Zeremi 38 - NYANMIƐN NDƐ'N 1998

Zeremi i nzue gbo nun yilɛ

¹ Matan i wa Sɛfatia nin Pasir i wa Gɛdalia, nin Selemia i wa Zikal, ɔ nin Malkiza i wa Pasir be tili kɛ Zeremi kan kleli sran'm be kɛ:

² «Anannganman'n wan yoo: ‹Sran kwlaa ng'ɔ ka klɔ nga nun wa'n, alɛ'n ´di i. Sɛ alɛ'n ɔ'a di-mɛn i-ɔ, awe'n ´kun i, ɔ ´wu. Sɛ awe'n ɔ'a kun-mɛn i'n, tukpacɛ b'ɔ sa ndɛndɛ'n ´kun i. Sran nga kusu b'ɔ jaso klɔ'n nun wa ɔ fɛ i wun ko man Babilɔnifuɛ mun'n, i wun fouun! I liɛ ng'ɔ ko nyɛn i'n yɛlɛ i nguan'n.› »

³ Zeremi kɛnnin i ekun kɛ: «Anannganman'n wan yoo: ‹Klɔ nga, sán Babilɔni famiɛn'n i sonja'm be ´fa.› »

⁴ Kɛ famiɛn'n i awlo lɔ sran dandan sɔ'm be tili i sɔ'n, be seli famiɛn'n kɛ: «Yasua nga, ɔ nin wulɛ yɛ ɔ fata-a. Afin ndɛ ng'ɔ kan be'n, be bubu sonja kanngan bɔ be ka'n, ɔ nin Zidafuɛ'm bé sa sin. Yasua nga kunndɛ-man kɛ nvle nga yo kpa. Sa tɛ yɛ ɔ sunnzun i nin i-ɔ.»

⁵ Famiɛn Sedesias tɛli be su kɛ: «I yɛ ɔ o lɛ-ɔ, like nga amun waan amun ´fa yo i'n, an `fa yo i. Afin n ti famiɛn sɔ, sanngɛ amun yɛ an kwla-a.»

⁶ Yɛ be ´fa Zeremi be ´yi i famiɛn'n i wa Malkiza i nzue gbo ng'ɔ o gladi difuɛ'm be awlo nun'n i nun-ɔn. Be fali nyanman be cili i yɛ be jrɛli i nun-ɔn. Kɛ ɔ ´yo sɔ'n, wuun nzue nun-man nzue gbo sɔ'n nun, sanngɛ nnɔtiɛ yɛ o nun-ɔn. Ɔ man Zeremi mlɔnnin nnɔtiɛ nun bɔ lɔuun kpa!

⁷ Etiopifuɛ kun be flɛ i kɛ Ebɛd-Melɛk, ɔ ti sran dan kun famiɛn i awlo nun lɔ, ɔ tili i kɛ b'a fa Zeremi b'a yi i nzue gbo'n nun. Kɛ ɔ ´yo sɔ'n wun famiɛn'n ti anuan nga be flɛ i Bɛnzamɛn anuan'n nun lɛ.

⁸ Yɛ Ebɛd-Melɛk fɛli i famiɛn'n i awlo nun lɔ ɔ wa toli famiɛn'n nin-ɔn, nan ɔ'a se i kɛ:

⁹ «Nannan, be nga be fali Zeremi yili i nzue gbo nun'n, b'a yo-man sa kpa mlɔnmlɔn. Sɛ ɔ ka lɔ-ɔ, awe'n ´kun i, ɔ ´wu, afin kpaun ba kun sa nun-man klɔ'n nun kun.»

¹⁰ Yɛ famiɛn'n seli Ebɛd-Melɛk kɛ: «Fa sran ablasan wa, an `wɔ an `ko yi Nyanmiɛn nuan ijɔfuɛ Zeremi ndɛndɛ, ɔ'a yo-man sɔ-ɔ, ɔ ´wu.»

¹¹ Yɛ Ebɛd-Melɛk fali sran mun-ɔn, nan b'a ɔ famiɛn'n i awlo lɔ i sua ba nga i nun yɛ ɔ sie i ninnge kpakpa mun'n nun lɔ-ɔ. Be ko fali tralɛ nvuɛn-nvuɛn nga b'a titi'n nan b'a fa be nin nyanman mun b'a fa jra nzue gbo'n nun b'a man Zeremi.

¹² Etiopi bian Ebɛd-Melɛk seli Zeremi kɛ: «Fa tralɛ nvuɛn-nvuɛn mun sie ɔ nvlaan bo, fa be yo nyanman'm bé bo annyre.» Nan Zeremi ɔ'a nian su ɔ'a yo.

¹³ Nan b'a cuɛn nyanman'n, nan b'a yi Zeremi nzue gbo'n nun b'a fite. Kpɛkuun Zeremi kali gladi awlo'n nun lɛ.

Sedesias nin Zeremi be yalɛ kokolɛ

¹⁴ Famiɛn Sedesias sunmannin sran kɛ ɔ ko flɛ Nyanmiɛn nuan ijɔfuɛ Zeremi. Kɛ Zeremi bali'n, ɔ nin i be ɔli klɛ nun Anannganman i sua'n nun wluwlɛ'n i nsan su'n nun lɔ. Nan famiɛn'n ɔ'a se i kɛ: «N waan n usa wɔ sa kun. Nga a wun i-ɔ, kan, nán fia su.»

¹⁵ Yɛ Zeremi usali Sedesias kɛ: «?Sɛ m'an fia-man like fi su mlɔnmlɔn nan n kan kle wɔ'n, a su ko kun-man min? N si kɛ sɛ m man wɔ afɔtuɛ-ɔ, a su fa-man ɔ su tie-man o!»

¹⁶ Yɛ famiɛn Sedesias tali nda ɔ nin Zeremi be sran nnyɔn'n be nyrun lɛ kɛ: «N kan Anannganman, i b'ɔ jrali min'n, n su kun-man wɔ. Yɛ kusu n su fa-man wɔ n wla-man be nga be kunndɛ kɛ be kun wɔ'm be sa nun.»

¹⁷ Yɛ Zeremi seli Sedesias kɛ: «Anannganman b'ɔ sie mɛn wunmuan'n, Izraɛl Nyanmiɛn'n i nuan su ndɛ'n yɛ. I waan: ‹Sɛ a fin klɔ'n nun fite nan a fa ɔ wun ko man Babilɔni famiɛn'n i awlo lɔ sran dandan mun'n, ɔ́ wun fouun! Yɛ kusu be su wɔ-man klɔ nga nun. A nin wɔ awlofuɛ mun amun ´fite nun.

¹⁸ Sanngɛ sɛ a fite-man a ko fa-man ɔ wun a wla-man Babilɔni famiɛn'n i awlo lɔ sran dandan'm bé sa nun'n, Babilɔnifuɛ'm be ´fa klɔ'n be ´wɔ nun. Kusu a su fin-man nun fite-man.› »

¹⁹ Famiɛn Sedesias tɛli i su kɛ yoo: «Zuif nga be sinnin Babilɔnifuɛ'm bé sin'n, be ti yɛ srɛ kun min-ɔn. Sɛ n yo sɔ-ɔ, be ko fa min be ko wla bé sa nun be ko yo min tɛtɛ.»

²⁰ Zeremi tɛli i su kɛ: «Be su fa-man wɔ be wla-man bé sa nun. Ndɛ nga Anannganman'n kan'n, ɔ li fa ɔ́ su tie. Sɛ a fa ɔ́ su tie'n, ɔ ´uka wɔ, a ´fite nun.

²¹ Sanngɛ sɛ ɔ waan a fa-man ɔ wun ko man-man be'n, Anannganman'n waan n `se wɔ kɛ yoo:

²² ‹Bla nga be ka Zida famiɛn'n i awlo nun'n, be ´fa be kwlaa be ko man Babilɔni famiɛn'n i awlo lɔ sran dandan mun. Kpɛkuun bla sɔ'm be wa se wɔ kɛ yoo: Be nga be kannin fɔundi ndɛ kleli wɔ'n, be sili wɔ laka o, nja. Be nyannin wɔ. Be lakali wɔ lele bɔ be ´nian-an a wun-man ɔ wun fɛ'n, kpɛkuun b'a yi bé ja.

²³ Be ´tra ɔ́ bo bla nin ɔ mma'm be kwlaa be ko man Babilɔnifuɛ mun, a su fin-man nun fite-man. Babilɔni famiɛn'n ɔ ´tra wɔ lomuɛn, ɔ ´fa sin yi i klɔ'n nun.› »

²⁴ Sedesias seli Zeremi kɛ: «Sɛ sran fi ɔ'a ti-man yalɛ nga e nin wɔ e ´koko i yɛ'n nun'n, be su kun-man wɔ.

²⁵ Sɛ famiɛn i awlo lɔ sran dandan'm be ti i kɛ e nin wɔ e kannin ndɛ nan be wa se wɔ kɛ: ‹Ndɛ nga a nin famiɛn'n be kannin'n, kan kle ye'n, nán fia su, e su kun-man wɔ'n›

²⁶ tɛ be su kɛ: ‹N srɛli famiɛn'n kɛ ɔ yaci nan nán ɔ ko wla min Zonatan sua'n nun lɔ kun. Ɔ'a yo-man sɔ-ɔ n ko wu ngbɛn.› »

²⁷ Sakpa-sakpa, famiɛn i awlo lɔ sran dandan'm be kwlaa be wa toli Zeremi be usɛli i sa. Nan ɔ'a nian ndɛ nga famiɛn'n fa wlɛli i nuan kɛ a kan'n su ɔ'a kan kle be. Yɛ be cuɛnnin be wun-ɔn. Afin ndɛ nga Zeremi nin famiɛn'n be kannin'n, sran fi ɔ'a ti-man nun.

²⁸ Ɔ man gladi awlo'n nun lɛ yɛ Zeremi kali lele yɛ be wa fali Zerizalɛm klɔ nin-ɔn. Zerizalɛm falɛ ndɛ'n kɛ ɔ fa yoli'n, yɛ ɔ o yɛ: