Zeremi 49 - NYANMIƐN NDƐ'N 1998

Amɔnfuɛ mun

¹ Amɔnfuɛ'm be jasin liɛ yɛ. Anannganman'n usa kɛ yoo: «?Ɔ ju sɛ ti yɛ man amuɛn nga be flɛ i Milkɔm ko fa Gadi fa yoli i liɛ nin-ɔn? ?Ɔ ju sɛ ti yɛ man Milkɔm i nvle'n ko fa Izraɛl klɔ mun fa yoli i liɛ nin-ɔn? ?Wuun wielɛ yɛ Izraɛl lɔfuɛ'm b'a wie ti-ɔ? ?Izraɛlfuɛ'm be ajalɛ nunfuɛ'm b'a wie ti-ɔ?»

² I sɔ'n ti Anannganman waan: «Cɛn kun m man alɛ awɛ'n ´tɛ Rabat b'ɔ ti Amɔnfuɛ'm be klɔ dan'n su. Klɔ sɔ'n ´saci mlɔnmlɔn! I asa'n su klɔ mun'n, sin ´di be kwlaa kpan! Kpɛkuun be bɔ be sieli Izraɛl'n, be ´kaci yo i kanga.» Anannganman'n yɛ ɔ kannin-ɔn.

³ «Ɛsbɔnfuɛ mun, amun `sun, b'a nunkun Ai klɔ'n. Rabat asa'n su klɔ mun, an `kpan kɛ: ‹Be `de ye o, be `de ye o! Amun `wla bajɛ tralɛ, amun `yi ngwlɛ sɛ b'ɔ o amun su'n ti.› Be su fa Milkɔm nin i nyrun tranfuɛ, ɔ nin i famiɛn i awlo lɔ sran dandan mun be ´kɔ kanga. An `wanndi wɔ wa, an `wanndi wɔ wa, amun `san talɛ'n.

⁴ Nyin keklefuɛ mun. ?Nán amun yɛ an fa amun kongo mun di amún nuan nin-ɔn? ?Amun kongo'n nun asiɛ klanman'n, nán amun yɛ amun fa di amún nuan nin-ɔn? Amun fa amun wla gua amun anyanbeun ninnge'm be su, i ti amun ko se kɛ yoo: ‹?Kɛ wan sa cɛ yɛ ɔ nin ye wa ba kunlɛ-ɔ?›

⁵ Anannganman b'ɔ sie mɛn wunmuan'n wan yoo: ‹Sa nga n ´fa yi amun su'n su yo-man blɛblɛ. Ɔ fin wa ɔ fin wa yɛ ɔ ´tɔ amun su-ɔ. Amun ´bo je, sran kun sa su sɔ-man amun nun.

⁶ Sanngɛ cɛn wie lele n ´fa Amɔnfuɛ mun n ´sa bé sin be osu laa'n nun.› » Anannganman'n yɛ ɔ kan sɔ-ɔ.

Edɔm

⁷ Edɔm liɛ'n yɛ: Anannganman b'ɔ sie mɛn wunmuan'n waan yoo: «?Teman kpa'n, ngwlɛlɛfuɛ nun-man su lɔ kun? ?Lɔ akunndanfuɛ mun, ngwlɛlɛ yɛ be si-mɛn i kun ti-ɔ?

⁸ Dɛdanfuɛ mun, an `kaci amun ja sin be `wanndi! An `ko tran yɛbuɛ buɛ'm be nun. N su fa nyrɛnnɛn'n n ´yi Ezau i osu'n nunfuɛ'm be su. Be fɔ tulɛ blɛ liɛ'n ɔ'a ju.

⁹ Vinyi tifuɛ mun'n, sɛ be kpɛn amun fie nun'n, be su yaci-man vinyi sɔsɔwa kun sa lɛ! Sɛ awiefuɛ'm be ko to amun kɔnguɛ'n, be ´fɛn amún bo ninnge'n ngba.

¹⁰ Sanngɛ min liɛ'n, n ´fɛn Ezau bo ninnge'n ngba. I ninnge fiawlɛ mun, n ´yi be kwlaa be nglo. Amun fia min nyrun-ɔn, ɔ su yo-man ye. Amun osu liɛ wunmuan'n, ɔ ´nunnun treketreke. Amun liɛ'n, amun mantanfuɛ bɔ kun su ka-man lɛ nan se kɛ ɔ ´fɔnvɔ amun ´se kɛ:

¹¹ ‹Nán amun koko, amun aika mma'm be ti. M bɔbɔ min n ´nian be lika. Man amun angboti bla'm be lafi min su.› »

¹² Anannganman wan yoo: «Sran nga bɔ m'an se-man kɛ be yɛ be `nɔn ya klowa'n nun, be nɔnnin nun. ?Yɛ ɔ li wɔ Edɔm, be yaci wɔ lɛ sɔ-ɔ ɔ yo ye? San like ng'ɔ o nun'n, i nɔnlɛ cɛ yɛ a ´nɔn-ɔn.»

¹³ Anannganman waan: «Se kɛ sɛ, n kan m bɔbɔ min Anannganman'n ti: Bɔzra klɔ'n ɔ ´nunnun mlɔnmlɔn, be su wun-man like kun b'ɔ fɛ i-ɔ. Be ´saci kɛ likɛ. Be ´fɛ i dunman'n be ´fa bo sannzan. I asa'n su klɔ'm be kusu be ´nunnun mlɔnmlɔn.»

¹⁴ N tili ndɛ kun. Anannganman'n fali ndɛ kun wlɛli i sunmanfuɛ kun nuan kɛ ɔ ko kan kle mɛnmɛn mun. I waan: «Be `yia, be nin Edɔm ko kun! Be `fa alɛ'n be wlɛ i sin!

¹⁵ Se kɛ sɛ: ‹N ´yo man a ´yo kaan kpa mɛn'm be nun. Sran'm be kwlaa be yo wɔ finfin.

¹⁶ A nyinman-nyinman ɔ́ wun, a yo ɔ́ wun dandan sran'm be su ngbɛn. Wɔ bɔ yɛbuɛ buɛ'm be nun yɛ a wo'n, wɔ bɔ kpɔlɛ'm be su nglo-nglo lɔ yɛ a tran'n, ɔli man a yo ɔ́ sua'n nglo mmua lɔ kɛ anunman nyin'n sa, n ´ti wɔ lɔ n ´to yi wɔ ase.› » Anannganman'n yɛ ɔ kan sɔ-ɔ.

¹⁷ «Edɔm'n ´saci mlɔnmlɔn. Sran nga be ´sin i wun lɛ'n be kwlaa be ´bo bli. Be nga be ´sin'n, be yo i finfin. Kɛ be wun sacilɛ bɔ ɔ'a saci'n, be ´srisri i.

¹⁸ Edɔm ´saci kɛ Sodɔm nin Gomɔr, ɔ nin be asa'n su klɔ mun sa. Ɔ ´tɔ srolo! Sran kun sa su tran-man su kun.»

¹⁹ «N ´yo kɛ asɔmɔli wie b'ɔ fin Zurdɛn nuan susrɛ wie nun fite kpɛkuun ɔ ti nyanman kɔ aawlɛ flɛnnɛn'n i afiɛn nzue ti lika'n i ndɛnman trele'n sa. Be nyinma bulɛ kun nun'n, n ´fuan Edɔmfuɛ mun sekeseke. N ´fa min sran liɛ'n n ´sie Edɔm su kpɛnngbɛn. ?Wan cɛ yɛ ɔ nin min sɛ-ɔ? ?Kɛ wan sa cɛ yɛ ɔ ´se min kɛ: ‹Nguɛ ti yɛ a yo sɔ-ɔ?› ?Kpɛn onin bɔ cɛ yɛ ɔ jran min nyrun-ɔn ɔ yo ye-ɔ?

²⁰ Edɔm wun akunndan nga Anannganman ɔ'a fa'n, an `tie. Temanfuɛ'm be wun gugulɛ nga ɔ'a gugu'n, an `tie. Ɔ ti nanwlɛ weiin, be ´fa be kɔ kɛ bua mun sa, ba kun sa su ka-man lɛ. Ɔ ti nanwlɛ weiin, be ´saci be tranwlɛ'n mlɔnmlɔn.

²¹ Kɛ be ´tɔ sa kpun! Asiɛ'n ´keje. Be ´ti be tɔlɛ'n i nganniɛn'n ndɛma jenvie'n nuan lɔ.

²² Like'n ɔ'a trɛtrɛ i ndɛwa'n nun kɛ anunman nyin sa ɔ su tu sin Bɔzra lika'n su. I le kun sɔ nun'n, Edɔm lɔ sonja'm be nun kpakpa'm be anwlɛn'n ɔ ´si kpukpukpu kɛ wunnzɛfuɛ wie bɔ i klun su yo i ya'n sa.»

Damas liɛ yɛ

²³ «Amat nin Arpad be si-man wie se kun. Jasin nga be tili'n ti-man kpa. Srɛ'n ɔ'a kun be kpo. Be akunndan'n ɔ'a sanngan sa nán sa fi yolɛ-ɔ.

²⁴ Damasfuɛ mun be tra be anwlɛn-ɔn ɔ tra-man kun. B'a kaci bé ja sin be o wanndilɛ. Bé wun'n usu-man be ngowa. Be anwlɛn'n si kpukpukpu kɛ wunnzɛfuɛ bɔ i ku nun su yo i ya'n sa.

²⁵ Ee! Klɔ'n bɔ laa ɔ ti sa wluwlu'n yɛ ɔ'a tɔ srolo sɔ-ɔ! Aklunjuɛ klɔ'n, i yolɛ bɔ ɔ'a yo'n yɛ!

²⁶ Damas gbanflɛn'm be ´tɔ klɔ'n i gua'n su sa flɛnnɛnnɛn! Cɛn sɔ nun'n, i alɛ mma'm be ´wu sekeseke !» Anannganman b'ɔ sie mɛn wunmuan'n yɛ ɔ kan sɔ-ɔ.

²⁷ «N ´fa sin n ´yi i Damas klɔ'n nun. Sin'n ´di Bɛn-Adad i famiɛn sua mun.»

Kedar nin Azɔr be liɛ yɛ

²⁸ Klɔ nga Babilɔni famiɛn'n kwlali be'n be liɛ yɛ. Anannganman'n wan yoo: «Amun `jaso. Amun nin Kedar be `ko kun! Be `ko saci aawlɛ flɛnnɛn nun lɔfuɛ'm be lika'n.

²⁹ Be `fa bé tannin sua nin be nnɛn mun. Be `fa bé sua nin bé bo trɔ mun. Be `fa be nyɔnngɔnmɛn mun wɔ. Be `bo awuyomo be su be `se kɛ: ‹Nyrɛnnɛn'n fin wa fin wa›

³⁰ Azɔrfuɛ mun, an `wanndi, an kan amun wun. An `ko fia yɛbuɛ kunman'm be nun. Babilɔni famiɛn Nɛbikadnɛzar ɔ'a bu amun wun akunndan tɛ. Gugulɛ nga ɔ'a gugu amun wun'n ti-man blɛblɛ.» Anannganman'n yɛ ɔ kan sɔ-ɔ.

³¹ Anannganman'n wan yoo: «An `jaso nan amun nin be bɔ be klun ti-man be'n, bɔ be waan sa fi kwla ju-man be su'n be ko kun. Be lɛ-man anuan nan se kɛ i nun gboklo yɛ be lɛ i-ɔ. Be nin sran mantan-man.

³² Be kpɔfuɛ'm be `fa be nyɔnngɔnmɛn mun nin be nnɛn'm be kwlakwla be `fa yo be liɛ. N ´kpaja be kɛ ble bɔ be kpaja bɔ aunngban'n fa tru lika'n nun'n sa. N ´kpaja be kwlaa sɔ nga be yi be akanza'n lele kpɛn lɔ'n. N ´yo man nyrɛnnɛn ´fin wa ´fin wa yɛ ɔ ´tɔ be su-ɔ .» Anannganman'n yɛ ɔ kan sɔ-ɔ.

³³ «Azɔr klɔ'n ɔ ´kaci nsoso'm be tranwlɛ. Ɔ ´saci mlɔnmlɔn, ɔ su sin-mɛn i osu kun. Sran fi su tran-man su kun. Klɔ sran kun sa su tran-man su kun.»

Elam liɛ'n yɛ

³⁴ Zida famiɛn Sedesias blɛ su'n, ndɛ nga Anannganman'n fa wlali Zeremi nuan kɛ ɔ `kan man Elam'n yɛ.

³⁵ Anannganman'n wan yoo: «Elam i ta bɔ i nun yɛ i fanngan'n wo'n, n wa bu nun.

³⁶ N ´sunman aunngban nnan Elam lɔ: be sa bɛ su liɛ, fama su liɛ, nglo lɔ liɛ, asiɛ'n su wa liɛ. Kpɛkuun, n ´kpaja Elamfuɛ mun man aunngban sɔ'n be fa be wɔ. Mɛn nga Elamfuɛ be su bo-man je be ko tran-man nun'n, i sɔ mɛn liɛ'n nun-man lɛ.

³⁷ N ´yo man Elamfuɛ'm be ´usu be kpɔfuɛ'm be nyrun. Be ´usu be bɔ be klo be nin wie'n be nyrun. Bé wun ya dan bɔ m'an fa'n ti n ´fa nyrɛnnɛn'n n ´yi be su. N ´fa alɛ'n n ´su be su lele san be wie wu.

³⁸ N ´ko taka min famiɛn bia'n Elam klo'n nun. N ´nunkun be famiɛn'n nin be awlo lɔ sran dandan mun.» Anannganman'n yɛ ɔ kan sɔ-ɔ .

³⁹ «Sanngɛ cɛn wie lele n ´yo man Elamfuɛ'm be ´sa be sin be osu laa'n nun.» Anannganman'n yɛ ɔ kan sɔ-ɔ.