Zeremi 48 - NYANMIƐN NDƐ'N 1998

Moab i jasin liɛ'n yɛ

¹ Moab liɛ'n yɛ. Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Nɛbofuɛ'm be yako. Be yako, sa bɔ n ´yo be'n yɛlɛ be klɔ b'ɔ ´nunnun'n. B'a fa Kirzataim, i nunfuɛ'm be si-man wie se kun. Fiawlɛ klɔ sɔ'n, i nunfuɛ'm be si-man wie se kun. Be sa sin ɔ'a bubu be.

² Moab i klanman'n wieli. Be buli i wun akunndan tɛ Ɛsbɔn lɔ. Be waan: ‹Amun man e wɔ e ko nunkun nvle sɔ'n. Nán be kɛ i be wla nvle'm be nun wie kun.› Madmɛnfuɛ mun, amun kusu be ´fa alɛ'n be ´su amun su lele klɔ'n ɔ ´tɔ bliin.

³ Be bo awuyomo Kɔrɔnaim lɔ. Be se kɛ: ‹Cuekee! Sa wie yo-man sɔ.›

⁴ Moab liɛ ɔ'a wie. Be ti lɔ ba kanngan'm be kpankpanlɛ.

⁵ Awuyomo tɛ Lisit kpɔlɛ'n su lɔ. Be ´tro Kɔrɔnaim kongo'n, wuun be ´kpan: ‹Be de min o! Be de min o.›

⁶ An `wanndi wa be wɔ. Sran ng'ɔ kwla wanndi-ɔ, ɔ `kpli i bɔbɔ i ti. Amun `wɔ aawlɛ flɛnnɛn'n nun lɔ kɛ blo aflunmun sa.

⁷ Moabfuɛ mun, kɛ bɔ amun amuɛn nin amun ninnge'm be su yɛ amun lafi'n, i ti be wa fa amun mɛn'n. Be ´fa amun amuɛn bɔ be flɛ i kɛ Kɛmɔs'n, be ´fɛ i be ´kɔ mɛn uflɛ nun. Amun amuɛn nyrun tranfuɛ nin amun famiɛn i awlo lɔ sran dandan'n be kwlaa'n, be ´fa be ´kɔ mɛn uflɛ nun.

⁸ Like sacifuɛ'n ´wlu amun klɔ'n kwlaa be nun. Klɔ kun sa su ka-man lɛ. Ɔ ´funndan kongo'm be nun. Ɔ ´saci lika kpɛtɛkplɛɛ'n.» Anannganman'n yɛ ɔ kannin-ɔn.

⁹ «Be `man Moabfuɛ'm be ndɛwa man be tu kɛ anunman sa be wɔ, afin be klɔ'm be wa bo. Sran fi su tran-man be su kun.

¹⁰ Sran ng'ɔ fa nvɛɛ yo Anannganman i junman'n, i yako! Sran ng'ɔ se kɛ yoo: ‹Kɛ n `tra kaka'n nun n `kun be'n ɔ yo min ya'n.› I sɔ sran liɛ'n b'ɔ se sɔ'n i yako!

*

¹¹ Sɛ Moab ti sran'n, wuun n ´se kɛ kɛ ɔ fin i kaan nun lele'n, sran fi nian kle-mɛn i yalɛ le'n, wuun n ´se kɛ sran fi nian fɛ-mɛn i nian ɔ-man mɛn uflɛ nun le. Ɔ o i wolɛ lɛ cɛ kɛ nzan wie b'ɔ o i tomua'n nun bɔ be nian kaci-mɛn i le'n sa. I sɔ'n ti ɔ tɛ yo uflɛ kɛ blɛ li yɛ b'a yi i sa. Yɛ i bɔnlɛ fannin fannin tɛ o i osu'n nun.»

¹² Ɔ man i ti Anannganman'n wan yoo: «Cɛn wie lele'n, n wa sunman sran kɛ be wɔ be ko kaci be gua tomua uflɛ nun nan be `bobo tomua klikli'n.

¹³ Kɛ Izraɛl awlofuɛ'm be fali bé wla guali Betɛl lɔ amuɛn'n su bɔ bé nyin guali ase'n, yɛ Moabfuɛ'm bɔ be fa bé wla gua Kɛmɔs su'n bé nyin wa gua ase sɔ-ɔ .»

¹⁴ «?Ɔ ju sɛ yɛ man amun ko se kɛ yoo: ‹E ti safunyrɛn, e si alɛ kun nin-ɔn?›

¹⁵ Moab ɔ'a nunnun. B'a wɔ lɔ klɔ'm be nun. Be su kankan lɔ gbanflɛn mun be ´kɔ be kunlɛ. Famiɛn'n yɛ ɔ kan sɔ-ɔ. Famiɛn sɔ'n i dunman'n yɛlɛ Anannganman b'ɔ sie mɛn wunmuan'n.

¹⁶ Moab ɔ'a wie bo ɔ'a wie. Nyrɛnnɛn ng'ɔ wa tɔ mɛn sɔ'n su'n, sɛ n ´kwlaa se'n, ɔ su kɛn i wun ´ba.

¹⁷ Nvle nga amun mɛntɛn i lɛ'n, amun bɔ amun si i'n, an `yo i yako, an `se kɛ: ‹Ee! ?Nan sɛ ti yɛ nvle sroesroe nga i liɛ wieli sɔ-ɔ? ?Ɔ yo sɛ ti yɛ like klanman nga i liɛ wieli sɔ-ɔ?›

*

¹⁸ Dibɔnfuɛ mun, Moab i nunnunfuɛ'n su ba amun su wie. Ɔ wa saci talɛ ng'ɔ sasa amun klɔ'n. Amun `jaso amun anyrunnyan dan'n nun amun tran asiɛ kee'n su.

¹⁹ Arɔɛrfuɛ mun, an `jran atin'n su be nian. Be bɔ b'a nyan-man be b'a kun-man be bɔ be wanndi'n, amun usa be kɛ: ‹?Nguɛ sa-a?›

²⁰ Be ´tɛ amun su kɛ: ‹Moab i nyin utuli ase, i liɛ wieli. Amun `sun, amun `bo awuyomo. Amun `wɔ Arnɔn nzue ba'n nuan lɔ be ko se kɛ Moab ɔ'a nunnun.›

²¹ Anannganman'n i fɔ tulɛ'n tɔli lika kpɛtɛkplɛɛ'n nun lɔ nvle'n i su, yɛ ɔ tɔli Ɔlɔn, nin Zaaz, ɔ nin Mefat be su wie.

²² Ɔ tɔli Dibɔn, nin Nɛbo, ɔ nin Bɛt-Biblataim be su wie.

²³ Ɔ tɔli Kiriataim, nin Bɛt-Gamil, ɔ nin Bɛt-Mɛɔn be su wie.

²⁴ Ɔ tɔli Kɛrizɔt, nin Bɔzra be su wie, ɔ tɔli Moab mɛn'n nun klɔ'm be kwlaa be su wie, nga be o mmua o, be nga be o koko o, ɔ tɔli be su wie.

²⁵ Moab lɛ-man wunmiɛn kun. Ɔ lɛ-man fanngan kun.» Anannganman'n yɛ ɔ kan sɔ-ɔ.

²⁶ «Sɛ Moab ti sran'n, wuun n ´se kɛ ɔ yoli i wun dandan. Ɔ yoli Anannganman'n finfin. Be `mɛn i nzan man ɔ nɔn bo nan ɔ `fi nan ɔ `la kondo i fiɛ'n nun nan be `yo i finfin wie .

²⁷ ?Nán wɔ yɛ a yoli Izraɛl finfin nin-ɔn? ?A ko trɛli i nin awiefuɛ mun i ti yɛ man a ´kɛn i ndɛ'n a keje ɔ ti a yo i finfin nin-ɔn?

²⁸ An `yaci klɔ'm be lɛ, an `ko tran yɛbuɛ-yɛbuɛ'm be nun. An `yo kɛ auble'm be sa. Amun `yo kɛ auble'm bɔ be yo be sua yɛbuɛ ng'ɔ seli piaa i wun'n sa.

*

²⁹ Moab i wun tulɛ ng'ɔ tu, i wun ng'ɔ nyinmɛn-nyinmɛn i'n, i wun blɔlɛ ng'ɔ blɔ'n, i wun dandan nin i wun kpakpa ng'ɔ yo'n, e tili.

³⁰ Anannganman'n waan ɔ si i wun tulɛ nin i wun blɔlɛ liɛ'n b'ɔ tratra su'n, ɔ nin i nuan dilɛ b'ɔ di tratra su'n. Sanngɛ i kwlaa sɔ'n ti ngbɛn.

³¹ Nga ti yɛ kɛ mín nyin kpɛn Moab su'n, n to aunnvuɛ jue nin-ɔn. Nga ti yɛ n sun flɛ Moab nvle wunmuan nin-ɔn. Nga ti bɔ n sun Kir-Erɛsfuɛ mun'n yɛ ɔ o lɛ-ɔ.

³² Sibma vinyi fie, n sun flɛ wɔ. N sun wɔ tra Zaɛzɛr. A trɛli lele kpɛli jenvie'n a toli Zaɛzɛr jenvie'n. Kpɛkuun like sacifuɛ'n wa tɔli ɔ mma'm be su. Ɔ wa tɔli ɔ nzan bɔ b'a yi'n su.

³³ Aklunjuɛ nin talolɛ ekee'n wieli Moab fie nglanman'm be su. N yoli man nzan sɛ dandan'm be nun wuli kee. Vinyi mma nga be ´cuɛn'n, wuun be ´bo sro'n, ɔ nun-man nun sɔ kun.

³⁴ Ɛsbɔnfuɛ'm be ngwlɛ'n, be ti i Eleale lɔ. Ɔ kɔ lele ju Zaaz. Kɛ ɔ fɛ i Zɔar'n, ɔ ju Kɔrɔnaim, ɔ kɔ lele ju Eglat-Sɛlisiza. Ɔliɛ Nimrim nzue'm b'a wie nun.

³⁵ Moab lɔ be nga be kɔ kpɔlɛ'm be su ko yra ansans be man amuɛn mun'n, n ´nunnun be ngba.

³⁶ Moab nin Kir-Erɛsfuɛ'm be wun ngwlɛ bɔ n yi i kɛ blo yɛ be su bo sa'n, i bo'n yɛlɛ kɛ like nga be nyɛnnin i'n kwlaa ɔ'a fi be sa.

³⁷ B'a kpu bé ti'm be su tɔɔn! B'a yi be akanza mun wauun! B'a bobo bé sa'm bé wun kannin sa nán sa yolɛ-ɔ. Bajɛ tralɛ'n wo be wun sɛsɛsɛ.

³⁸ Moab sua'm bé su aunngban fawlɛ'n nun lɔ'n nin be klɔ gua'm be su'n, ɔ ti sunlɛ'n sa ekee! Yɛlɛ kɛ m boli Moab, m boli kɛ talie wie b'ɔ yo-man like fi ye kun bɔ b'a bo i'n sa.» Anannganman'n yɛ ɔ kan sɔ-ɔ.

³⁹ «Amun `kpɛ Moab wun sɛ jue be se `kɛ: ‹Cuekee! Moab yɛ ɔ'a tɔ yɛ! Moab yɛ ɔ'a kaci i sin yɛ ɔ ´wanndi kɔ yɛ. ?Nguɛ nyannzuɛn ndɛ liɛ yɛlɛ nga?› Moab ɔ'a kaci flɛn like be nga be mɛntɛn i'n be sa nun. Kɛ be wun i'n, ɔ yo sro.

*

⁴⁰ Anannganman'n wan yoo: ‹Like'n tu sin kɛ anunman nyin sa. Ɔ trɛtrɛ i ndɛwa'n nun Moab su.›

⁴¹ Be klɔ'm b'a tɔ. Be klɔ nga be si be wun'n b'a tɔ. Siɛn'n Moab safunyrɛn'm be wla ɔ'a bo yɛ srɛ kun be kɛ wunnzɛfuɛ wie b'ɔ o ba wulɛ su'n sa.

⁴² Moab nunnunnin. Kɛ b'ɔ buli i wun dan tra Anannganman'n ti yɛ man be kɛ-mɛn i wla-man nvle'm be nun kun nin-ɔn.

⁴³ Moabfuɛ mun, sa sroesroe nin kunman, ɔ nin zɔ'n be nin amun `yia nun.» Anannganman'n yɛ ɔ kan sɔ-ɔ.

⁴⁴ «Sran ng'ɔ wanndi nan sa sroesroe'n ɔ'a nyɛn-mɛn i'n ɔ ´tɔ kunman'n nun. Sran ng'ɔ fin kunman'n nun fite'n, ɔ ´tɔ zɔ'n nun. Blɛ nga e nin Moab e wa yia nun'n, sa nga bɔ m man ɔ ´tɔ i su'n yɛ ɔ o lɛ-ɔ.» Anannganman'n yɛ ɔ kan sɔ-ɔ.

⁴⁵ «Be bɔ be wanndi bɔ be kwla-man nun kun'n, be ´ju Ɛsbɔn lɛ-ɔ, be waan b'a nyan fiawlɛ. Be ´to bé nyin-ɔn, sin yɛ ɔ'a jue Ɛsbɔn i afiɛn yɛ. Sin'n yɛ ɔ fin Siɔn ´ba yɛ. Sin sɔ'n ´didi Moab i bue'n kwlaa su, lele ju ndɛnnganfuɛ bé ti afiɛn.

⁴⁶ Ɔo! Moab yako! Kɛmɔs i nvle'n yɛ ɔ'a nunnun yɛ. I mma'm b'a kaci kanga. Be yɛ be ´sua be kɔ yɛ.

⁴⁷ Anannganman wan yoo: ‹Sanngɛ cɛn wie lele n ´fa Moabfuɛ mun n ´sie be osu laa nun.› » Ndɛ nga Anannganman kɛnnin i nyrɛnnɛn ng'ɔ wa tɔ Moab su'n i awieliɛ'n yɛ.