Zeremi 33 - NYANMIƐN NDƐ'N 1998

Like uflɛ nga Nyanmiɛn waan ɔ ´yo man Zerizalɛm'n

¹ Kɛ Zeremi tɛ o bisua gladi dilɛ awlo'n nun lɔ'n, Anannganman'n kannin ndɛ kleli i ekun.

² Anannganman b'ɔ yili ninnge mun bɔ i yɛ man be o lɛ'n, i bɔ be flɛ i Anannganman'n, i waan:

³ «Flɛ min, yɛ n ´tɛ wɔ su. M ´bo sa dandan kpa'm be su n ´kle wɔ. Sa nga a si-man be'n, m ´bo be su n ´kle wɔ.

^4-5 Min Anannganman bɔ n ti Izraɛl Nyanmiɛn'n, ndɛ nga n kan'n yɛ. Klɔ nga nun sua mun nin Zida famiɛn'n i sua nga be nin Babilɔnifuɛ mun be ´ko kun alɛ bɔ fuɛn'm be ´yi be'n, bé wun ndɛ yɛ n wa kan kle wɔ-ɔ. N ´fa ya n ´kun sran mun be ´yi sua sɔ mun. Klɔ nga sufuɛ'm be aeliɛ tɛtɛ'n ti n su nian-man be nyrun.

⁶ Sanngɛ ɔ yo'n, n ´yo man ɔ ´yo juejue kpa kɛ sran bɔ ɔ'a tɔ tukpacɛ ɔ'a jaso'n sa. N ´yo man i su tranfuɛ'm be ´nyan fɔundi, be ´nyan manndran.

⁷ N ´fa Zidafuɛ nin Izraɛlfuɛ nga be trali be lomuɛn ɔli'n m ´ba. N ´fa be n ´sie be osu laa'n nun.

⁸ N ´salo bé wun fiɛn'n kwlakwla, sa nga b'ɔ man be nin min ye afiɛn fɔnnin'n, n ´salo be. N ´yaci bé sa tɛ mun n ´cɛ be. Sa tɛ nga b'ɔ man be nin min ye afiɛn fɔnnin'n, n ´yaci n ´cɛ be. Sa tɛ nga be yoli'n, nyin kekle bɔ be yoli min su'n, n ´yaci n ´cɛ be.

⁹ Kpɛkuun klɔ nga man n klun wa jɔ, ɔ wa man min kɔmin su, ɔ wa yo kɛ min kɔmin njuaba sa asiɛ'n su nvle'm be nunfuɛ'm be nyrun. Kɛ nvle'm be nunfuɛ sɔ'm be wa ti nɛnnɛn dan nga n wa di klɔ sɔ'n, be akunndan'n ´sanngan bé wun. Be ´usu kpa.»

*

^10-11 Anannganman'n wan yoo: «Klɔ nga amun waan ɔ'a saci nan sran nin nnɛn fi nun-man su kun'n, Zida klɔ nin Zerizalɛm akpɔ mun bɔ amun waan b'a tɔ srolo man sran nin nnɛn fi nun-man be su kun'n, sran'm be wa bo sro lika sɔ'm be nun, be ´ti be ngan. Be wa ´to aklunjuɛ jue. Yasua annzɛ bla nga b'a ja be wun uflɛ uflɛ'n be ´to jue. Be bɔ be to jue ng'ɔ o yɛ'n, be ´ti be nɛn ekun. Be waan: ‹Man be manman Anannganman b'ɔ sie mɛn wunmuan'n, afin ɔ ti kpa yɛ i klun-ufue'n wo lɛ tititi.› Be nga be fa bo kun yolɛ i su tɛ nnɛn'n be fa ba Anannganman i sua'n nun'n, be ´ti be nɛn'n. Afin mɛn nga nun sran bɔ be trali be lomuɛn'n, n ´fa be m ´ba. N ´fa be n ´sie be osu laa'n nun.» Anannganman'n yɛ ɔ kan sɔ-ɔ.

*

¹² Anannganman b'ɔ sie mɛn wunmuan'n wan yoo: «Lika nga ɔ'a nunnun bɔ sran nin nnɛn fi nun-man nun'n, nnɛn sunianfuɛ'm be wa nyan be lika bɔ i nun yɛ nnɛn'm be ´la-a. Be ´nyan wie lika sɔ'n i klɔ dandan'm be su kusu.

¹³ Klɔ nga be o oka'm be su'n nin klɔ nga be o tɔnun'm be nun, nin Negɛb lika'm be nun, nin Bɛnzamɛn nvle'n nun, nin Zerizalɛm asa'n su'n, ɔ nin Zida klɔ'm be su'n, lɔ boli mun nin lɔ bua'm be ´sin sran ng'ɔ ka be'n i nyrun ekun.» Anannganman'n yɛ ɔ kan sɔ-ɔ.

Like nga Nyanmiɛn waan ɔ ´yo'n, ɔ ´yo

¹⁴ «Anannganman waan: ‹Cɛn wie lele Izraɛl osu'n nin Zida osu'm bé wun ndɛ fɛ nga n kannin'n, n ´yiɛ i nuan.

¹⁵ I blɛ sɔ nun'n, n ´yo man David i anunman kpa nanwlɛ su kun ɔ wa jaso i osu nun. Ɔ ´yo famiɛn kpa kɛ ɔ fata'n sa. Ɔ ´nian mmla'n su ɔ ´di jɔlɛ nanwlɛ mɛn'n nun .

¹⁶ I blɛ sɔ nun'n, Zida nvle'n ´fite nun. Zerizalɛm klɔ'n ɔ ´nyan manndran. Ɔ man be wa flɛ Zerizalɛm kɛ: Anannganman'n Ti E Ti Ndɛ Kanfuɛ.›

*

¹⁷ Anannganman'n wan yoo: ‹David ´nyɛn i ajalɛ nun tranfuɛ titi. Sran sɔ'n ´tran Izraɛl osu'n i famiɛn bia'n su.

¹⁸ Levifuɛ nga be ti Nyanmiɛn nyrun jranfuɛ'n be kusu be ´nyan sran ´tran be ajalɛ nun titi ɔ ´yi tɛ nga be yra be nnɛn'n kɔlikɔli'n, ɔ ´yra ansans ɔ ´yi bo kun yolɛ i su tɛ mun, ɔ ´yi tɛ aliɛ ba blu-nin-nso nun.› »

*

¹⁹ Anannganman kan guali su kleli Zeremi kɛ:

^20-21 «Sɛ a ´wun kɛ e nin David b'ɔ ti min sufuɛ'n ye aenguɛ'n ´saci b'ɔ man ɔ su nyan-man ba yasua b'ɔ ´trɛn i famiɛn bia'n su'n, sɛ a ´wun kɛ e nin Levifuɛ nga be ti min nyrun jranfuɛ'n ye aenguɛ'n ´saci b'ɔ man be su su-man min kun'n, wuun mmla nga n kpɛli b'ɔ man sɛ be wun wia'n wia nun kun-ɔn, san be ´wun kɔnguɛ'n, bɔ man like nnyɔn sɔ'n be su be wiengu su titi'n, sɛ kusu ɔ ju be blɛ-ɔ be ba'n, wuun amu'an kwla kpɛ mmla sɔ'n i wun.

²² N ´yo man David b'ɔ ti min sufuɛ'n i osu nunfuɛ mun nin Levifuɛ nga be su min'n be trɛ lelele. Be ´yo kɛ nyanmiɛn su lɔ nzraama mun nin jenvie nuan aunnyan'n bɔ sɛ sran waan ɔ ´ka be-ɔ ɔ yo-man ye'n sa.»

*

²³ Anannganman'n kannin ndɛ kun ekun kleli Zeremi. I waan:

²⁴ «?Ndɛ nga sran'm be kan'n, a ti? Be ko se kɛ: ‹Awlo nnyɔn nga Anannganman'n kpali be'n, ɔ yili be blo.› Nian kɛ be yo min nvle'n i finfin-ɔn. Ɔ ti-man nvle be nyrun kun.»

²⁵ Anannganman'n kusu wan yoo: «Sɛ ɔ ti kɛ e nin wia nun nin kɔnguɛ'n y'a tra-man aenguɛ'n, sɛ ɔ ti kɛ m'an kle-man nyanmiɛn nin asiɛ'n be mmla'n,

²⁶ wuun n yi Zakɔb osu'n nin min sufuɛ David i liɛ'n be ase-ɔ ɔ yo ye, wuun n su fa-man be osu'n nun sran b'ɔ ´sie Abraam nin Izaak, nin Zakɔb be osu nin-ɔn. N ´fa be sran nga be trali be lomuɛn'n n ´sa be sin, yɛ n ´si be aunnvuɛ .»