Zeremi 35 - NYANMIƐN NDƐ'N 1998

Zeremi nin Rekabfuɛ mun

¹ I nun bɔ Zozias b'ɔ ti Zida famiɛn'n i wa Zozakim tɛ o famiɛn bia'n su'n, Anannganman'n seli Zeremi kɛ yoo:

² «Kɔ ko to Rekab osu'n nunfuɛ mun, flɛ be man be nin wɔ be wɔ min sua'n nun lɔ sua ba'n kun nun nan `man be nzan man be nɔn.»

³ Yɛ n ´fa Abazinia i wa liɛ bɔ be flɛ i Zeremi'n i klun ba'n bɔ be flɛ i Zazania'n, ɔ nin i niaan mun, ɔ nin i mma mun-ɔn. Sɛ be ´kwla se'n, Rekab i awlofuɛ'm be kwlaa yɛ n fali be-ɔ.

⁴ Yɛ n ´fa be n kɔ Nyanmiɛn i sua'n nun lɔ-ɔ. N fali be n wluli Zigdalia i wa liɛ bɔ be flɛ i Anan b'ɔ mantan Nyanmiɛn'n i sɔnnzɔnfuɛ'm be sua ba'n nun lɔ. I sua ba sɔ'n wo famiɛn i awlo lɔ sran dandan'm be liɛ'n i wun lɛ. Ɔ o Salɔm i wa Maazeza ng'ɔ di Nyanmiɛn i sua'n i anuan'n nun gladi'n i sua liɛ'n i ti su nglo.

⁵ Yɛ n ´fa nzan sɛ mun n ´jinjin be nyrun yɛ n ´fa klowa mun n ´takataka be nyrun-ɔn. Yɛ min waan: «Nzan yɛ ɔ o lɛ-ɔ, an `nɔn.»

⁶ Kpɛkuun be tɛli min su kɛ: «E nɔn-man nzan. Rekab i wa Zɔnadab b'ɔ ti e nannan'n ɔ seli ye kɛ: ‹Amun nin amun osu'n nunfuɛ mun, nán amun wie fi nɔn nzan mlɔnmlɔn.

⁷ Yɛ nán an kplan sua, nán an di fie, nán an ta vinyi, nán an nyan vinyi fie, sanngɛ amún tannin sua'n bo yɛ an `tran titi-ɔ. An `yo sɔ nan amu'an cɛ lika bɔ amun ti nun aofuɛ'n nun.›

⁸ Nga e nannan Zɔnadab kannin'n yɛ e fa su-ɔ. Kɛ e o e liɛ sa'n, e nin é yi mun nin e mma mun, be yasua o, be bla o, e nɔn-man nzan.

⁹ E kplan-man sua e tran-man nun. E lɛ-man vinyi fie, e di-man fie'n wie fi.

¹⁰ Tannin sua bo yɛ e tran-an. Nga e nannan Zɔnadab kannin'n yɛ e nian su e yo-ɔ.

¹¹ Kɛ Nɛbikadnɛzar b'ɔ ti Babilɔni famiɛn'n, nin i sran mun be bali kɛ be nin mɛn nga nunfuɛ mun be wa kun alɛ'n, e waan man e wanndi Babilɔni nin Aram alɛ kunfuɛ'm be nyrun e wɔ Zerizalɛm. Yɛ siɛn'n y'a a tran Zerizalɛm wa-a.»

¹² Anannganman'n seli Zeremi kɛ yoo:

¹³ «Min Anannganman bɔ n sie mɛn wunmuan'n bɔ n ti Izraɛl Nyanmiɛn'n, min waan a ko usa Zidafuɛ mun nin Zerizalɛmfuɛ'm be kɛ: ‹?Nan an ko fa-man sa nga an ko tu-man amún wun fɔ nun? ?Ndɛ nga n kan kle amun'n, amun ko ti-man?› » Anannganman'n yɛ kan sɔ-ɔ.

¹⁴ «An `nian, ndɛ nga Zɔnadab b'ɔ ti Rekabfuɛ'n kan kleli i mma'm be kɛ nán be nɔn nzan'n, lele ndɛ be nɔn-man. Nga be nannan'n kan kleli be'n, be fali su. Sanngɛ min liɛ'n, m'an kan ndɛ m'an kle amun lele ngbɛn, nɛ́n i su yɛ an ko fa-a.

¹⁵ N sunmannin min sufuɛ bɔ be ti min nuan ijɔfuɛ mun, nán andɛ yɛ m boli be sunmanlɛ bo-ɔ. N waan be `se amun kɛ: ‹Amun kwlaa an `yaci amun nzuɛn tɛ'n nan amun kaci ajalɛ'n. Nán an ko tu amuɛn, nán an sɔ be, i liɛ amun ´ka lika nga n fa mannin amun nin amun nannan mun'n i nun, sanngɛ n kleli mín nuan yalɛ ngbɛn, amu'an sie-man amún su nan se kɛ amun ´fa su.

¹⁶ Zɔnadab b'ɔ ti Rekabfuɛ'n i anunman'm be fa ndɛ nga be nannan'n kan kleli be'n cɛ! Sanngɛ nvle nga'm be nunfuɛ'm be fa-man min ndɛ'n su.› »

¹⁷ I sɔ'n ti, Anannganman b'ɔ sie mɛn wunmuan'n b'ɔ ti Izraɛl Nyanmiɛn'n wan yoo: «Kɛ ɔ ´yo bɔ ndɛ nga n kan'n be fa-man'n, bɔ n flɛ be-ɔ, be sro-man'n, i ti nyrɛnnɛn sa nga n kɛnnin i kɛ n ´fa yi i Zerizalɛmfuɛ mun nin Zidafuɛ'm be su'n, n wa fa yi be su.»

¹⁸ Zeremi seli Rekab awlofuɛ'm be kɛ Anannganman b'ɔ sie mɛn wunmuan'n b'ɔ ti Izraɛl Nyanmiɛn'n wan yoo: «Kɛ ɔ ´yo bɔ amun fali ndɛ nga amun nannan Zɔnadab kannin'n su'n, bɔ an niannin i kwlakwla su yoli'n

¹⁹ ti'n, min Anannganman b'ɔ n sie mɛn wunmuan'n bɔ n ti Izraɛl Nyanmiɛn'n, n wan yoo: ‹Zɔnadab b'ɔ ti Rekabfuɛ'n ɔ ´nyɛn i ja nunfuɛ b'ɔ ´jran min nyrun tititi-ɔ.› »