Zeremi 39 - NYANMIƐN NDƐ'N 1998

¹ Sedesias i Zida sielɛ'n i afuɛ ngwlan'n i anglo blu'n su yɛ Nɛbikadnɛzar b'ɔ ti Babilɔni famiɛn'n nin i sonja'm be kwlakwla be wa kpɛli be ngblaliɛ Zerizalɛm klɔ wun-ɔn.

² Sedesias i sielɛ'n i afuɛ blu-nin-kun'n i anglo nnan'n i cɛn ba ngwlan su yɛ be fitili klɔ i wun talɛ nin-ɔn.

³ Kpɛkuun Babilɔni famiɛn'n i awlo lɔ sran dandan'm be kwlaa be wa trannin anuan nga be flɛ i kɛ klɔ Afiɛn Anuan'n nun. Be flɛ sran dan sɔ'n kun Nɛrgal-Sarɛzɛr. Ɔ ti awlo lɔ sran dandan'm be nun dan'n kun. Be flɛ kun kɛ Samgar-Nɛbi, yɛ kun suan Sarsɛkim, i yɛ ɔ ti famiɛn'n i sran b'ɔ lafi i su kpa nin-ɔn. Babilɔni famiɛn'n i awlo lɔ sran dandan'm be kwlakwla be bali lɛ wie.

⁴ Kɛ Sedesias b'ɔ ti Zida famiɛn'n nin alɛ kunfuɛ'm be wunnin be'n, be lɛ wanndilɛ. Kɔnguɛ be fin klɔ'n nun fiteli. Be fali famiɛn'n i fie su atin'n, kpɛkuun be ko sinnin talɛ nnyɔn'm be afiɛn anuan'n nun, kpɛkuun be fali Zurdɛn tɔnun'n nun atin'n.

⁵ Babilɔni sonja'm be suli be su. Kan be ko trali Sedesias'n yɛlɛ Zeriko lika kpɛtɛkplɛɛ nun. Nan b'a trɛ i b'a fɛ i b'a ba Nɛbikadnɛzar sin Ribla, Amat mɛn'n nun. Nan sa fanunfanun nga Nɛbikadnɛzar ko fa ko yo i'n, ɔ'a fa yo i.

⁶ Babilɔni famiɛn'n man be kpɛli Sedesias i mma'm be kwlakwla be kɔmin i nyrun lɛ. Ɔ man be kpɛli Zida kpɛnngbɛn'm be kwlakwla be kɔmin wie.

⁷ Kpɛkuun ɔ man be boboli Sedesias nyinma mun nan b'a fa jrɔkɔ b'a ci i klɛnnɛnklɛnnɛn b'a fɛ i b'a ɔ Babilɔni.

⁸ Babilɔnifuɛ'm be wɔli famiɛn sua'n nin klɔ'n nun sua'm be nun. Yɛ be bubuli klɔ'n wun talɛ'n.

⁹ Klɔ'n nunfuɛ nga be kali klɔ'n nun lɛ'n be nga be fali bé wun ko mannin Babilɔnifuɛ mun'n, ɔ nin ajuin difuɛ mun'n, Nɛbizaradan b'ɔ ti gladi difuɛ'm be kpɛnngbɛn'n fali be ɔli.

¹⁰ Sran ng'ɔ yacili be Zida mɛn'n nun lɛ'n yɛlɛ yalɛfuɛ mun, bɔ be lɛ-man like'n. Ɔ cɛcɛli be vinyi fie nin fie uflɛ wie mun.

Zeremi i nun yacilɛ

¹¹ Sa nga Nɛbikadnɛzar b'ɔ ti Babilɔni famiɛn kan kleli Nɛbizaradan b'ɔ ti gladi difuɛ'm be kpɛnngbɛn kɛ be `fa yo Zeremi'n yɛ. I waan:

¹² «Ko fɛ i nan niɛn i lika. Nán yo i tɛ, like kwlaa ng'ɔ usa wɔ'n, `yo mɛn i.»

¹³ Ɔ man Nɛbizaradan b'ɔ ti gladi difuɛ'm be kpɛnngbɛn'n nin Nɛbisazban b'ɔ ti famiɛn i sran b'ɔ lafi i su kpa'n, nin Nɛrgal Sarɛzɛr b'ɔ ti sonja'm be kpɛnngbɛn'n, ɔ nin Babilɔni famiɛn'n i sonja kpɛnngbɛn'm be kwlaa

¹⁴ be sunmannin sran ko fali Zeremi gladi awlo'n nun lɔ, be fɛli i mannin Safan i wa Asikam i klun ba liɛ Gɛdalia kɛ ɔ `fɛ i fa ɔ i awlo. Ɔ man Zeremi nin klɔ'n nunfuɛ mun yɛ be trannin lɛ-ɔ.

Ebɛd-Melɛk i wun ndɛ

¹⁵ Kɛ Zeremi tɛ o gladi awlo nun lɔ'n, Anannganman'n kannin ndɛ kleli i. Ɔ seli i kɛ:

¹⁶ «Se Ebɛd-Melɛk b'ɔ ti Etiopifuɛ'n kɛ: ‹Min Anannganman bɔ n sie mɛn wunmuan'n, bɔ n ti Izraɛl Nyanmiɛn'n, min wan yoo: Sa nga n kannin'n, nán cenjele sa-a. Nyrɛnnɛn sa nga n kannin kɛ n ´fa yi i klɔ nga su'n, ɔ'a wie ju ɔ'a wie, ɔ ´yo ɔ nyrun.

¹⁷ Sanngɛ n ´de wɔ, be su tra-man wɔ wla-man be bɔ a sro be'n be sa nun. M bɔbɔ min Anannganman'n yɛ n kan sɔ-ɔ.

¹⁸ N ´yo man a ´fite nun. Alɛ'n su di-man wɔ. Min su bɔ a lafili'n ti'n, a ´nyan ɔ́ ti.› » Anannganman'n yɛ ɔ kan sɔ-ɔ.