Zeremi 41 - NYANMIƐN NDƐ'N 1998

¹ Anglo nso su'n, Elisama i wa Nɛtania i klun ba Ismaɛl b'ɔ ti famiɛn i osufuɛ'n b'ɔ ti i awlo'n lɔ sran dandan'm be nun kun'n, ɔ nin sran blu be wa toli Asikam i wa Gɛdalia Mizpa lɛ. Be nin Gɛdalia be dili like.

² Kpɛkuun yɛ Ismaɛl nin i sran blu mun be jasoli be wɔli i kue be kunnin i-ɔ. Nian sran bɔ Babilɔni famiɛn'n ɔ'a fɛ i ɔ'a sie i mɛn'n su'n yɛ Ismaɛl kunnin i-ɔ.

³ Zidafuɛ'm be kwlaa bɔ be nin Gɛdalia be o Mizpa lɛ'n ɔ nin Babilɔni sonja nga be o lɛ'n, Ismaɛl kunnin be ekun.

Ismaɛl i sran ablaɔcuɛ kunlɛ

⁴ Kɛ be kunnin Gɛdalia'n b'ɔ ´di le nnyɔn'n, wuun sran fi nian ti-man nun.

⁵ Sran ablaɔcuɛ be fin Sisɛm nin Silo, ɔ nin Samari be su ba lɛ. Be ´ba-a, b'a yi be akanza'n, b'a titi be wun tralɛ'm be nun, b'a bobo bé wun kannin. Be fali ble nin ansans kɛ be wa fa man Nyanmiɛn i sua'n nun Zerizalɛm lɔ.

⁶ Yɛ Ismaɛl fin Mizpa fite bali be atin kpalɛ-ɔ. Ɔ ´ba-a, wuun ɔ ´sun. Ɔ ko toli be kpɛkuun ɔ seli be kɛ yoo: «An `bla e wɔ Gɛdalia awlo lɔ.»

⁷ Kɛ bɔ be ko juli klɔ'n i afiɛn lɔ sɛsɛ'n, Ismaɛl nin i sran mun be kunnin be flɛnnɛn nan b'a fa be fuɛn'n b'a guɛ i nzue gbo kun nun.

⁸ Sran sɔ'm be nun blu be seli Ismaɛl kɛ: «Y'a fa ɔrz nin ngo, ɔ nin awɛma nzue y'a fiɛ i bo'n nun lɔ, i ti nán kun ye.» Ɔ man be liɛ'n, ɔ yacili be lɛ ɔ'a kun-man be wie.

⁹ Nzue gbo nga famiɛn Aza nin Izraɛl famiɛn Baɛsa be ´kun alɛ bɔ Aza man be kpɛli'n, i nun yɛ Ismaɛl guali sran nga Gɛdalia dunman nun ti ɔ kunnin be'n be fuɛn nin-ɔn. Fuɛn'n yili nzue gbo sɔ'n.

¹⁰ Kɛ ɔ yoli sɔ'n, Ismaɛl trali sran nga be o Mizpa lɛ'n be kwlaa ɔli. Ɔ fali famiɛn i mma mmla mun, ɔ nin be kwlaa nga Nɛbizaradan b'ɔ ti gladifuɛ'm be kpɛn'n fali be wlali Gɛdalia i sa nun'n mun ekun. I sin Ismaɛl fali sran sɔ mun sinnin Amɔnfuɛ'm be lɔ ɔli.

Sran nga Ismaɛl wlali be bisua'n bé ti nyanlɛ

¹¹ Kareak i wa Zosanan nin sonja kpɛn nga be o i wun lɛ'n be tili sa tɛ nga Nɛtania i wa Ismaɛl yoli'n.

¹² Yɛ be ´fa be sran'm be kwlakwla yɛ be nin Ismaɛl be ´kɔ kunlɛ-ɔ. Be ´kɔ-ɔ, Ismaɛl yɛ ɔ o Gabaɔn fɛtɛ dan'n nuan yɛ.

¹³ Kɛ sran nga Ismaɛl trali be Mizpa ɔli'n be wunnin Zosanan nin sonja kpɛn nga be o i sa nun'n, be klun jɔli.

¹⁴ Kpɛkuun be kwlaa be kaci ɔli Zosanan sin.

¹⁵ Nan Ismaɛl nin sran mɔcuɛ b'a wanndi b'a ɔ Amɔnfuɛ'm be mɛn'n nun lɔ.

¹⁶ Kpɛkuun Zosanan nin sonja kpɛn nga be o i sa nun'n, be fali sran nga kɛ Ismaɛl kunnin Gɛdalia'n ɔ trali be Mizpa ɔli'n. Be deli be Ismaɛl sa nun Gabaɔn lɔ be sali bé sin. Sran sɔ mun'n, sonja o be nun, bla o be nun, ba kanngan'm be o be nun, sran nga be sɛli be'n be o be nun.

¹⁷ Be fɛli i Gabaɔn lɔ be wa jrannin Kimam b'ɔ ti sikewlɛ lika'n nun lɛ Bɛtleɛm wun lɛ. Kɛ be fɛ i lɛ'n, be waan be ´kɔ Ezipt.

¹⁸ Afin srɛ kun be Babilɔnifuɛ'm bé wun. Kɛ ɔ fin cɛn bɔ Ismaɛl kunnin Gɛdalia bɔ Babilɔni famiɛn'n fɛ i sieli i mɛn'n su'n, srɛ kunnin be Babilɔnifuɛ'm bé wun.