Zeremi 46 - NYANMIƐN NDƐ'N 1998

¹ Anannganman'n mannin Nyanmiɛn nuan ijɔfuɛ Zeremi i jasin kɛ ɔ `bo kle nvle kun nga mun.

Kwlalɛ nga be kwlali Eziptfuɛ mun Karkemis lɔ'n

² Ezipt liɛ'n yɛ. Ezipt famiɛn'n nga be flɛ i Neko'n i alɛ kunfuɛ'm bé wun jasin-ɔn. I blɛ sɔ nun'n, wuun Ezipt famiɛn Neko kusu wo Karkemis lɔ Efrat nzue ba'n i nuan lɔ. Lɔ yɛ Babilɔni famiɛn Nɛbikadnɛzar i sonja liɛ'm be kwlali Ezipt famiɛn Neko liɛ mun nin-ɔn. Zozias i wa Zozakim i Zida famiɛn dilɛ'n i afuɛ nnan su yɛ ɔ yoli sɔ nin-ɔn .

³ N ti sonja kpɛnngbɛn'n lɔ kɛ: «An `siesie nyrɛn'm be ye! Nyrɛn'n i kanngan mun o, i dandan mun o, an `siesie be ye! An `sin be wɔ alɛ'n kunlɛ.

⁴ An `tanndan nnɛn kpanngɔ'm be wun! Nnɛn kpanngɔ su fufuɛ mun, an `fu be su! Kpongbo kle wlafuɛ mun, an `wla amun kle mun. An `lɔngɔ su sɛsɛsɛ! An `nunnun amun cua'm be su yɛiin! An `wla be wue'n nun like kokloko!»

⁵ «?Nguɛ sa-a? ?Nguɛ yɛ n sun i-ɔ? Be wawɛ yɛ ɔ'a wanndi bé wun yɛ. B'a kaci bé ja sin. Be alɛ kunfuɛ'm b'a gua flɛnnɛnnɛn! Be ´wanndi be ´kɔ siɛn nin-ɔn be nian-man bé sin kun. Lika'n kwlaa ɔ'a sanngan.» Anannganman yɛ ɔ kan sɔ-ɔ.

⁶ Sran nga i wun kpɛ kpa'n bɔbɔ ɔ su kwla nyɛn-mɛn i ti. Safunyrɛn'n bɔbɔ su kwla wanndi-man. Nglo lɔ lika'n nun Efrat nuan lɔ'n, be lɛ-man jranwlɛ kun, b'a tɔ.

⁷ ?Wan yɛ be ´fa Nil'n bɔ ɔ'a yi bɔ ɔ'a lele lika'n be ´fa sunnzun i-ɔ?

⁸ Ezipt bɔ ɔ'a yi lele kɛ Nil'n sa nin-ɔn. Ɔ ko se kɛ: «N ´yi bu gua, n ´lele mɛn mun. N ´saci klɔ mun nin be su tranfuɛ mun.» Eziptfuɛ'm be waan:

⁹ «Nnɛn kpanngɔ mun, an man e wɔ! Kakaklolo mun, an `tu wɔ! Sonja kpakpa mun nin Kisfuɛ mun, ɔ nin Pitfuɛ mun, amun bɔ an ti nyrɛn nun trafuɛ'n, amun `wɔ. Lidfuɛ mun, amun bɔ an ti ta tofuɛ'n, amun `wɔ.»

¹⁰ Anannganman b'ɔ sie mɛn wunmuan'n i cɛn liɛ'n yɛ ɔ'a ju andɛ yɛ. I klunngbɔ tulɛ blɛ liɛ'n yɛ. Ɔ ´tu i klunngbɔ guɛ i kpɔfuɛ'm be su. Tokofi'n i aliɛ b'ɔ di'n yɛlɛ sran nnɛn. I nzue b'ɔ nɔn'n yɛlɛ mmoja. E min'n kun-man be blɛblɛ. Anannganman b'ɔ sie mɛn wunmuan'n ɔ nin be ɔ'a nyɛn i nglo lɔ lika'n nun Efrat nuan su lɔ.

¹¹ Ɔo! Ezipt, wɔ bɔ a ti kɛ talua b'ɔ nian si-man bian le sa'n, ɔli kɔ Galaad lɔ ko fa lɔ nguɛn'n. Man a yo ayre'n sɛ, man a yo i sɛ, ɔ ti ngbɛn. Nán kɛ a wa jaso ti-ɔ.

¹² Ɔ nyin ng'ɔ utuli ase'n, nvle kun nga'm be tili. Ɔ kplinlɛ nga a kplin'n, ɔ lɛ-man lika kun nga b'a ti-man-an. Ɔ sonja'n kun nin i wiengu kun ko bo su kpɛkuun be nnyɔn'n be gua lɛ.

Ezipt i falɛ

¹³ Kɛ Babilɔni famiɛn Nɛbikadnɛzar ´ba Ezipt i falɛ'n, ndɛ nga Anannganman'n kan kleli i nuan ijɔfuɛ Zeremi'n yɛ:

¹⁴ «Be `bo jasin yɛ'n Ezipt mɛn'n nun lɔ. Be `bo i jɔ Migdɔl lɔ. Be `bo i jɔ Nɔf nin Tapanɛs lɔ. Be `se be kɛ: ‹Alɛ'n ɔ'a di amun mantanfuɛ mun, i ti an `ko jranjran. An `siesie amun wun.›

¹⁵ Ai! ?Nguɛ sa ti yɛ be trali ɔ safunyrɛn mun be ɔli sɔ bɔ b'a kwla jran-man nin-ɔn? Anannganman'n yɛ ɔ yili ɔ ase-ɔ.

¹⁶ Ɔ yoli man ɔ sonja'm be nun kpanngban kpa b'a kwla jran-man. Siɛn'n, ndɛ ng'ɔ o bé nuan'n yɛlɛ kɛ: ‹An man e sa e sin é mɛn'n nun, e `wanndi alɛ sroesroe nga bo e wɔ.›

¹⁷ Siɛn'n, nga be kan'n yɛlɛ kɛ: ‹Ezipt famiɛn'n yoli sɔ ngbɛn, ɔ'a kwla-man like fi yo.›

¹⁸ Famiɛn'n bɔ i dunman yɛlɛ Anannganman b'ɔ sie mɛn wunmuan'n i wan yoo: ‹N kan m b'ɔ n wo lɛ titi'n ti. Kɛ Tabɔr oka'n fa ti oka kun nga'm be afiɛn'n kɛ Karmɛl'n fa jin jenvie'n nun zruun'n, i kunngba'n yɛ amun kpɔfuɛ'n ´fa tra amun su-ɔ.

¹⁹ Ɔ man i ti Eziptfuɛ mun, an `wla amun kanga trɔ mun, afin be su wa tra amun kɔ. Nɔf klɔ'n ɔ wa tɔ srolo, be ´wɔ nun, sran kun sa su tran-man su kun.

²⁰ Ezipt'n ti kɛ nannin bla klanman wie sa, kpɛkuun tuin wie fin nglo lɔ lika'n nun ɔ'a bɛ i nɔnlɛ.

²¹ Sonja nga Eziptfuɛ'm be fali be bɔ be tannin be kalɛ'n, be nian-man be lika ngɔwi. Sanngɛ b'a ju-man nun, be kacili bé ja sin wie. Ɔ lɛ-man be nun kun. Cɛn kekle nun'n, kɛ e nin be e yiali nun'n, be jrannin min nyrun-ɔn ɔ'a yo-man ye.

²² Eziptfuɛ'm be kpɔfuɛ'm be ´ba-a, b'a ba-man blɛblɛ. I sɔ'n ti Eziptfuɛ'm be ´wanndi. Kɛ be wanndi be kɔ'n, be nganniɛn nga be tili'n yɛlɛ wuo b'ɔ su wanndi'n i nganniɛn'n. Be kpɔfuɛ'm be ´ba-a, bé sa nun kpɛliɛ. A wun be sa-a, ɔ waan waka kpɛfuɛ mun-ɔn.

²³ Ɔliɛ Ezipt lɔ bo ble'n bɔ be wlu nun-ɔn, ɔ wlu-man'n, Eziptfuɛ sɔ'm be kpɔfuɛ'm be su bubu i nun waka'n. Afin be sɔnnin kekleke, ɔ waan lalo mun-ɔn, be ka be-ɔ ɔ yo-man ye.

²⁴ Eziptfuɛ'm be nyin guali ase. Nglo lɔ lika'n nun nvle'n i nunfuɛ'm b'a fa be b'a yo be liɛ.› »

²⁵ Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n wan yoo: «N tɛ bu amuɛn nga be flɛ i Amɔn'n i fɔ. Yɛ Ezipt mɛn'n nin i amuɛn mun, ɔ nin i famiɛn mun, n ´tu be fɔ. Ezipt famiɛn'n nin sran nga be fa bé wla guɛ i su'n, n ´tu be fɔ.

²⁶ N ´fa be n ´wla be bɔ be kunndɛ be nin wie'n bé sa nun. N ´fa be m man Babilɔni famiɛn Nɛbikadnɛzar nin i sonja mun. Sanngɛ kɛ i sɔ blɛ liɛ'n ko sin'n, Ezipt mɛn'n su ka-man lɛ ngbɛn, sran ´tran nun kɛ laa'n sa.» Anannganman'n yɛ ɔ kan sɔ-ɔ.

Izraɛl nvle ɔ'a fite nun

²⁷ «Izraɛlfuɛ mun, nán srɛ kun amun, amun `yaci usulɛ'n. An `se kɛ sɛ, n su wa de amun mɛn b'ɔ o mmua'n nun lɔ m ´ba. N su wa de amun osu nunfuɛ mun be kanga mɛn'n nun lɔ m ´ba. Zakɔb, a ´sa ɔ sin ba, a ´di alaje, a ´tran fɔuun! Sran fi su kle-man wɔ yalɛ.

²⁸ Anannganman waan: ‹Izraɛlfuɛ mun, bɔ amun ti min sufuɛ mun, nán srɛ kun amun. Mɛn nga n yoli man amun bo sanndili be nun'n, n ´nunnun be. Amun liɛ'n, n su nunnun-man amun. Sa ng'ɔ fata kɛ n fa yo amun'n yɛ n ´fa yo amun-ɔn. Afin n yaci cɛ amun sɔ-ɔ ɔ yo-man ye.› »