa ka lɛ. Sa nga n waan a `yo'n, fa yo be.» Anannganman yɛ ɔ kan sɔ-ɔ.

²² «Ɔ ti alɛ kpanlɛ'n sa mlɔnmlɔnmlɔn mɛn'n nun. Sa ng'ɔ ´ju'n ɔ yo sro.

²³ An `se kɛ sɛ, marto b'ɔ keje asiɛ'n ɔ'a bu, i nun ɔ'a fufu. Babilɔni fa-man mɛn kun. Ɔ'a yo sa flɛnnɛnnɛn kɛ aawlɛ kee'n sa.

²⁴ Babilɔni, n suali ɔ wun aya. W'a si-man sɔ kpɛkuun a wa tɔli nun. Wɔ yɛ b'a tra wɔ yɛ. Afin a nin Anannganman'n yɛ be boli su-ɔ.»

²⁵ Sɛ e kwla se'n, Anannganman'n ɔ'a tike i alɛ ninnge guawlɛ'n i anuan. Ɔ'a fa alɛ ninnge'n. Ɔ'a fa ya kpa sa kɛ safunyrɛn'n ɔ fɛ i alɛ ninnge'n ya su'n sa. Anannganman b'ɔ sie mɛn wunmuan'n, ɔ wa yo sa Babilɔni mɛn nun'n.

²⁶ Man Babilɔnifuɛ'm be kpɔfuɛ mun be fin wa be fin wa, be `kpuke be tanngannin'm be nun. Be `isa ninnge'm be bo i kofie. Be `nunnun klɔ'n, nán like fi ka lɛ.

²⁷ Be `kun be sonja kpakpa mun. Be `kpɛ be kɔmin kɛ be kpɛ nnɛn kɔmin nnɛn kunwlɛ lɔ'n sa. Be blɛ liɛ'n juli, be liɛ wieli. Be fɔ tulɛ blɛ'n juli.

²⁸ An `sie amún su be `tie be bɔ be wanndi tɔ blo'n be ndɛ'n. Be bɔ be fin Babilɔni lɔ fite'n, be wa kan Anannganman e Nyanmiɛn i klunngbɔ b'ɔ su tu'n nin i sua'n i ti ngondin b'ɔ tu'n be ndɛ kle Siɔn.

²⁹ An `flɛflɛ ta tofuɛ'm be ngba man be nin Babilɔni ko kun. Man be ko tran Babilɔni anuan'n i nyrun lɛ. Nán be man sran kun sa sinwlɛ. Sa ng'ɔ fa yoli i wiengu mun'n, man be fa yo i wie. Sa ng'ɔ fa wlali be nun'n, man be fa wlɛ i nun wie. Yɛlɛ kɛ ɔ yoli i wun kpakpa Anannganman'n su. Ɔ yoli i wun kpakpa Izraɛl i Nyanmiɛn'n su.

³⁰ «Ɔ man i ti lɔ gbanflɛn'm be ´tɔ klɔ gua'n su. Lɔ alɛ kunfuɛ'm be kwlaa be ´wu cɛn sɔ'n nun.» Anannganman'n yɛ ɔ kan sɔ-ɔ.

³¹ «Wun tufuɛ kpli, e nin wɔ y'a nyɛn i. Ɔ fɔ tulɛ blɛ liɛ'n juli.» Anannganman b'ɔ sie mɛn wunmuan'n yɛ ɔ kan sɔ-ɔ.

³² «Wun tufuɛ'n ɔ ´bo nvaka kpɛkuun ɔ ´tɔ. Be su nyan-man sran fi b'ɔ ´mɛn i su-ɔ. N ´fa sin n yi i klɔ'm be nun. I sɔ sin liɛ'n ´didi kɔ klɔ nga be o i asa'm be su'n be su.»

³³ Anannganman b'ɔ sie mɛn wunmuan'n wan yoo: «Izraɛlfuɛ mun nin Zidafuɛ mun'n, kɛ be ko fɛ'n yɛ b'a fɛ-ɔ. Be bɔ be trali be lomuɛn be ɔli'n be lɛ be nun cinnjin be waan be yaci-man be nun.

³⁴ Sanngɛ bé ti ngondin tufuɛ'n ɔ lɛ wunmiɛn. Be flɛ i kɛ: Anannganman B'ɔ Sie Mɛn Wunmuan'n. Ɔ ´tu bé ti ngondin. Ɔ man be mɛn'n ´nyan fɔundi. I kunngba'n man Babilɔnifuɛ'm bé wun ´usu be.»

Sa nga Anannganman gugu kɛ ɔ ´fa yo Babilɔni'n

³⁵ «Be ´fa alɛ tu Kaldefuɛ mun. Be ´fa alɛ tu Babilɔni klɔ'n sufuɛ mun. Be ´fa tu be famiɛn i awlo lɔ sran dandan mun nin be afɔtuɛ manfuɛ mun.» Anannganman'n yɛ ɔ kan sɔ-ɔ.

³⁶ «Be ´fa alɛ tu be wunnzue yifuɛ mun, nan be `yo kɛ sran bɔ be si-man ngwlɛlɛ sa. Be ´fa alɛ `tu be alɛ kunfuɛ mun, nan bé sa sin `bubu be.

³⁷ Be `fa alɛ fuan be nnɛn kpanngɔ mun, be ´fa saci be alɛ kakaklolo mun. Be ´fa tu nvle-nvle nga be nin be ju be kun'n. Man be kaci kɛ bla sin sa. Man sran'm be `tɔ be bo ninnge kpakpa'm be su be fa.

³⁸ Babilɔni nzue ba mun, man be wu kee. Afin mɛn sɔ'n ti amuɛn mɛn. I sɔ amuɛn'n ti bé ti sran'm bé ti ɔ'a saci bé ti su mlɔnmlɔn.

³⁹ I sɔ'n ti man aawlɛ nun lɔfuɛ mun be nin blo nnɛn mun yɛ be wa tran be klɔ'n su-ɔ. Klɔnsoklo be ´fa yo be tranwlɛ. Nán sran tran Babilɔni su kun le. Nán sran ijɔ su kun le.

⁴⁰ Ɔ wa yo kɛ Sodɔm nin Gomɔr, ɔ nin be asa'n su klɔ bɔ Nyanmiɛn'n nunnunnin be'n sa, sran su tran-man su kun. Sran fi su ijɔ-man su kun le.

⁴¹ Nvle kun fin nglo lɔ lika'n nun lɔ ɔ o balɛ. I sɔ nvle liɛ'n ɔ ti dan, yɛ i famiɛn'm be kwlaa, b'a jaso asiɛ'n i bue kun lɔ be o balɛ.

⁴² Bé sa nun ta nin cua. Be yo wlɛ, be si-man sran aunnvuɛ. Kɛ be kpan sa'n, ɔ waan jenvie'n yɛ ɔ su bo-ɔ. Be o be nnɛn kpanngɔ'm be su. B'a jranjran tɛɛn cɛ! Babilɔni, be nin wɔ yɛ b'a ba kunlɛ-ɔ.

⁴³ Kɛ Babilɔni famiɛn'n tili i sɔ ndɛ liɛ'n, i sa sin bubuli i. Srɛ'n ɔ'a kun i kpo. I klun'n kɛnndɛn i kɛ wunnzɛfuɛ wie bɔ i ba wulɛ ɔ'a ju sa.

⁴⁴ N ´yo kɛ asɔmɔli wie b'ɔ fin Zurdɛn nuan susrɛ wie nun fite kpɛkuun ɔ ti nyanman kɔ aawlɛ flɛnnɛn'n i afiɛn lɔ nzue ti lika'n i ndɛnman trele'n sa. Be nyinma bulɛ kun nun'n, n ´fuan be. N ´fa min sran liɛ'n n ´sie Babilɔni su kpɛnngbɛn. ?Wan cɛ yɛ ɔ nin min sɛ-ɔ? ?Kɛ wan sa cɛ yɛ ɔ ´se min kɛ: ‹Nguɛ ti yɛ a yo sɔ-ɔ?› Kpɛn onin bɔ cɛ yɛ ɔ jran min nyrun-ɔn ɔ yo ye-ɔ?

⁴⁵ Babilɔni wun akunndan nga Anannganman ɔ'a fa'n, an `tie, Kaldefuɛ'm be nvle'n i wun gugulɛ nga ɔ'a gugu'n, an ´tie. Be ´fa be kɔ kɛ bua mun sa. Ba kun sa su ka-man lɛ. Be ´saci be tranwlɛ'n mlɔnmlɔn.

⁴⁶ Kɛ be boli ndolo kɛ: ‹Babilɔni ɔ'a tɔ oo!› Asiɛ'n lɛ kejelɛ. Be ti i nganniɛn'n nvle-nvle'm be nun.»