Zeremi 34 - NYANMIƐN NDƐ'N 1998

Sa ng'ɔ wa ju Sedesias su'n

¹ Kɛ Nɛbikadnɛzar b'ɔ ti Babilɔni famiɛn'n nin Zerizalɛmfuɛ mun, nin Zida klɔ kun nga mun be nunfuɛ mun be ´kun alɛ'n yɛ Anannganman'n kannin ndɛ ng'ɔ o yɛ'n kleli Zeremi-ɔ. Nɛbikadnɛzar nin i sonja'm be kwlaa nin asiɛ'n su famiɛn diwlɛ'm be kwlaa be nunfuɛ mun, ɔ nin nvle nga be su i'n be nunfuɛ mun yɛ be boli alɛ sɔ'n i kunlɛ bo-ɔ. Ɔ seli i kɛ:

² «Min Anannganman'n bɔ n ti Izraɛl Nyanmiɛn'n, min waan a wɔ ko to famiɛn Sedesias nan a se i kɛ Anannganman'n waan yoo: ‹M'an fa klɔ nga m'an man Babilɔni famiɛn'n, ɔ wa fa sin ´yi nun.

³ Ɔ kusu a su fi-mɛn i sa, be ´tra wɔ kplo! Be ´fa wɔ be ´wlɛ i sa nun. A nin Babilɔni famiɛn'n be nyinma nnan'n ´yia nun. Ɔ nin wɔ be ´kan ndɛ, kpɛkuun ɔ ´fa wɔ kɔ Babilɔni.

⁴ Sanngɛ famiɛn Sedesias, sie ɔ́ su tie ndɛ nga n kan man wɔ'n. Be su kun-man wɔ tokofi nun.

⁵ A ´wu ɔ́ sa su. Yɛ like nga be fa yoli ɔ nannan nga be dili famiɛn'n bɔ be wuli'n yɛ be ´fa yo wɔ-ɔ. Be ´yra ansans sin su be ´man wɔ. Kpɛkuun be ´sun ɔ́ sɛ'n bo, be ´se kɛ: Ee, e Min nin oo we! M bɔbɔ min Anannganman'n yɛ n kan kle wɔ-ɔ.› »

⁶ Nyanmiɛn nuan ijɔfuɛ Zeremi ko kannin ndɛ sɔ'n kwlaa kleli famiɛn Sedesias Zerizalɛm lɔ.

⁷ Kɛ ɔ ´yo sɔ'n, wuun Babilɔni famiɛn'n i sonja'm be nin Zerizalɛm nin Lakis, ɔ nin Azeka be su kun. I blɛ sɔ'n nun'n, wuun Zida klɔ nga bé sili be wun bɔ be tɛ ka'n be yɛ be o lɛ-ɔ.

Kanga nga be min'm be yaci be nun bɔ be fa be ekun

⁸ Kɛ bɔ famiɛn Sedesias nin Zerizalɛmfuɛ'm be kwlaa bé nuan sɛli su kɛ be `yaci kanga'm be nun'n, yɛ Anannganman'n kannin ndɛ yɛ'n kleli Zeremi-ɔ.

⁹ Be kɛnnin i kɛ sran kwlaa ng'ɔ lɛ i afanniɛn'n, sɛ ɔ ti bla o, sɛ ɔ ti yasua o, se ɔ ti Ebre'n, ɔ `yaci i nun. Be kan ukali su kɛ nán sran kun sa fɛ i niaan Zuif kun fa yo i afanniɛn kun.

¹⁰ Famiɛn'n i awlo lɔ sran dandan'm, be nin sran'm bé nuan dun mmua sɛli bé wun, ɔ man be kwlaa be kplinnin su kɛ be ´yaci be afanniɛn'm be nun nan be fa-man be yo-man be afanniɛn kun. Be kplinnin su, kusu be yacili be nun.

¹¹ Be yoli i sɔ kwlaa, kpɛkuun be wa kacili aniɛn, bla nin yasua nga sran sɔ'm be yacili be nun'n, be ko trali be. Be fali be yoli be afanniɛn ekun.

¹² Yɛ Anannganman'n seli Zeremi kɛ:

¹³ «Min Anannganman'n bɔ n ti Izraɛl Nyanmiɛn'n min wan yoo: ‹Kɛ n ´fa amun nannan mun Ezipt lɔ kan be yoli afanniɛn lɔ'n m ´ba'n, e nin be e nuan sɛli é wun

¹⁴ kɛ sɛ sran kun i niaan Ebre kun ko fɛ i wun mɛn i kɛ ɔ ´yo i afanniɛn'n, kɛ ɔ su i afuɛ nsiɛn'n, i afuɛ nso su'n man ɔ yaci i nun nan ɔ wɔ. E nin be e kɛnnin i sɔ sanngɛ b'a di-man su. B'a nian-man ndɛ nga n kannin'n su b'a yo-man.

¹⁵ Amun kusu ndɛ amu'an kaci amun ajalɛ'n, amun yoli ng'ɔ yo min klanman'n. Amun waan amun ´yaci amun niaan'm be nun. Amún nuan ɔ'a sɛ amún wun min nyrun sua nga min dunman'n wo su'n nun wa.

¹⁶ I sɔ'n kpɛkuun amu'an kaci aniɛn amu'an yo min finfin kɛ nga sa! Afanniɛn yasua nin bla nga an yacili be nun ɔli'n, amu'an ko tra be a ba, amu'an mian be kɛ be kaci amun afanniɛn ekun.› »

¹⁷ I sɔ'n ti Anannganman'n waan: «Kɛ n waan amun `se amun niaan'm be kɛ amu'an yaci be nun bɔ amu'an di-man su'n, i ti n kusu n ´kan kle amun kɛ: ‹M'an yaci alɛ, nin tukpacɛ b'ɔ sa ndɛndɛ'n, ɔ nin awe'n be nun kɛ be kle amun nyrɛnnɛn. N ´yo man famiɛn diwlɛ'm be nunfuɛ'm be kwlaa nga be ´ti amun ndɛ'n, ɔ ´yo be sro.

^18-19 Famiɛn'n i awlo lɔ sran dandan mun nga be o Zida klɔ'm be su'n nin be nga be o Zerizalɛm'n, be nin sran dandan mun, nin Nyanmiɛn nyrun jranfuɛ mun be kpɛli nannin kun bɔ ɔ'a kpɛ cro'n i nun nnyɔn, be sinnin i afiɛn be fa tali nda min nyrun. Sanngɛ b'a nian-man su b'a yo-man i su sa'n . I sɔ'n ti,

²⁰ n ´fa be n ´wlɛ i be kpɔfuɛ nga be sunnzun be nin wie'n bé sa nun. Be fuɛn'n ɔ ´yo anunman nin bo nun nnɛn'm be aliɛ.

²¹ N ´fa Zida famiɛn Sedesias nin i awlo lɔ sran dandan'm n ´wlɛ i be kpɔfuɛ nga be sunnzun be nin wie'n bé sa nun. N ´fa be n ´wla Babilɔni famiɛn'n i sonja bɔ b'a wla trɔ be su kɔ'n bé sa nun.

²² N wa ijɔ n ´kle sonja sɔ mun, n ´yo man be sa bé sin be ba klɔ nga su. Be nin i sufuɛ mun be wa kun, be ´fa klɔ'n, be ´fa sin ´yi nun. N ´yo man Zida klɔ'm be ´tɔ srololo, sran fi su ijɔ-man su kun.› »