Zeremi 47 - NYANMIƐN NDƐ'N 1998

Filistifuɛ'm be wun ndɛ

¹ Anannganman kannin Filistifuɛ'm bé wun ndɛ kleli i nuan ijɔfuɛ Zeremi. Kɛ ɔ ´kɛn i sɔ'n, wuun Ezipt famiɛn'n nian fa-man Gaza klɔ'n.

² Ndɛ sɔ'n yɛ: «Like kun fin nglo lika liɛ'n nun lɔ ba, ɔ tɛ kɛ nzue wie yɛ ɔ'a yi sa. Ɔ'a yi lele, ɔ su di asiɛ'n su ninnge'n kwlaa. Ɔ su di klɔ mun, ɔ su mɛn be su sran mun. Sran'm be o kpankpanlɛ. Ngwlɛ o mɛn'n nun sran'm be kwlaa bé nuan.

³ Kɛ siɛ'm be ti nnɛn kpanngɔ'm bé ja bo nganniɛn'n, kɛ be ti kakaklolo'm be kplalɛ'n, kɛ be ti kakaklolo'm bé nganniɛn'n, be si-man wie se kun. Bé wla ´fi be mma mun mlɔnmlɔn.

⁴ Filistifuɛ'm be mɛn'n i bolɛ yɛ ɔ'a ju-ɔ. Be bɔ be nin Tir nin Sidɔn bé bo ti kun'n, be nunnunlɛ yɛ ɔ'a ju-ɔ. N wa nunnun Filistifuɛ'm be mɛn'n. Kaftɔrfuɛ'm be onga kan'n be mɛn'n, n wa nunnun i.

⁵ Gaza lɔ sran'm b'a kpu bé ti'n su, afin sɛ o be su. Askalɔn nin lika nga be mɛntɛn i lɛ'm be nun ɔ'a tɔ srolo! N se kɛ yoo: ‹Nan sɛ'n b'ɔ o amun su'n ti amun ´bobo amun wun kannin sa tititi?

⁶ Amun kusu amun waan: ?Anannganman i tokofi'n li, ɔ kun sran sa-a, ɔ lo-man wunmiɛn? Jran sɔ ke, nja! Wlu ɔ bua'n nun nan tran diin wie!›

⁷ Anannganman ɔ'a se i kɛ: ‹Kɔ ko kun Askalɔn nin jenvie nuan su lɔfuɛ mun. ?B'ɔ nian wie-mɛn i sɔ junman liɛ'n di nin-ɔn, ɔ jran lo wunmiɛn sɛ yɛ ɔ yo ye-ɔ?› »