Zeremi 40 - NYANMIƐN NDƐ'N 1998

Zeremi i Mizpa lɔ tranlɛ

¹ Kɛ Nɛbizaradan b'ɔ ti gladi difuɛ kpɛn'n man Zeremi ɔli Rama'n, i sin Anannganman kannin ndɛ kleli Zeremi. Kɛ be ´ko fa Zeremi'n, wuun jrɔkɔ o i sa, ɔ o Zerizalɛmfuɛ mun nin Zidafuɛ nga be ´fa be kɔ Babilɔni'n be nun.

² Gladi difuɛ kpɛn'n man be ko fali Zeremi bali nan ɔ'a se i kɛ: «Nyrɛnnɛn sa nga ɔ'a ju klɔ nga su yɛ'n, Anannganman ɔ Nyanmiɛn'n ɔ boli su.

³ Sa ti bɔ i sɔ sa'n juli amun su sakpa'n yɛlɛ fɔnlɛ bɔ amun fɔnnin Anannganman wun'n, yɛlɛ i ndɛ bɔ amu'an fa-man su'n.

⁴ Ndɛ'n, jrɔkɔ ng'ɔ o ɔ́ sa'n yɛ n su wa yi i yɛ. Sɛ ɔ klun klo su kɛ a nin min ´kɔ Babilɔni'n, e wɔ. N ´nian wɔ lika. Sɛ kusu kɔlɛ yo-man wɔ fɛ'n, ngasi nun-man nun. Lika'n yɛ ɔ nannan yɛ, kan a klo kɛ a ´kɔ'n, kɔ.»

⁵ Zeremi o lɛ, ɔ tɛ-mɛn i su, yɛ Nɛbizaradan seli i kɛ: «Kɔ Safan i wa Asikam i wa liɛ Gɛdalia bɔ Babilɔni famiɛn'n fɛ i sieli Zida klɔ'm be su'n i sin. A nin i nin Zidafuɛ'm be `tran lɔ. Annzɛ lika kwlaa nga ɔ waan a ´kɔ'n, kɔ.» Nan gladi difuɛ kpɛn'n ɔ'a mɛn i aliɛ nan ɔ'a cɛ i ninnge mun, yɛ ɔ mɛnnin i atin ɔ ɔli-ɔ.

⁶ Zeremi ɔli Asikam i wa Gɛdalia sin Mizpa lɔ. Ɔ nin i be trannin Zidafuɛ nga be kali lɛ'n bé wun lɛ.

Zidafuɛ'm bé bo kun yolɛ

⁷ Sonja kpɛnngbɛn nga be o blo lɔ'n, be nin be sonja mun be tili i kɛ Asikam wa Gɛdalia yɛ Babilɔni famiɛn'n fɛ i sieli mɛn'n su-ɔ, nan yalɛfuɛ nga b'a fa-man be b'a ɔ-man Babilɔni'n, i yasua o, i bla o, i ba kanngan o, ɔ fali be mɛnnin i.

⁸ Yɛ be wa to Gɛdalia Mizpa lɛ-ɔ. Sonja kpɛnngbɛn nga be bali sɔ mun yɛlɛ: Nɛtania i wa Ismaɛl, nin Kareak i wa nnyɔn'n: Zosanan yɛ Zonatan, nin Tanimɛt i wa Sɛraza, nin Efai b'ɔ fin Nɛtofa'n i mma mun, ɔ nin Zɛzania b'ɔ ti Maakafuɛ'n.

⁹ Gɛdalia kannin ndɛ kleli be nin be sran mun, ɔ seli be kɛ yoo: «Nán srɛ kun amun, an su Babilɔnifuɛ mun, an `ka e mɛn'n nun wa an su Babilɔni famiɛn'n, amun ´nyan amun ti.

¹⁰ N wo min liɛ Mizpa wa. Babilɔnifuɛ nga be ´ba e mɛn'n nun wa'n, n wo wa n ´sɔ be nun. Amun kusu an `ko yi nzan nin ngo, an `ti waka mma mun, amun `fa be sie amun like siewlɛ'm be nun, nan an `tran klɔ nga an fali be'n be su.»

¹¹ Zidafuɛ nga be tran Moab, nin Amɔnfuɛ mun, nin Edɔmfuɛ'm be mɛn'n nun'n, be kusu be tili i kɛ Babilɔni famiɛn'n yacili sran'm be wie Zida mɛn'n nun nan ɔ fali Safan i wa Asikam i wa liɛ Gɛdalia fa sieli be su.

¹² Yɛ be kwlakwla sɔ'n be ´fin lika kunngun nga be bo sanndili nun'n nun be ´ba Zida mɛn'n nun be wa to Gɛdalia Mizpa lɔ-ɔ. Be nzan nin be waka mma nga be ko nyɛnnin i, ɔ ti-man ngowa.

Gɛdalia i kunlɛ

¹³ Le kun Kareak i wa Zosanan nin sonja kpɛn nga be o blo lɔ be wa toli Gɛdalia Mizpa lɛ.

¹⁴ Be seli i kɛ: «?Kɛlɛ a si kɛ Baali b'ɔ ti Amɔn famiɛn'n ɔ'a sunman Nɛtania i wa Ismaɛl kɛ ɔ wa kun wɔ?» Gɛdalia ɔ'a fɛ-mɛn i ti ɔ'a de-man.

¹⁵ Zosanan bɔbɔ ɔ fia wa toli Gɛdalia Mizpa lɔ, nan ɔ'a se i kɛ: «Jran man n ko kun Ismaɛl sɔ'n ke! N ´kun i sa bɔ sran fi su si-man kɛ wɔ yɛ man be kunnin i-ɔ. Ɔ'a yo-man sɔ-ɔ, ɔ wa kun wɔ sa sɔ ngbɛn kpɛkuun Zidafuɛ nga be o ɔ wun wa yɛ'n be kwlaa be wa bo be sanndi ekun, ɔ man Zida mɛn'n ´mlin.»

¹⁶ Gɛdalia ko tɛli Zosanan su kɛ yoo: «Nán tɔn Ismaɛl suɛn kun i ngbɛn!»