Zeremi 31 - NYANMIƐN NDƐ'N 1998

*

¹ Anannganman waan: «I blɛ sɔ nun'n, n wa yo Izraɛl awlobo'm be kwlakwla be Nyanmiɛn. Be kusu be ´yo min sran.»

Izraɛlfuɛ nga b'a wu-man'n be sin salɛ

² Anannganman'n wan yoo: «Sran nga be fin alɛ'n nun fiteli bɔ be wo aawlɛ flɛnnɛn'n nun lɔ'n, n yoli be ye. Ɔ man Izraɛl wa di alaje.»

³ I waan: «Anannganman'n fin mmua lɔ lele ɔ wa yili i wun kleli min.» Ɔ seli min kɛ: «Klolɛ nga n fa klo wɔ'n, ɔ lɛ-man kpɛbo. N tɛ di wɔ nɛnnɛn kɛ ɔ ´yo nan w'a mantan min'n ti.

⁴ Izraɛl, min adeba, n ´yo man a ´kpɛn ɔ osu laa'n nun. A wa fa ɔ klɛn klanman'n ekun. A ´wlu be nga be klun ɔ'a jɔ bɔ be si able'n be nun.

⁵ A wa ta vinyi Samari oka'm be su ekun. Vinyi tafuɛ'm be ta-a, be di i su mma.

⁶ Cɛn wie lele gladi difuɛ'm be ´jran Efraim oka'm be su be ´kpan kɛ: ‹An `jaso man e wɔ Siɔn. E wɔ Anannganman e Nyanmiɛn'n i wun.› »

*

⁷ Afin Anannganman'n wan yoo: «An `bo sro be man Zakɔb i osu'n nunfuɛ mun. An `bo sro be manman Anannganman b'ɔ ti mɛn'n kwlakwla bé su kpɛn'n. An `kpan Aleluya man be ti, an `se kɛ: ‹Anannganman, de ɔ nvle'n, de Izraɛlfuɛ nga be ka'n.› » Ndɛ nga Anannganman kusu kan'n yɛ:

⁸ «N su fa be Izraɛl i nglo lɔ mɛn'n nun m ´ba. N su yiayia be mɛn nga be o nun'n be tiwatiwa'm be su'n ba. Anyansifuɛ'm be o nun. Be nga bé ja'n ti-man kpa'n nin wunnzɛfuɛ, nin bla ta'm be o nun. Sran fi su ka-man. Sran nga be wa ba'n, b'a sɔn-man ngowa.

⁹ Be ´ba'n, wuun be ´sun. E nin be e ´ba'n, wuun n ´kpata be. N ´fa be m ba nzue ba nuan. N ´fa be n sin atin treketreke su, ɔ lɛ-man kɛ bé ja ɔ'a kpla. Afin Izraɛl i si yɛlɛ min. Efraim ti mín wa yasua klikli.»

*

¹⁰ «Nvle kun nga mun, ndɛ nga Anannganman'n kan'n, an `sie amun su tie nan an `ko kan kle mɛn nga be o jenvie'n i kɔmin sin mmua lɔ'n. An `se be kɛ: ‹Sran nga man Izraɛlfuɛ'm be bo sanndili'n, ɔ su yiayia be nan ɔ ´nian be su kɛ bua sunianfuɛ'n niɛn i bua'm be su'n sa.›

¹¹ Afin Anannganman'n ɔ'a kpɔ Izraɛlfuɛ'm be ti. Ɔ'a de be be kpɔfuɛ b'ɔ lɛ wunmiɛn tra be'n i sa nun.

¹² Be ´bo sro be ´ba Siɔn oka'n su. Be ´wanndi yɛ be ´ba ninnge nga Anannganman'n fa man be'n i falɛ-ɔ, ɔliɛ ble o, nzan lɔflɛ o, ngo uflɛ o, bua o, boli o, nannin o. Be klun'n ´jɔ, be ´yo kɛ fie bɔ nzue tɔ su'n bɔ i su jɔ flɔlɔ'n sa. Be su yo-man kɛ asiɛ b'ɔ su srɛ nzue'n sa.

¹³ Kpɛkuun siɛn'n, talua'm be klun wa jɔ, be ´si able. Gbanflɛn mun nin kpɛnngbɛn'm be ´si able wie. Afin n ´yo man be awlaboɛ'n kaci aklunjuɛ. N fɔnvɔ be man be klunngbɔ'n wie, yɛ be klun ´jɔ.

¹⁴ N ´yo man min nyrun jranfuɛ'm be ´nyan like kpakpa be ´di. N ´yo man ninnge kpakpa'n ´sin yia min sran mun.» Anannganman'n yɛ ɔ kan sɔ-ɔ.

*

¹⁵ Anannganman'n wan yoo: «Kpanlɛ nin sunlɛ, ɔ nin awuyomo tɛ Rama lɔ. Rasɛl yɛ ɔ su sun i mma mun-ɔn. Ɔ kpli-man su kɛ be kpɛtɛ i, yɛlɛ kɛ i mma'm be nun-man lɛ kun .»

¹⁶ Yɛ Anannganman'n se i kɛ: «Yaci sunlɛ'n, muan ɔ́ nuan. Nunnun ɔ nyinmuɛn'n. Afɛ nga a fɛli'n, a su wa nyɛn i nuan akatua. Ɔ mma'm be wa fin be kpɔfuɛ'm be mɛn'n nun lɔ ´ba.»

¹⁷ Anannganman'n waan: «Ɔ nyrun atin'n ti wein. Ɔ mma'm be ´sa bé sin be ´ba be lika'n nun ekun.

¹⁸ N tili kokolɛ nga Efraim koko se kɛ: ‹A tuli ye fɔ. A tuli ye fɔ kɛ be tu nannin gbanflɛn bɔ i nyin yi-man sran'n i fɔ'n sa. Fa e sa é sin ɔ́ wun, yo man e sa é sin, afin Anannganman, wɔ yɛ a ti e Nyanmiɛn-ɔn.

¹⁹ E kacili é sin sili wɔ, siɛn'n, y'a kaci ajalɛ'n. E bɔbɔ e wun kɛ nga e yoli'n ɔ'a yo-man kpa. Ɔ man e fin e wue'n nun. E gbanflɛn nun sa nga e yoli'n ɔ yo e nyannzuɛn.›

²⁰ Efraim ti mín wa kun bɔ n klo i. Min mma'm be nun'n, i yɛ n klo i dan-an. Kɛ m ´mɛn i ndɛ'n, wuun blɛ liɛ b'a se kɛ mín nyin `kpɛn kpɛn i su-ɔ. N klo i kekleke. I ti san n ´si i aunnvuɛ.» Anannganman'n yɛ ɔ kan sɔ-ɔ.

*

²¹ «Sie nzɔliɛ mun atin'n nuan. Atin nga ɔ ´fa su'n, ajalɛ'n nga ɔ ´tu'n, `bu i akunndan kpa nan sa ɔ sin bla, Izraɛl min adeba. Sa ɔ sin bla ɔ bɔbɔ ɔ klɔ.

²² ?Nan wɔ bɔ a ti kɛ talua nyin keklefuɛ wie sa'n kɛ a ´sisi ɔ bo titi sa? Nian, Anannganman ɔ'a kpɛ like uflɛ ba mɛn'n nun. Siɛn'n, bla yɛ ɔ ko wlan-wlan kunndɛ yasua-a.»

* Aenguɛ uflɛ tralɛ

²³ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Kɛ n ko fa Zida klɔ'm be su sran nga be trali be lomuɛn n ko ba'n, be wa kan ndɛ ng'ɔ o yɛ'n ekun. Be ´se kɛ. ‹Nyanmiɛn oka, ndɛ nanwlɛ lika, man Anannganman'n yo ɔ liɛ ye!›

²⁴ Zida klɔ'n sufuɛ'm be kwlakwla, i fie difuɛ mun o, i nnɛn kankanfuɛ bɔ be wlan sin mun o, be ´ko tran lɔ.

²⁵ Afin be kwlaa nga b'a fɛ'n, n ´gua be anwlɛn su nzue. Be kwlaa nga be fɛfɛ'n, n ´fa like ng'ɔ fata'n m ´man be.»

²⁶ Kɛ n tinngeli'n, n wunnin kɛ lafilɛ nga n lafili'n ɔ yoli kpa.

²⁷ Anannganman waan: «Cɛn wie lele'n, n ´fa sran mun nin nnɛn mun n ´sanndi be Izraɛl mɛn'n nun nin Zida mɛn'n nun kɛ be sanndi ble mma'n sa.

²⁸ Kɛ n niannin nun m buli bé bo, bɔ n tuli be bo kɛ waka sa'n, bɔ n nunnunnin be, n kunnin be bɔ n yoli sa kekle'n, yɛ n wa nian nun n ´kplan be yɛ n ´ta be-ɔ.» Anannganman'n yɛ ɔ kan sɔ-ɔ.

²⁹ «Kɛ ɔ ko yo sɔ'n, be su se-man kɛ: ‹Siɛ'm be dili vinyi'n mma amuɛn'n, ɔ man ba kanngan'm be je'n ɔ'a nyan kun.›

³⁰ Sanngɛ siɛn'n, sran kun i sa tɛ liɛ ng'ɔ yo'n, i nuan wie yɛ ɔ ´wu-ɔ. Sran ng'ɔ di vinyi'n mma amuɛn'n, i bɔbɔ i je liɛ'n yɛ ɔ ´nyan-an.»

³¹ Anannganman'n waan: «Cɛn wie lele'n, e nin Izraɛl nvle'n nin Zida nvle'n e wa tra aenguɛ uflɛ .

³² Aenguɛ sɔ'n nin nga e nin be nannan mun e trali'n i nun bɔ n ´fa be Ezipt lɔ m ´ba'n, ɔ su yo-man kun. I sɔ aenguɛ liɛ'n be sacili i, sanngɛ kusu wuun min yɛ n ti be Min nin-ɔn.» Nga Anannganman'n kan'n yɛ ɔ o lɛ-ɔ.

³³ Anannganman kɛn i ekun kɛ: «Aenguɛ nga cɛn wie e nin Izraɛl nvle'n e ´tra'n yɛ: n ´fa min mmla'n n ´wla be akunndan'n nun. Sɛ n ´kwla se'n, n ´fa klɛ be anwlɛn'n nun. N ´yo be Nyanmiɛn, be kusu be ´yo min sran.

³⁴ Sran kun su kle-mɛn i wiengu like. Sran kun su se-man i niaan kun kɛ: ‹Mantan Anannganman'n.› Yɛlɛ kɛ, kɛ ɔ fɛ i be kanngan'm be nun lele b'ɔ ´fa ju be kpɛnngbɛn'm be nun'n be kwlaa be ´si min. Sa nga be yoli min'n, n ´yaci n cɛ be. N su bo-man be sa tɛ'n su di-man jɔlɛ kun .»

*

³⁵ Anannganman'n wan yoo: «?Wan yɛ ɔ yili wia'n kɛ ɔ `kpaja lika'n nun nin-ɔn? ?Wan yɛ ɔ sieli kɛ anglo nin nzraama'm be `ta kɔnguɛ nin-ɔn? ?Wan yɛ man jenvie nzue'n jaso b'ɔ bo nin-ɔn? Anannganman b'ɔ sie mɛn wunmuan nin-ɔn. Kɛ ɔ suan sɔ-ɔ.»

³⁶ Anannganman wan yoo: «Cɛn nga siesielɛ sɔ'n b'ɔ n siesieli'n ɔ wie'n. Cɛn sɔ'n nun yɛ Izraɛl nvle'n ´nunnun-ɔn.

³⁷ Cɛn nga be sunnzun nglo lɔ lika nin-ɔn ɔ yo ye'n, cɛn nga be wun asiɛ'n i bo lɔ ninnge'm be kwlaa'n, ɔ yo ye'n, i cɛn sɔ'n nun yɛ Izraɛlfuɛ'm be sa tɛ bɔ be yoli'n ti, n ´yi be blo-ɔ.» Anannganman'n yɛ ɔ kan sɔ-ɔ.

*

³⁸ Anannganman'n waan: «Cɛn wie lele be ´kplan Zerizalɛm klɔ'n Anannganman i dunman'n ti. Be ´bo i bo Ananeɛl i sasawlɛ sua'n wun lɔ be ´fa ju cɔnjɔ'n su anuan'n nun.

³⁹ Be ´fa mɛtri'n be sunnzun lika'n be ´sin Garɛb kpɔlɛ'n su kpɛkuun be ´bli Gɔat bue liɛ'n su.

⁴⁰ Fuɛn nin nzuɛn bɔ luilui o nun'n, be kongo lika ng'ɔ o lɛ ngbɛn'n lele b'ɔ ´fa ju Sedrɔn nzue ba'n nuan'n nin nnɛn kpanngɔ anuan'n i cɔnjɔ'n su wia afiliɛ lɔ lika liɛ nun'n, i sɔ lika'm be kwlakwla be ´yo min liɛ. Be su saci-man be, be su nunnun-man be le.»