Zeremi 32 - NYANMIƐN NDƐ'N 1998

Zeremi i fie b'ɔ toli'n

¹ Sedesias i Zida sielɛ'n i afuɛ blu'n su b'ɔ ti Nɛbikadnɛzar i liɛ'n i afuɛ blu-nin-mɔcuɛ'n su'n, Anannganman'n kannin ndɛ kleli Zeremi.

² Kɛ ɔ ´kan kle i sɔ'n, wuun Babilɔni sonja'm b'a bo b'a sin b'a yia Zerizalɛm klɔ'n, wuun b'a wla Nyanmiɛn nuan ijɔfuɛ Zeremi i bisua Zida famiɛn'n i awlo'n nun lɔ.

³ Sedesias yɛ man be fɛ i wlɛli i lɔ-ɔ. I waan: «Ɔ yo sɛ ti yɛ a se kɛ: ‹Anannganman'n waan: M'an fa klɔ nga m'an wlɛ i Babilɔni famiɛn'n i sa nun, nan i ti ɔ wa fa nin-ɔn.

⁴ Famiɛn Sedesias su fin-man Babilɔnifuɛ'm bé sa nun fite-man. Be ´trɛ i be wlɛ i Babilɔni famiɛn'n i sa nun, Sedesias nin i be ´ijɔ. Be nyinma nnan'n ´yia nun.

⁵ Be ´fa Sedesias be ´kɔ Babilɔni, ɔ ´ka lɔ lele san m'an ɔ i osu nianlɛ.› Nan Anannganman'n waan: ‹Sɛ amun nin Babilɔnifuɛ mun amun waan amun ´kun alɛ'n, amun su nyan-man jranwlɛ le.› »

⁶ Zeremi waan: «Anannganman'n kannin ndɛ kun kleli min. I waan:

⁷ ‹Salɔm i wa liɛ bɔ be flɛ i Anameɛl b'ɔ nin wɔ be ti yasua nga wa yasua nga wa'n, ɔ wa to wɔ, ɔ ´se wɔ kɛ: To min fie ng'ɔ o Anatɔt lɔ'n, afin wɔ yɛ aja'n ɔ'a to wɔ-ɔ.›

⁸ Kpɛkuun sakpa-sakpa, min niaan Anameɛl wa toli min bisua lɔ kɛ Anannganman'n fa kannin'n sa. Ɔ seli min kɛ: ‹Min fie lika ng'ɔ o Bɛnzamɛn lika'n nun Anatɔt lɔ'n, to. Wɔ yɛ aja'n ɔ'a to wɔ-ɔ!› N wunnin kɛ kannzu Anannganman'n yɛ ɔ kannin ndɛ sɔ nin-ɔn.

⁹ Yɛ n toli Anatɔt lɔ lika sɔ'n min niaan Anameɛl i sa nun-ɔn. N fali i ti sika jɛtɛ ufue blu-nin-nso m mɛnnin i.

¹⁰ N klɛli i tolɛ'n i wun fluwa nnyɔn, n ´fali min nzɔliɛ'n n sieli kun su, n kɛtɛli i ti lalofuɛ'm be nyrun yɛ n sunnzunnin sika'n toe su m mɛnnin i-ɔ.

¹¹ Fluwa nnyɔn bɔ n klɛli'n, n fali kun nga n fali min nzɔliɛ'n n sieli su bɔ n kɛtɛli i ti'n, ɔ nin i wun fluwa fluwa nga mmla'n waan be yo'n i kwlakwla, n fali be nin fluwa kun nga m'an kɛtɛ-mɛn i ti'n, nan m'an fa be a man

¹² Barik b'ɔ ti Maazeza i wa Neriza i klun ba liɛ'n. N fa mɛnnin i min niaan Anameɛl, nin lalofuɛ nga be nzɔliɛ'n wo fluwa sɔ'n su'n, ɔ nin Zidafuɛ nga be o bisua lika'n nun lɛ'n be kwlaa be nyrun.

¹³ Kpɛkuun n kannin ndɛ ng'ɔ o yɛ'n n kleli Barik be nyrun lɛ. N seli i kɛ:

¹⁴ ‹Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n waan a `fa fie lika i wun fluwa yɛ mun: kun nga n fali min nzɔliɛ n sieli su bɔ n kɛtɛli i nuan'n, ɔ nin kun ng'a m'an kɛtɛ-mɛn i nuan'n, fa be sie i wufa talie kun nun nan b'a cɛ.›

¹⁵ Nan Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹Be ´to sua nin fie lika, ɔ nin vinyi fie mɛn ng'ɔ o yɛ'n nun wa ekun.› »

Zeremi srɛli Nyanmiɛn

¹⁶ «Kɛ n fali fie wun fluwa'n m mannin Neriza i wa Barik'n, n srɛli Anannganman'n n seli kɛ:

¹⁷ ‹Ee! Anannganman Nyanmiɛn kpli, ɔ wunmiɛn dan'n nin ɔ ngwlɛlɛ'n yɛ man a kwla yili nyanmiɛn'n bɔ la nglo lɔ plaii'n nin asiɛ nin-ɔn, like fi ti-man klekle ɔ nyrun.

¹⁸ Osu nga ɔ waan a ´di i nɛnnɛn'n, a di i lele ɔ ju i akpasua akpi su. Sɛ kusu siɛ'm be yoli sa tɛ'n, a yo man be mma nga be jaso su'n be fɛ i su afɛ'n. Wɔ yɛ a ti Nyanmiɛn kpli ng'ɔ ti dan bɔ be flɛ i kɛ Anannganman b'ɔ sie mɛn wunmuan nin-ɔn.

¹⁹ Ninnge nga a bu be akunndan kɛ a ´yo be'n be ti dandan, kusu a kwla be yo klanman. Ninnge nga sran'm be yo'n, ɔ́ nyin tɛ i kwlaa'n. Ninnge sɔ'm be su yɛ a nian a yo be sa ng'ɔ nin be fata nin-ɔn. Be nyoliɛ'n su yɛ a nian a yo be sa ng'ɔ nin be fata nin-ɔn.

²⁰ A yili atrɛ, a yoli abonuan sa mun Ezipt mɛn'n nun lɔ laa. Kɛ e ´se yɛ'n kusu, Izraɛl mɛn'n nun o, asiɛ wunmuan'n su o, a yoli man ɔ dunman'n ɔ'a fu kekleke.

²¹ A yili atrɛ, a yoli abonuan sa mun. Izraɛl b'ɔ ti ɔ nvle'n, a fa fin Ezipt lɔ bali. Ɔ man be wun kɛ a ti dan nan like nga ɔ waan a ´yo'n, a kwlɛ i yo.

²² Mɛn fɛfɛ nga a tali be nannan'm be nda kɛ a ´fa man be'n, a fa mannin be.

²³ Be wa fali mɛn sɔ'n, sanngɛ kpɛkuun b'a tie-man wɔ aniɛn'n. B'a nian-man ɔ mmla'n su b'a nanti-man, like nga ɔ waan be yo'n, b'a yo-man. I sɔ'n ti yɛ man a fali nyrɛnnɛn nga kwlakwla yili be su nin-ɔn.

²⁴ Be nga be bali klɔ'n i falɛ'n, be yɛ be ´kplɛn i wun kpata'n be ´ba lɛ. Be su wa fa klɔ'n. Be ´fa alɛ, nin awe, ɔ nin tukpacɛ b'ɔ sa ndɛndɛ'n be ´fa fa klɔ'n, ndɛ nga a kannin'n yɛ ɔ'a ju yɛ ɔ bɔbɔ ɔ́ nyin ta nun yɛ.›

²⁵ Anannganman Nyanmiɛn kpli, ɔ bɔbɔ a seli min kɛ: ‹To fie kun, sɛ a ´to-ɔ, man lalofuɛ'm be trɛn i bo.› Kusu klɔ'n yɛ Babilɔnifuɛ'm be su wie i fa yɛ.»

Nyanmiɛn tɛli i su

²⁶ Anannganman'n tɛli Zeremi su kɛ:

²⁷ «Nian, min yɛ n ti Anannganman nin-ɔn. Like nga be nyin o su'n be kwlaa be Nyanmiɛn yɛlɛ min. Sa'n wie fi ti-man kekle mín sa nun.

²⁸ Nan yoo, n ´fa klɔ nga n wla Babilɔnifuɛ'm bé sa nun. N ´fa wla be famiɛn bɔ yɛlɛ Nɛbikadnɛzar i sa nun.

²⁹ Babilɔnifuɛ nga b'a fa alɛ'n b'a wla amun sin yɛ'n, be wa wlu klɔ'n nun be ´fa sin be ´yi nun be ´wɔ nun. Sua nga be yra ansans i ti su nglo be man Baal'n, bɔ be gua nzan be man amuɛn mun be fa kun min ya'n, be ´yra be.

³⁰ Kɛ ɔ fɛ i lalafuɛ nun lele'n, like nga n klo-mɛn i'n cɛ yɛ Izraɛlfuɛ mun nin Zidafuɛ'm be waan be fa man be man be `yo-ɔ. Izraɛlfuɛ'm b'a yaci-man min anwlɛn fɔkɔlɛ'n le.» Anannganman'n yɛ ɔ kan sɔ-ɔ.

³¹ Anannganman kɛnnin ekun kɛ: «Kɛ ɔ fin cɛn bɔ be kplannin klɔ'n yɛ be sɔtɔli min ya kunlɛ nin min anwlɛn fɔkɔlɛ lele yɛ ɔ'a fa ju ndɛ yɛ. I sɔ'n ti, man klɔ'n ɔ sin jaso lɛ nan n `wun ase .

³² Izraɛlfuɛ mun nin Zidafuɛ'm b'a yo sa tɛ'n b'a fɔkɔ min anwlɛn'n wie pɛ, be famiɛn mun o, be famiɛn'n i awlo lɔ sran dandan mun o, min nyrun jranfuɛ bɔ be o be lɔ mun o, min nuan ijɔfuɛ bɔ be o be lɔ mun o, be nin Zida nin Zerizalɛmfuɛ'm be kwlakwla.

³³ B'a kpɛ-man bé nyin mín wun wa. Bé sin yɛ be kaci sili min-ɔn. Nán kɛ b'a kle-man be ngwlɛlɛ-ɔ. Nán andɛ yɛ be boli be ngwlɛlɛ klelɛ'n bo-ɔ. Sanngɛ nán kɛ be wa sie be su nan se kɛ be ´tie ndɛ nga be kan'n ti-ɔ.

³⁴ Be ko fali be tete ninnge mun be sieli i sua nga min dunman'n wo su'n nun be fa sacili i.

³⁵ Be kplannin amuɛn Baal i sua Bɛn-Inɔm kongo'n nun yɛ be fa be mma bla nin be mma yasua mun be yi tɛ be man Mɔlɔk-ɔ. Kusu wuun m bɔbɔ min m'an se-man kɛ be yo i sɔ man min. I sɔ akunndan bɔbɔ nian ba-man mín ti nun le. Be yoli tete sa sɔ mun man Zidafuɛ'm be yoli sa tɛ.

³⁶ Sanngɛ klɔ nga amun waan Babilɔni famiɛn'n ´fa alɛ nin awe, ɔ nin tukpacɛ b'ɔ sa ndɛndɛ'n ɔ ´fa'n, i wun ndɛ bɔ Anannganman b'ɔ ti Izraɛl Nyanmiɛn'n kan gua su'n yɛ. I waan:

³⁷ ‹Se kɛ sɛ: Mɛn nga n fɛli i wun ya dan kpa bɔ i ti min anwlɛn'n kpɛli min klun bɔ n fuannin i nunfuɛ mun'n, n ´yiayia be mɛn sɔ'm be nun n ´fa be m ´ba lika nga nun wa ekun, be ´nyan manndran wa.

³⁸ Be ´yo min nvle, n kusu n ´yo be Nyanmiɛn.

³⁹ N ´yo man be akunndan'n ´yo kun. Be nantiwlɛ'n ´yo kun. Be ´sro min titi, ɔ man be nin be osu'n be ´nyan muae.

⁴⁰ E nin be e ´tra aenguɛ kun b'ɔ su sin-man le. N su kaci-man min sin n si-man be kun. N ´di be nɛnnɛn. N ´yo man be sro min nan b'a kaci-man bé sin b'a si-man min.

⁴¹ Kɛ n ´di be nɛnnɛn'n, n ´di i nin aklunjuɛ. N ´tu n klun yo kwlaa nga n ko yo nan b'a taka kpa mɛn nga nun'n.› »

⁴² Anannganman'n wan yoo: «Like nga n yoli bɔ n fali nyrɛnnɛn dan nga n yili i Zida mɛn'n su'n, i kunngba'n yɛ n ´yo man be ´wun ndɛ fɛ nga n ´kɛn i yɛ'n kwlaa wlɛ-ɔ.

⁴³ Mɛn nga amun waan ɔ'a tɔ srolo nan sran nin nnɛn nun-man su'n, klɔ nga amun waan Babilɔnifuɛ'm b'a fa'n, be ´to fie wa ekun.

⁴⁴ Be ´yi sika be ´to fie, be klɛ i wun fluwa. Be ´fa lalofuɛ be ´fa be nzɔliɛ'n be ´sie i fluwa sɔ'n su be ´kɛtɛ i nuan wa. Be ´to i Bɛnzamɛn nvle'n nun, nin Zerizalɛm asa'n su, nin Zida klɔ'm be su, nin oka'n i su klɔ'm be su, nin tɔnun lika'm be nun, ɔ nin Negɛb lɔ klɔ'm be su. Afin n ´fa be nga be trali be lomuɛn ɔli'n m ´ba.» Anannganman'n yɛ ɔ kan sɔ-ɔ.