Zeremi 30 - NYANMIƐN NDƐ'N 1998

Like nga Anannganman waan ɔ ´yo man Izraɛlfuɛ mun'n

¹ Anannganman'n kannin ndɛ ng'ɔ o yɛ'n kleli Zeremi. I waan:

² «Min bɔ n ti Anannganman'n bɔ n ti Izraɛl Nyanmiɛn'n, min wan yoo: ‹Ndɛ nga n kan kleli wɔ'n, klɛ be kwlakwla'n fluwa kun nun.›

³ Min Anannganman min wan yoo: ‹Nian, cɛn wie lele'n, min nvle'n nunfuɛ mun bɔ be yɛlɛ Izraɛlfuɛ mun nin Zidafuɛ mun'n, n ´fa be n ´sa n sin mɛn nga n fa mannin be nannan mun'n i nun. Be ´fa yo be liɛ.› »

⁴ Izraɛl nin Zida bé wun ndɛ nga Anannganman'n kannin'n yɛ.

⁵ I waan: «Awlaboɛ nganniɛn tɛ, srɛ kun sran sɔ nga be kpan'n. Bé wla ti-man ase guawa.

⁶ Amun `usa-usa be nian, sɛ yasua ɔ'a cinnjin ɔ'a wu ba le o. ?Yɛ wuun ɔ yo sɛ ti yɛ yasua'm be lɛ be wi'n nun kɛ wunnzɛfuɛ bɔ ba wulɛ ɔ'a to i sa nin-ɔn? ?Ɔ yo sɛ ti yɛ be nyrun'n wa yo sukusuku sɔ-ɔ?

⁷ Nguɛ nyrɛnnɛn liɛ yɛlɛ nga! Afin cɛn sɔ'n yo sro, be nian wun-mɛn i sɔ cɛn'n wie le. Ɔ ti Zakɔb osufuɛ mun be awlaboɛ blɛ. Sanngɛ be ´fin nun fite .»

*

⁸ Anannganman'n wan yoo: «Cɛn sɔ nun'n, waka nga be fa sieli be kɔmin su'n, m ´bu nun. Nyanman nga be fa cili be'n, n ´nyannji. Be su su-man nvle uflɛ kun.

⁹ Sran nga be ´su i'n yɛlɛ min Anannganman bɔ n ti be Nyanmiɛn'n, ɔ nin David bɔ n ´fa sie be su famiɛn'n.»

*

¹⁰ Anannganman waan: «Zakɔb, min sufuɛ, nán srɛ kun wɔ Izraɛl, yaci usulɛ'n. Se kɛ sɛ, n su wa de wɔ mɛn mmua'n nun lɔ m ´ba. N su wa de ɔ osu'n nunfuɛ mun mɛn nga be ti kanga lɔ'n i nun m ´ba. Zakɔb, a ´sa ɔ sin ba, a ´di alaje, a ´tran fɔuun! Sran fi su kle-man wɔ yalɛ kun.»

¹¹ Anannganman'n kɛnnin i ekun kɛ: «N wo ɔ sin kɛ n ´de wɔ. Mɛn nga n yoli bɔ ɔ mma mun be bo sanndili be nun'n, n ´nunnun be. Ɔ liɛ'n, n nunnun-man wɔ. Sanngɛ sa nga a yoli'n su yɛ n nian n yoli wɔ sa nin-ɔn, afin n yaci cɛ wɔ sɔ-ɔ ɔ yo-man ye.»

*

¹² Anannganman'n wan yoo: «Kannin nga ɔ'a tu wɔ'n, ɔ yo sro. Ɔ wu-ɔ ɔ yo-man ye.

¹³ Sran fi bu-man wɔ akunndan nan se kɛ ɔ ´fua ɔ́ kannin'n. Nán ayre kpa yɛ be ko fa ko ta nun-ɔn.

¹⁴ Be kwlaa nga be klo wɔ'n, bé nyin nun-man ɔ su kun. Be bua-man ɔ ndɛ nun kun. Afin kɛ n ´yo wɔ like yaya'n, n yoli wɔ kɛ n klo-man wɔ sa sa. Kɛ n ko kle wɔ nyrɛnnɛn'n yɛ n kleli wɔ-ɔ. Ɔ sa tɛ nga a yoli'n, be sɔnnin yɛ be ti dandan.

¹⁵ ?Ɔ yo sɛ yɛ a fɛfɛ ɔ kannin sroesroe'n b'ɔ wu-ɔ ɔ yo-man ye'n ti-ɔ? Ɔ sa tɛ nga a yoli'n sɔnnin ngboko. I ti yɛ n yoli wɔ sɔ-ɔ.

¹⁶ Sanngɛ sɛ n ´kwla se'n, be kwlaa nga be kpisali wɔ, be mɛnnin wɔ bi'n, be ´kpisa be be ´mɛn be bi wie. Be ´tra ɔ kpɔfuɛ'm be kwlaa be ´kɔ. Be nga be sacili ɔ́ bo ninnge mun'n, be ´saci be liɛ'n wie. Be nga be fɛnnin ɔ́ bo ninnge'n, n ´yaci be ninnge liɛ'n kusu lɛ man be ´fɛn.

¹⁷ Kɛ bɔ be fa fuanlɛ bɔ n fuannin wɔ'n be fa se wɔ nun'n, bɔ be flɛ wɔ kɛ Siɔn bla bɔ sran fi flɛ-mɛn i'n ti n wa yo wɔ juejue. N wa fua ɔ́ kannin mun.» Anannganman'n yɛ ɔ kannin sɔ-ɔ.

*

¹⁸ Anannganman'n wan yoo: «An `nian, n wa fa Zakɔb i osu nunfuɛ nga be trali be lomuɛn'n n ´sa be sin be tannin sua'm be nun. N ´si i awlofuɛ'm be aunnvuɛ, be ´kplan klɔ nvuɛn'n su. Be ´kplan sua kpakpa mun klɔ nvuɛn'n su.

¹⁹ Be wa to jue, be ´bo sro. N ´yo man be ´trɛ. Be su ka-man kaan. M ´man be kɔmin su ɔ man be su yo-man be finfin.

²⁰ Be ´yo kɛ laa'n sa. Be wa yia min ja su. Be nga be kle be yalɛ'n, e nin be e ´yia nun.

²¹ Be nvle'n nunfuɛ kun yɛ ɔ ´yo be kpɛnngbɛn-ɔn. Be nvle'n nunfuɛ kun yɛ ɔ ´yo be siefuɛ-ɔ. N ´yo man Zakɔb ´fɛ i wun mantan min ɔ ´ba min wun. ?Afin kɛ wan sa yɛ i bɔbɔ kwla si i wue nun kɛ ɔ ´fɛ i wun mantan min-ɔn?» Anannganman'n yɛ ɔ usa sɔ-ɔ.

²² «Amun wa yo min nvle. N kusu n ´yo amun Nyanmiɛn.»

*

²³ «Anannganman i aunngban'n su ba kusu, ɔ'a fa ya kekle kpa. I aunngban dan'n ɔ kpɛ sin sa tɛ yofuɛ'm bé ti su.

²⁴ Anannganman i ya dan ng'ɔ fali'n, ɔ ´yo i kwlaa ng'ɔ guguli kɛ ɔ ´yo'n kwlaa nan ɔ'a wie. Cɛn kun amun ´wun i sɔ'n i wlɛ.»