Zeremi 37 - NYANMIƐN NDƐ'N 1998

Famiɛn Sedesias waan be wun Zeremi wun

¹ Zozias i wa Sedesias'n yɛ ɔ trannin Zozakim i wa Zekɔnias'n i osu-ɔ. Nɛbikadnɛzar b'ɔ ti Babilɔni famiɛn'n yɛ ɔ fɛ i sieli Zida famiɛn-ɔn.

² Kɛ ɔ fɛ i sieli sɔ'n, ɔ nin i awlo lɔ sran dandan'm nin Zidafuɛ'm be wie fi b'a fa-man be su b'a sie-man ndɛ nga Anannganman fa wlali Zeremi nuan kɛ ɔ kan kle be'n i su.

³ Sanngɛ famiɛn Sedesias sunmannin Selemia i wa Zikal ɔ nin Maazeza i wa Sofoni ng'ɔ ti Nyanmiɛn nyrun jranfuɛ'n kɛ be ko se Zeremi kɛ: «Srɛ Anannganman e Nyanmiɛn'n man ye.»

⁴ I blɛ sɔ nun'n, wuun be nian wla-man Zeremi bisua'n, wuun ɔ tɛ sinsin sran'm be su.

⁵ Yɛ Babilɔnifuɛ'm be tili i kɛ Ezipt famiɛn'n i sonja'm be su tu ajalɛ Ezipt lɔ be ´ba, i ti Babilɔnifuɛ'm be tuli be bo Zerizalɛm anuan nun lɛ be cuɛnnin bé wun.

⁶ Yɛ Anannganman'n i nuan toli Zeremi-ɔ. Ɔ seli i kɛ yoo:

⁷ «Min Anannganman bɔ n ti Izraɛl Nyanmiɛn'n, n waan yoo: ‹An `ko se Zida famiɛn'n b'ɔ sunmannin amun kɛ amun wa usa min sa'n kɛ yoo: Se kɛ sɛ Ezipt famiɛn i sonja'm bɔ be tuli ajalɛ kɛ be ´ba amun ukalɛ'n, be su sa bé sin be mɛn'n nun.

⁸ Ɔ man Babilɔnifuɛ'm be wa sa bé sin be ´ba, be nin klɔ nga nunfuɛ mun be wa kun. Be ´fa klɔ'n, be ´wɔ nun.

⁹ Min Anannganman min wan yoo: Nán an cici amún wla ngbɛn an `se kɛ: Babilɔnifuɛ'm be ´jaso wa be ´kɔ mmua. Yɛlɛ kɛ be su kɔ-man.

¹⁰ Kannzɛ bɔ be waan amu'an kwla Babilɔni sonja wunmuan'n nan be bɔ be ka'n, amun sa tili be kpa bɔbɔ'n, be ´jaso bé tannin sua'm be nun lɔ be wa wɔ klɔ nga nun.› »

Zeremi i bisua wlalɛ

¹¹ Kɛ Ezipt famiɛn'n i sonja mun man Babilɔni sonja'm be yacili Zerizalɛm lɛ be cuɛnnin bé wun'n,

¹² Zeremi fɛli i lɛ ɔli Zerizalɛm Bɛnzamɛn akpasua'n su lɔ, kɛ ɔ yo sɔ'n, wuun be su cɛ be awlo bo asiɛ'n yɛ ɔ kɔ nan ɔ ko fɛ i liɛ lika'n.

¹³ Kɛ ɔ ko juli anuan'n nga be flɛ i kɛ Bɛnzamɛn anuan'n nun lɔ'n, wuun Anania i wa Selemia i wa liɛ Zirɛiza b'ɔ ti gladi difuɛ'm be kpɛn'n, yɛ ɔ o lɛ-ɔ. Yɛ ɔ tra Zeremi-ɔ, i waan: «Ee! ?A su fa ɔ wun ´ko man Babilɔnifuɛ mun?»

¹⁴ Zeremi waan: «Cɛcɛ, nán Babilɔnifuɛ'm be sin yɛ n ´kɔ-ɔ!» Ng'ɔ ´kɛn i lɛ'n, ɔ ti-man Zirɛiza i ndɛ. Yɛ ɔ ´fa Zeremi ko man i su kpɛn mun-ɔn.

¹⁵ Kɛ i su kpɛn'm be tili i sɔ'n, be fali ya Zeremi wun nan b'a bo i b'a wlɛ i bisua fluwa klɛfuɛ Zonatan i sua lɔ. I blɛ sɔ nun'n, wuun b'a fa sua sɔ'n b'a yo bisua.

¹⁶ Kɛ Zeremi i bisua wlalɛ'n yoli sa. Be sieli i sua kun nun. Zeremi cɛli lɔ lɔuun!

¹⁷ Le kun kpɛkuun famiɛn Sedesias ɔ'a sunman sran i sin kɛ ɔ bla. I waan ɔ bla famiɛn sua'n nun lɔ nan ɔ `usɛ i sa nvialiɛ nun. Yɛ ɔ usɛli i kɛ: «Sɛ Anannganman'n kannin mín wun ndɛ wie kleli wɔ o!» Zeremi waan: «Ɛɛn! Ɔ kannin ɔ wun ndɛ kleli min. I waan be ´tra wɔ be ´wla Babilɔni famiɛn'n i sa nun.»

¹⁸ Yɛ Zeremi usali famiɛn'n kɛ: «?Nan sanngɛ nguɛ sa cɛ yɛ n yoli amun-ɔn, a nin ɔ awlo lɔ sran dandan mun, ɔ nin Zidafuɛ mun bɔ yɛ man an tra min be wla min bisua-a?

¹⁹ ?Amun Nyanmiɛn nuan ijɔfuɛ nga be waan Babilɔni famiɛn'n su ba-man wa nan ɔ nin mɛn nga nunfuɛ'm be su kun-man'n, i sɔ Nyanmiɛn nuan ijɔfuɛ'm be o ninfan?

²⁰ Ɔ man nannan, n ´srɛ wɔ. Mín sa la mín sa klun. Nán fa min sa min sin fluwa klɛfuɛ Zonatan i sua nun lɔ. Ɔ yo sɔ-ɔ n ko wu.»

²¹ Nan famiɛn Sedesias man b'a sie Zeremi gladi difuɛ'm be awlo'n nun lɛ. I waan be `niɛn i lika nan cɛn kwlaa be mɛn i kpaun kukluku kun. Be tɔn kpaun sɔ'n kpaun tɔnfuɛ'm be atin'n su lɔ. Man ɔ di lele san be nyan-man kpaun klɔ'n nun kun. Nan Zeremi ɔ'a ka gladi difuɛ'm be awlo'n nun.