Zeremi 3 - NYANMIƐN NDƐ'N 1998

Ɔ tekle liɛ'n, kɛ ɔ'a yo wɔ

¹ Anannganman'n usa kɛ: «?Sɛ sran kun yrɛ i yi'n nan bla'n jaso ko ja bian uflɛ'n, kɛ ɔ o lɛ'n, yasua klikli'n kwla sɛ i sin ja bla sɔ'n ekun? ?Sɛ ɔ yo sɔ'n, nán tete yɛ ɔ'a bo i mɛn'n nun-ɔn? Sɛ n ´kwla se'n, a ko bo tekle'n lele, kpɛkuun a sa wɔ sin a ba min jalɛ ekun.

² Man ɔ́ nyin'n su, nian oka mun nian. ?Ninfan cɛ yɛ w'a fa-man ɔ́ wun a man-man-an? A trannin atin'n nuan yɛ a minndɛli ɔ sran mun kɛ kakajefuɛ mun sa. A fa ɔ tekle bolɛ'n nin wɔ aeliɛ tɛtɛ'n saci mɛn'n.

³ I ti nzue'n ɔ'a tɔ-man. Wawa nun nzue'n ɔ'a tɔ-man. Sanngɛ ɔ waan san tekle'n cɛ yɛ a ´bo-ɔ, nán nyan yɛ a ko sa-a.

⁴ Kɛ e ´se yɛ'n bɔ a se min kɛ: ‹?Mín si bɔ kɛ ɔ fin min kaan nun yɛ ɔ nin min trali janvuɛ'n,

⁵ kɛ ɔ ´fa min wun ya'n sa titi? ?Kɛ mín wun sa ´trɛn i klun sa titi?› A kɛn i sɔ cɛ, sanngɛ nán kɛ a ´yaci sa tɛtɛ yolɛ'n le ti-ɔ.»

Izraɛl b'ɔ ti kɛ bian safuɛ'n sa'n ɔ nin Zida nvle b'ɔ kunndɛ bian i wun bo'n

⁶ Famiɛn Zozias i blɛ su'n, Anannganman'n seli min kɛ: «?A wun sa nga Izraɛl b'ɔ ti kɛ bian safuɛ'n sa'n, ɔ yo'n? Ɔ lɛ-man oka kun ng'ɔ fu-man su-ɔ, ɔ lɛ-man waka b'ɔ lɛ nnya b'ɔ kɔ-mɛn i bo ko bo-man tekle-ɔ .

⁷ N seli min wun kɛ: Sɛ ɔ yo lele'n, ɔ ´sɛ i sin ´ba. Kannzu ato-ɔ, ɔ'a sɛ-mɛn i sin. I niaan bla Zida b'ɔ kunndɛ bian min bo'n ɔ wunnin sa sɔ'n b'ɔ yo'n.

⁸ Ɔ wunnin kɛ tekle nga Izraɛl b'ɔ ti kɛ bian safuɛ'n sa'n boli'n ti n ko mɛnnin i yralɛ fluwa n yacili i'n. Sanngɛ Zida b'ɔ kunndɛ bian min bo'n, srɛ ɔ'a kun-mɛn i. I kusu ko boli i tekle liɛ.

⁹ Izraɛl fɛli i tekle b'ɔ ´bo-ɔ ɔ fia-man'n fa sacili mɛn'n. Ɔ yacili min lɛ ko sɔli yɛbuɛ mun nin waka mun.

¹⁰ Sanngɛ ɔ nin i sɔ'n ngba'n i niaan bla Zida b'ɔ kunndɛ bian min bo'n, ɔ'a sɛ-mɛn i sin mín wun nanwlɛ su, ɔ kpɛli min gblɛ .» Anannganman'n yɛ ɔ kan sɔ-ɔ.

¹¹ Anannganman'n seli min kɛ: «Izraɛl b'ɔ ti kɛ bian safuɛ'n sa'n ɔ bɔn fannin tra Zida bɔ i kusu kunndɛ bian min bo'n.

¹² Ɔ man `bo ndɛ ng'ɔ o yɛ'n i ndolo mɛn'n i nglo lɔ lika'n nun se kɛ: ‹Anannganman'n wan yoo: Izraɛl b'ɔ ti kɛ bian safuɛ sa'n, sa ɔ sin bla. N ti aunnvuɛ sifuɛ, n su fa-man ɔ́ wun ya tantrantan kun. Ɔ wun sa su tran-man min klun titi kun.

¹³ Ɔ man i ti'n, di ɔ́ sa tɛ'n i nanwlɛ: Nyin kekle nga a yoli i min Anannganman ɔ Nyanmiɛn'n min su'n, kan. A wanndi ɔli nvle uflɛ'm be amuɛn'm bé sin, a ɔli waka nga be lɛ nnya'n be kwlaa be bo. W'a tie-man min aniɛn'n.› » Anannganman'n yɛ ɔ kan sɔ-ɔ.

Zidafuɛ'm be sin salɛ

¹⁴ Anannganman'n wan yoo: «Amun b'ɔ amun ti kɛ bian safuɛ'n sa'n mun, an `sa amun sin bla. Afin amun Min'n yɛlɛ min. N ´fa amun nun sran kun klɔ wie'm be su, n ´fa sran nnyɔn awlobo wie'm be nun, n ´fa amun sɔ trilili n sin yia nun yɛ n ´fa amun m ´ba Siɔn.

¹⁵ N ´fa kpɛnngbɛn nga min klun jɔ bé wun'n m ´man amun. Be ´kle amun atin'n kpa kɛ ɔ fata'n sa.»

¹⁶ Anannganman'n wan yoo: «Kɛ amun wa trɛ bɔ amun ´sɔn kpanngban mɛn'n nun'n, be su kan-man Anannganman i alaka'n i ndɛ kun. Be su bu-mɛn i akunndan kun, bé wla su kpɛn-mɛn i su kun. Be su koko-mɛn i kun, be su bobo-man uflɛ .

¹⁷ I blɛ sɔ nun'n, be ´flɛ Zerizalɛm klɔ'n kɛ: Anannganman I Famiɛn Bia. Nvle'm be kwlaa be ´ba min wun wunlɛ Zerizalɛm lɛ. Be ´yaci be akunndan tɛtɛ bɔ i cɛ yɛ be waan be ´fa su'n.

¹⁸ I sɔ blɛ nun'n, Zidafuɛ'm be nin Izraɛl akpasua nunfuɛ'm be ´sanngan, kpɛkuun be ´fin mɛn'n i nglo lɔ lika'n nun be ´ba likawlɛ. Be ´ba mɛn nga n fa mannin amun nannan mun kɛ be aja sa'n i nun.»

Izraɛl b'ɔ ti kɛ bian safuɛ'n sa'n i Nyanmiɛn sin balɛ (Anannganman waan)

¹⁹ Sɛ n ´kwla se'n, laa n waan: «N klo kɛ n ´fa wɔ n ´yo min wa yasua klikli nan m ´man wɔ mɛn klanman kpa kun bɔ i yɛ ɔ ti mɛn'm be kwlakwla be nun klanman nin-ɔn. N waan: ‹A wa flɛ min kɛ Baba.› A su kpɔci-man min.

²⁰ Sanngɛ kpɛkuun amun Izraɛlfuɛ mun, amu'an kpɛ min gblɛ kɛ bla kun kpɛ i wun gblɛ b'ɔ kunndɛ bian i bo'n sa.» Anannganman'n yɛ ɔ kan sɔ-ɔ.

²¹ Nganniɛn kun tɛ oka'm be su, Izraɛlfuɛ mun yɛ be sun be kpata min-ɔn. Sunlɛ bɔ be sun'n yɛlɛ kɛ be tuli ajalɛ tɛ. Be wla fili min Anannganman b'ɔ n ti be Nyanmiɛn'n.

²² «Amun bɔ amun ti kɛ bian safuɛ sa'n, an `sa amun sin bla, man n yo nan amún bian sa'n ɔ wie.» «E yɛ e o yɛ, y'a ba ɔ́ sin Anannganman, afin wɔ yɛ a ti e Nyanmiɛn nin-ɔn.

(Izraɛlfuɛ'm be waan)

²³ Sakpa, amuɛn nga be sɔ be kpɔlɛ'm be su lɔ'n, nin oka'm bé su'n i nganniɛn ng'ɔ gua e su wa'n ɔ ti ngbɛn. Sakpa Anannganman e Nyanmiɛn'n i kunngba i fanngan nun yɛ e kwla nyan é ti-ɔ.

²⁴ Kɛ ɔ fin e kaan nun lele'n, nyannzuɛn like sɔ'n dili ninnge nga é si'm be nyɛnnin i'n. Ɔ dili bé boli nin be bua, ɔ nin be nannin mun. Ɔ dili be mma yasua nin bla mun.

²⁵ E la nyannzuɛn nun siɛn'n. Nyannzuɛn'n yɛ e fa kata e su kɛ kondro sa-a. Afin kɛ ɔ fin e kaan nun b'ɔ ´fa ju ndɛ'n, e nin é si mun e fɔnnin Anannganman e Nyanmiɛn'n i wun. Y'a tie-man Anannganman e Nyanmiɛn'n i aniɛn'n.»