Zeremi 36 - NYANMIƐN NDƐ'N 1998

Zozakim yrali fluwa nga Barik klɛli'n

¹ Zozias b'ɔ ti Zida famiɛn i wa Zozakim i sielɛ'n i afuɛ nnan'n su yɛ Anannganman'n kannin ndɛ yɛ'n kleli Zeremi-ɔ. I waan:

² «Fa fluwa nan Izraɛl, nin Zida, ɔ nin nvle kun'm bé wun ndɛ bɔ n ´kan kleli wɔ'n, klɛ. Kɛ ɔ fin cɛn bɔ m boli ɔ ndɛ kan klelɛ bo'n ɔliɛ Zozias blɛ su b'ɔ ´fa ju ndɛ'n, klɛ i sɔ'n ndɛ liɛ'n kwlakwla.

³ I liɛ'n, sa nga n waan n ´fa yo Zidafuɛ mun, sɛ wienun-ɔn be ´yaci be nzuɛn tɛ'n, ɔ man n ´yaci be fɔnlɛ'n ɔ nin be sa tɛ'n n ´cɛ be o.»

⁴ Yɛ Zeremi flɛli Barik b'ɔ ti Neriza i wa nin-ɔn. Ndɛ nga Anannganman'n kannin'n, Zeremi kɛnnin i kwlaa kpan. Ɔ ´kan'n, wuun Barik ´klɛ.

⁵ Yɛ Zeremi seli Barik kɛ: «N lɛ-man atin n kɔ-man Anannganman i sua lɔ.

⁶ Ɔ man i ti nglɛmun cilɛ cɛn nun'n, kɔ ko kanngan fluwa nga m man a klɛli'n i nun kle sran mun. Kanngan Anannganman i nuan su ndɛ sɔ'n kle Zidafuɛ nga be fin be klɔ klɔ'm be su be bali mun wie.

⁷ Nja, sɛ be wa kpan be ´kpata Anannganman nin o! Sɛ be ´yaci be aeliɛ tɛtɛ nin o! Afin Anannganman'n kɛnnin i kɛ ya ng'ɔ fɛli i bé wun'n, ɔ ti-man blɛblɛ.»

⁸ Yɛ Barik ´nian nga Nyanmiɛn nuan ijɔfuɛ Zeremi kan kleli i'n su yɛ ɔ ´ko kanngan Anannganman i nuan su ndɛ ng'ɔ ti klɛwa fluwa'n nun Nyanmiɛn i sua nun lɔ-ɔ.

⁹ Kɛ ɔ ´yo sɔ'n, wuun Zozias b'ɔ ti Zida famiɛn i wa Zozakim i sielɛ'n afuɛ nnun'n nin anglo ngwlan ɔ'a ju'n, wuun b'a yiayia Zerizalɛmfuɛ mun nin Zidafuɛ mun kɛ be bla Zerizalɛm be wa ci nglɛmun Anannganman'n nyrun.

¹⁰ Sran'm be kwlaa be nyrun yɛ Barik kanngannin Zeremi i ndɛ'n ng'ɔ o fluwa'n nun nin-ɔn. Awa'n i fluwa klɛfuɛ Safan i wa Gɛmaria i sua ba'n nun lɔ yɛ ɔ kɛnngɛnnin i sɔ-ɔ. Sua sɔ'n wo Nyanmiɛn i sua'n i awlo'n i nglo lɔ lika liɛ'n nun, ɔ o Nyanmiɛn i awlo'n i anuan nga be flɛ i anuan uflɛ'n i wun lɔ.

¹¹ Kɛ Safan i wa Gɛmaria i klun ba liɛ b'ɔ suan Mise'n tili Anannganman nuan su ndɛ nga Barik kɛnngɛnnin i fluwa nun'n,

¹² ɔ ɔli famiɛn'n i awlo lɔ, yɛ ɔ ɔli awa'n i fluwa klɛfuɛ i sua'n nun lɔ. Ɔ ´kɔ'n, wuun famiɛn i awlo lɔ sran dandan'm be kwlaa be o lɔ: i awa'n i fluwa klɛfuɛ bɔ be flɛ i Elisama nin o, i Sɛmaɛza i wa b'ɔ suan Dɛlaza nin o, i Akbɔr i wa b'ɔ suan Ɛlnatan nin o, i Safan i wa b'ɔ suan Gɛmaria nin o, i Anania i wa b'ɔ suan Sedesias nin o, ɔ nin be nga mun.

¹³ Yɛ Mise ´kan ndɛ nga Barik ´kɛnngɛn i fluwa nun b'ɔ tili nin-ɔn.

¹⁴ Yɛ famiɛn i awlo lɔ sran dandan'm be ´sunman Zɛidi ɔliɛ Kisi i wa Selemia i wa liɛ b'ɔ suan Nɛtania'n i klun ba liɛ nin-ɔn. Be sunmɛnnin i kɛ ɔ ko se Barik kɛ ɔ fa fluwa ng'ɔ kanngannin nun sran'm be nyrun'n bla. Yɛ Barik ´fa fluwa'n yɛ ɔ ´ba-a.

¹⁵ Be waan: «Tran ase kanngan fluwa sɔ'n nun man e ti.» Yɛ Barik ´kanngan nun-ɔn.

¹⁶ Kɛ be tili fluwa sɔ'n nun ndɛ mun'n, srɛ kunnin be. Kɛ be nian-nian be wiengu sa, nan b'a se Barik kɛ: «E ´kan ndɛ nga a kan kwlaa e kle famiɛn'n.»

¹⁷ Yɛ be usali Barik kɛ: «?A yoli sɛ yɛ a klɛli ndɛ nga kwlaa-a?»

¹⁸ Yɛ Barik tɛli be su kɛ: «Zeremi-ɔ, ɔ ´kan'n, wuun n ´klɛ, ɔ ´kan'n, wuun n ´klɛ.»

¹⁹ Yɛ famiɛn i awlo lɔ sran dandan'm be seli Barik kɛ: «Kɔ nan a nin Zeremi amun ko fia. Nán sran fi wun amun.»

²⁰ Kpɛkuun be yacili fluwa'n Elisama b'ɔ ti awa fluwa klɛfuɛ'n i junman diwlɛ lɛ yɛ be ɔli famiɛn i awlo lɔ be ko kannin ndɛ sɔ'n kwlaa kleli i-ɔ.

²¹ Yɛ famiɛn'n kusu man Zɛidi ´ko fa fluwa'n Elisama i junman diwlɛ lɔ ´ba-a, yɛ ɔ ´kanngan nun ´kle famiɛn'n nin i awlo lɔ sran dandan'm bɔ be jinjin i wun lɛ mun-ɔn.

²² Anglo ngwlan'n i su yɛ sa sɔ'n juli-ɔ. Ɔ man sua nga bɔ sɛ ayrɛ'n ba-a famiɛn'n ko tran nun'n, i nun yɛ ɔ wo blɛ sɔ'n nun-ɔn. Kɛ ɔ yo sɔ'n, wuun b'a trɔ sin ɔ su tɔn.

²³ Kɛ Zɛidi ko kanngan fluwa i bue nsan o annzɛ nnan o, wuun famiɛn'n ɔ'a fa awa'n i fluwa klɛfuɛ'n i laliɛ'n ɔ'a kpɛkpɛ nun ɔ'a guɛ i sin nun. Ɔ yoli i sɔ lele ɔ yrali fluwa'n i wunmuan'n.

²⁴ Famiɛn'n nin i awlo lɔ sran dandan'm be kwlaa be tili ndɛ sɔ'n i kwlaa weiin, sanngɛ be klun sa ɔ'a ti-man be nan se kɛ be ´titi bé wun tralɛ'm be nun.

²⁵ Ɛlnatan nin Dɛlaza, ɔ nin Gɛmaria be srɛli famiɛn'n kɛ nán ɔ yra fluwa'n. Be srɛli i lele ngbɛn, ɔ'a di-man su.

²⁶ Famiɛn'n sunmannin Zɛrakmeɛl, nin Azriɛl i wa Sɛraza, nin Abdeɛl i wa Selemia kɛ be ko tra fluwa klɛfuɛ Barik, nin Nyanmiɛn nuan ijɔfuɛ Zeremi. Sanngɛ Anannganman'n fali be fiali.

²⁷ Kɛ famiɛn'n yrali fluwa nga bɔ Barik klɛli'n, bɔ Zeremi i ndɛ b'ɔ kannin'n wo nun'n, Anannganman'n kannin ndɛ kleli Zeremi ekun. Ɔ seli i kɛ:

²⁸ «Kunndɛ fluwa uflɛ nan ndɛ kwlaa ng'ɔ ti klɛwa fluwa klikli nga Zozakim yrɛli i nun'n, `klɛ i nun ekun.

²⁹ Nan se Zozakim b'ɔ ti Zida famiɛn'n kɛ: ‹Anannganman'n waan, sa ti bɔ ɔ waan ɔ yo sɛ ti yɛ m'an klɛ i kɛ kannzɛ ɔ yo sɛ san Babilɔni famiɛn'n ɔ ´ba ɔ wa nunnun mɛn nga yɛ ɔ ´nunkun i nun sran nin nnɛn mun, b'ɔ man a yrali fluwa'n,

³⁰ ɔ man ndɛ nga min Anannganman'n n kan man wɔ'n yɛ: sran nga be flɛ i kɛ Zozakim'n ɔ su nyan-man ba nan se kɛ anunman b'ɔ ´trɛn i ajalɛ nun David famiɛn bia'n su'n yɛ ɔ ´nyɛn i-ɔ. Zozakim bɔbɔ i fuɛn'n, be ´nɛnnɛn i lɛ wia'n bo i yɛ kɔnguɛ bɔlɛ flɔlɔ'n ɔ ´guɛ i su.

³¹ Sa tɛ ng'ɔ nin i osu'n, ɔ nin i awlo nun sran dandan'm be yoli'n, n yo man be ´fɛ i su afɛ'n. Nyrɛnnɛn sa nga m boli be kasiɛ'n bɔ b'a bu-mɛn i ndɛ'n, n ´fa yi be nin Zerizalɛmfuɛ mun nin Zidafuɛ'm be su.› »

³² Yɛ Zeremi kunndɛli fluwa uflɛ ɔ fa mannin Neriza i wa Barik b'ɔ ti fluwa klɛfuɛ nin-ɔn. Zeremi ´kan ndɛ'n, wuun ɔ ´klɛ. Ɔ klɛli ndɛ ng'ɔ o fluwa klikli bɔ Zozakim yrɛli i'n nun'n. Ɔ klɛli i kwlakwla, kpɛkuun ɔ klɛli ndɛ wafa kunngba sɔ'n wie mun ukali su.