Zeremi 44 - NYANMIƐN NDƐ'N 1998

Be nga be ko fiali Ezipt lɔ'n

¹ Anannganman fali ndɛ kun wlali Zeremi nuan kɛ ɔ kan kle Zuif nga be ɔli Ezipt bɔ be tran Migdɔl nin Tapanɛs, nin Nɔf, ɔ nin Patrɔs nvle nun lɔ'n. I waan Zeremi `kan kle be kɛ:

² «Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹?Nyrɛnnɛn sa nga n fa yili Zerizalɛm nin Zida klɔ kun nga mun be su'n bɔ yɛ man andɛ b'a nunnun treketreke'n, amu'an wun-mɛn i?

³ Sa ti bɔ n yoli be sɔ'n, yɛlɛ sa tɛ bɔ be yoli be fa klɔklɔli min'n. Amuɛn nga bé si'm b'a si-man be bɔ be bɔbɔ kusu be si-man be laa'n, be ko yrali ansans mannin be, be sɔli be.

⁴ N sunmannin min sufuɛ'm be kwlaa bɔ be ti min nuan ijɔfuɛ mun bé wun. M'an yaci-man be sunmanlɛ le. N yoli man be seli be kɛ: tete sa'n ɔ ti min ciliɛ, nán amun yo be.

⁵ B'a fa-man bé ti b'a de-man. I sɔ ndɛ liɛ'n guali bé su sin. B'a yaci-man sa tɛtɛ sɔ'n yolɛ, b'a yaci-man amuɛn'm be sɔlɛ.

⁶ I sɔ'n ti, m'an fa-man ya blɛblɛ, min ya'n jueli bé wun kɛ sin sa, ɔ yrali Zida klɔ mun nin Zerizalɛm mmuɛ mun, ɔ man siɛn'n, be wun-man like bɔ klɔ sɔ'm be fɛ i-ɔ, b'a tɔ sɔ srololo. Kɛ e ´ijɔ yɛ'n, sa ng'ɔ o be su'n yɛ ɔ o lɛ-ɔ.› »

⁷ Siɛn'n, Anannganman b'ɔ ti Izraɛl Nyanmiɛn'n b'ɔ sie mɛn wunmuan'n usa kɛ yoo: «?Nguɛ ti yɛ amun bɔbɔ amun yo amún wun tɛ sɔ-ɔ? ?Zida mɛn wunmuan'n i yasua mun o, i bla mun o, i ba kanngan mun o, i ba nɔnman mun o, yɛ amun kunndɛ kɛ be nunnun-ɔn?

⁸ ?Min klɔklɔlɛ yɛ amun waan amun ´klɔklɔ min-ɔn, bɔ i ti yɛ amun wa trannin Ezipt wa be wa yi sraka man amuɛn mun-ɔn? ?Amun kunndɛ kɛ amun nunnun nan asiɛ'n su nvle-nvlefuɛ'm be kwlaa be `yo amun finfin nan amun nyin gua ase?

⁹ ?Sa tɛtɛ nga amún si'm be yoli'n nin nga bɔ Zida famiɛn'm be yoli'n nin nga bé yi'm be yoli'n nin nga amun bɔbɔ amun yoli'n, ɔ nin nga amún yi'm be yoli i Zida mɛn nun'n nin Zerizalɛm mmuɛ'm be nun'n, amun wla yɛ ɔ'a fi su-ɔ?

¹⁰ Lele andɛ, be wie fi koko-mɛn i sa tɛ'm be ti nan se kɛ srolɛ yɛ be ´sro min-ɔn, nan se kɛ be ´fa min mmla nga n fa mannin amun nin amún si mun'n su.»

¹¹ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «I sɔ'n ti, n wa tu mín nyin n ´wɔ amun m ´mlin amun, n ´nunnun Zida nvle wunmuan'n.

¹² Zida nvle'n nun sran onga kan bɔ be kali lɛ bɔ be waan be wu be bla nan san Ezipt yɛ be ´wanndi kɔ'n nan be ´kɔ tran lɔ'n, n ´fa be, be kwlaa be ´wu. Be ´wu Ezipt asiɛ'n su. Sɛ nán alɛ'n yɛ ɔ di be'n, awe'n yɛ ɔ ´kun be-ɔ. Ɔ lɛ-man be nun kun, be kwlaa'n be ´wu kpan. Sɛ sran wie waan ɔ su bo sannzan, sɛ sran wie waan ɔ ´kan sa sroesroe wie ndɛ'n, annzɛ sɛ ɔ su kan like wie b'ɔ lɛ-man nyrun annzɛ b'ɔ yo nyannzuɛn'n i ndɛ'n, amun dunman yɛ ɔ ´bo-ɔ.

¹³ Be bɔ be wanndi bali Ezipt'n, sa nga n fa wlali Zerizalɛmfuɛ'm be nun'n, i kunngba'n yɛ n ´fa wla be nun-ɔn. Alɛ, nin awe, annzɛ kusu tukpacɛ b'ɔ sa ndɛndɛ'n wie yɛ n ´fa yi be su-ɔ.

¹⁴ Sran kun sa su fin-man nun fite-man. Zidafuɛ'm be onga nga be waan be wa tran Ezipt wa nan sɛ ɔ yo-ɔ be ´sa bé sin be ´kɔ Zida'n, be su kwla sa-man bé sin, san be nun kaan sa yɛ be ´sa bé sin-ɔn.»

Tɛ nga be yi man nyanmiɛn su lɔ famiɛn bla'n

¹⁵ Kɛ Zeremi kannin i sɔ ndɛ liɛ'n, yasua nga be o lɛ bɔ be si jrɛin kɛ bé yi'm be yra ansans be man amuɛn mun'n, ɔ nin bla kpanngban nga be o lɛ'n, man e kpɛ kpo e se kɛ be kwlaa nga be ko trannin Patrɔs Ezipt mɛn nun'n, be tɛli i su kɛ:

¹⁶ «Ndɛ nga ɔ waan Anannganman'n ɔ'a fa wla ɔ́ nuan kɛ a `kan kle ye yɛ'n, e su fa-man su.

¹⁷ E liɛ nga e waan e ´yo'n yɛ e ´yo-ɔ. E ´yra ansans'n e ´man nyanmiɛn su lɔ famiɛn bla'n. E ´gua nzan e ´mɛn i kɛ e nin é si mun e fa yo i titi'n sa, e yo i kɛ e famiɛn mun nin e famiɛn i awlo lɔ sran dandan mun be fa yo i Zida klɔ'm be su nin Zerizalɛm mmuɛ'm be nun'n sa. Laa bɔ e yo i sɔ'n, e mian-man aliɛ wun, ninnge'n sin yia ye, e nun-man nyrɛnnɛn nun kɛ nga sa.

¹⁸ Kɛ ɔ fin cɛn bɔ e yacili i sɔ ninnge'm be yolɛ'n, yɛ y'a nyan-man like fi kun, yɛ alɛ'n dili ye-ɔ, yɛ awe'n sɔtɔli e kun lɛ-ɔ.»

¹⁹ Yɛ bla'm be waan: «?I kpa'n, ansans nga e yra e man nyanmiɛn su lɔ famiɛn bla'n lɛ'n, e nin é wun mun e bo ti-man kun yɛ e yo-ɔ? ?Gato nga e ´tɔn bɔ e fa nyanmiɛn su lɔ bla sɔ'n i nzɔliɛ'n sie su'n nin nzan nga e gua e mɛn i'n, nán be nyrun yɛ e yo i-ɔ?»

²⁰ Yɛ Zeremi kannin ndɛ kleli sran sɔ'm be kwlaa bɔ be kannin i sɔ ndɛ liɛ'n, i yasua mun o, i bla mun o, ɔ seli be kɛ:

²¹ «?Ansans nga amun nin amún si, nin amun famiɛn, nin amun famiɛn i awlo lɔ sran dandan mun, ɔ nin amun mɛn'n nunfuɛ mun amun yrɛli i Zida mɛn'n nun nin Zerizalɛm mmuɛ'm be nun'n, nɛ́n i yɛ ɔ o Anannganman klun yɛ ɔ yoli i ngasi nin-ɔn?

²² ?Nán amun aeliɛ tɛ sɔ'n nin amun tete sa sɔ'm be ti yɛ Anannganman nin amun b'a sɔn-man yɛ man amun mɛn'n boli bɔ ɔ'a saci mlɔnmlɔn nin-ɔn? ?Nán sa sɔ'm be ti yɛ man ɔ'a tɔ nvati andɛ lɛ-ɔ?

²³ Nyrɛnnɛn nga ɔ'a tɔ amun su andɛ yɛ'n, i bo'n yɛlɛ ansans nga amun yrɛli i'n nin sa nga amun yoli b'ɔ loli Anannganman'n i ngasi'n, nin i nuan su ndɛ bɔ amu'an tie-man'n, ɔ nin i mmla fanunfanun b'ɔ amu'an fa-man be su'n.»

²⁴ Zeremi kan guali su kleli be kwlaa, be bla o, be yasua o, ɔ seli be kɛ: «Zidafuɛ nga amun wo Ezipt mɛn'n nun yɛ'n, ndɛ yɛ Anannganman'n ´kɛn i yɛ, man amún su'n ti.

²⁵ Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹Ndɛ'n fiteli amún yi'm bé nuan, amun bɔbɔ kusu, amu'an kan gua su kɛ be lu i be blo i, nda nga amu'an tɛ i kɛ amun ´yra ansans be ´man nyanmiɛn su famiɛn bla'n nan amun ´gua nzan be mɛn i'n, san i yolɛ cɛ yɛ amun ´yo-ɔ. Kɛ amu'an kɛn i lɛ'n, ɔ lɛ-man kɛ amun ´kaci i.

²⁶ Ndɛ nga Anannganman'n kusu kan'n yɛ ɔ o yɛ. Amun kwlaa amun `sie amún su tie. I waan: N kan m bɔbɔ min Nyanmiɛn kpli'n min ti kɛ yoo: amun Zidafuɛ nga amun wo Ezipt wa yɛ'n, nán amun fa min dunman be ta nda kɛ n kan Anannganman Nyanmiɛn kpli'n kun.

²⁷ N su yo-man amun kpa mlɔnmlɔn, nyrɛnnɛn yɛ n ´fa yi amun su-ɔ. Amun Zidafuɛ nga amun wo Ezipt wa yɛ'n, wie'n ´kun amun kwlaa kpan! Sɛ nán alɛ'n yɛ ɔ di amun'n, awe'n yɛ ɔ ´kun amun-ɔn.

²⁸ San sran ba nnyɔn kun yɛ alɛ'n su di-man be yɛ be ´wanndi Ezipt lɔ be ´ba Zida mɛn'n nun-ɔn. Sanngɛ Zidafuɛ kaan nga be kali'n bɔ be wanndi bali kɛ be wa fia Ezipt'n, be wa wun sran nga i ndɛ liɛ'n kpɛnnin su'n, sɛ be liɛ nin o, sɛ kusu min liɛ nin o.

²⁹ Kɛ ɔ ko yo nan amu'an wun kɛ nyrɛnnɛn sɔ'n ɔ ´nyan amun sakpa'n, n wa man amun nzɔliɛ kun. Nzɔliɛ sɔ'n yɛ:

³⁰ N wa fa Ezipt famiɛn Ofra n ´wlɛ i i kpɔfuɛ nga be kunndɛ i nin wie'n bé sa nun. N wa fɛ i n ´wla bé sa nun kɛ n fali Zida famiɛn Sedesias n wlali Babilɔni famiɛn Nɛbikadnɛzar b'ɔ kunndɛ i nin wie'n i sa nun'n sa.› » Anannganman'n yɛ ɔ kan sɔ-ɔ.