Zeremi 42 - NYANMIƐN NDƐ'N 1998

Be nga be kali lɛ be Zeremi wun wunlɛ

¹ Kpɛkuun sonja akpasua kunngun'm be kpɛn'm be kwlaa, ɔliɛ Kareak i wa Zosanan nin Ose i wa Azaria, ɔ nin sran nga be o lɛ'n be kwlaa be wa toli Nyanmiɛn nuan ijɔfuɛ Zeremi nan b'a se i kɛ:

² «E bali wɔ like srɛlɛ, i ti-ɔ, nian e nyrun. Srɛ Anannganman ɔ Nyanmiɛn'n man ye. Laa e sɔnnin kpa, sanngɛ e nga y'a ka'n yɛlɛ e kaan ng'ɔ bɔbɔ nyin ta e yɛ'n.

³ I ti-ɔ, se Anannganman ɔ Nyanmiɛn'n kɛ ɔ kle ye atin nga e ko fa su'n, yɛ ɔ kle ye like nga e ko yo'n.»

⁴ Zeremi waan: «An kɛn i sɔ-ɔ, n tili. N wa srɛ Anannganman amun Nyanmiɛn'n. I kwlaa ng'ɔ kan'n, n ´kan kle amun n su fia-man wie fi sa su.»

^5-6 Be kusu be waan: «Anannganman'n ti e lalofuɛ. Sa nga i waan e `yo'n, sɛ i yolɛ ti kekle o, sɛ ɔ ti pɔpɔ o, kɛ e bɔbɔ y'a se wɔ kɛ a wun i wun man e yɛ'n, san i yolɛ cɛ yɛ e ´yo-ɔ. E ´yo nga Anannganman e Nyanmiɛn'n kan'n nan y'a di alaje.»

⁷ Kɛ ɔ yoli sɔ'n, cɛn ngwlan sinnin, i le blu'n su'n, Anannganman tɛli Zeremi su.

⁸ Zeremi flɛli Kareak i wa Zosanan nin sonja akpasua kun mun, ɔ nin sran nga be o lɛ'm be kwlaa kpan.

⁹ Ɔ seli be kɛ: «Amun sunmannin min kɛ n usa Anannganman b'ɔ ti Izraɛl Nyanmiɛn'n i sa m `man amun. N usɛli i, ɔ tɛli min su kɛ yoo:

¹⁰ ‹Sɛ an ka amun mɛn'n nun wa'n, n ´wla amun mɛn'n i bo ase, n su saci-mɛn i. N ´taka amun, n su tu-man amun bo. N ´kaci mín sa. Sa nga n yoli amun'n, n ´yaci i yolɛ.

¹¹ Amun `yaci Babilɔni famiɛn'n i srolɛ. M bɔbɔ min Anannganman'n yɛ n kan kle amun-ɔn. Nan an sro i, afin n jin amun sin. N ´de amun, n ´de amun i sa nun.

¹² N'yo man ɔ ´si amun aunnvuɛ, amun ´yo i annvɔ, kpɛkuun ɔ ´fa amun ninnge mun man amun.›

¹³ Nan sɛ amun se kɛ: ‹Cɛcɛ e su ka-man mɛn nga nun wa›, nan sɛ amu'an fa-man Anannganman b'ɔ ti amun Nyanmiɛn'n i ndɛ'n su'n,

¹⁴ sɛ an se kɛ: ‹E ´kɔ Ezipt, lɔ liɛ'n e su wun-man alɛ'n, e su ti-man alɛ awɛ'n bɔ be bo'n i ngan, lɔ liɛ'n e su la-man awe, i ti-ɔ lɔ yɛ e ´ko tran-an,

¹⁵ amun bɔ amun ti Zidafuɛ'm be onga'n amun `tie i kpa, Anannganman b'ɔ sie mɛn wunmuan'n, Izraɛl Nyanmiɛn'n waan n `se amun kɛ yoo: sɛ amun waan san Ezipt'n yɛ amun ´wanndi be ´kɔ ko tran'n,

¹⁶ alɛ bɔ yɛ amun sro i'n, ɔ ´kun amun Ezipt mɛn'n nun lɔ. Awe bɔ amun sro i'n, ɔ ´nyan amun Ezipt mɛn'n nun lɔ, amun ´wu lɔ.

¹⁷ Be kwlaa nga be waan san cinnjin nan be ´kɔ Ezipt be ko fia'n, sɛ alɛ ɔ'a di-man be'n, awe'n ´kun be, be ´sie be. Sɛ awe'n ɔ'a kun-man be'n, tukpacɛ b'ɔ sa ndɛndɛ'n ´kun be. Be wie fi sa su ka-man lɛ. Sa nga n ´fa yi be su'n, be wie fi sa su ´fin-man nun fite-man.› »

¹⁸ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Kɛ min ya dan'n kplo guali Zerizalɛmfuɛ'm be su'n yɛ ɔ ´kplo gua be nga be waan be kɔ Ezipt'n be su-ɔ. Sran'm be ´yo amun finfin: sɛ be waan be su bo sannzan'n, sɛ be ´kan sa sroesroe wie ndɛ'n annzɛ be su kan like wie b'ɔ lɛ-man nyrun annzɛ b'ɔ yo nyannzuɛn'n i ndɛ'n, amun dunman yɛ be ´bo-ɔ, yɛ amun su wun-man lika nga kun.»

¹⁹ Zeremi kɛnnin i ekun kɛ: «Amun bɔ amun ti Zidafuɛ'm be onga'n, Anannganman'n kan ndɛ kle amun. I waan nán amun wɔ Ezipt, amun tie i kpa, yɛ n ´kan kle amun kpongbogbo ndɛ yɛ.

²⁰ Amun bu i kɛ sran yɛ amun su lɛkɛ i-ɔ! Amun bɔbɔ yɛ amun su laka amun wun-ɔn! Afin amun wa seli min kɛ: ‹Yaci, srɛ Anannganman e Nyanmiɛn man ye nan i kwlaa ng'ɔ bua wɔ'n kan kle ye.

²¹ E ´niɛn i kwlaa'n su e ´yo.› Andɛ, ndɛ ng'ɔ fa wlali min nuan'n kɛ n kan kle amun'n, n kan-an, nɛ́n i tielɛ yɛ amun ko tie-ɔ nan se kɛ i su falɛ yɛ amun ´fa-a.

²² I sɔ'n ti, man amun `si weiin kpa kɛ mɛn nga amu'an wu i ti kɛ amun ´ko fia nun lɔ'n, sɛ alɛ ɔ'a di-man amun'n, awe'n ´kun amun. Sɛ awe ɔ'a kun-man amun'n, tukpacɛ b'ɔ sa ndɛndɛ'n ´kun amun lɔ.»