Zeremi 29 - NYANMIƐN NDƐ'N 1998

Fluwa nga Zeremi klɛ ko mannin be nga be trali be lomuɛn'n

¹ Zeremi klɛli fluwa Zerizalɛm lɔ ko mannin kpɛnngbɛn nga be nyin wo su'n nin Nyanmiɛn nyrun jranfuɛ mun, nin Nyanmiɛn nuan ijɔfuɛ mun, nin Izraɛlfuɛ nga be trali be lomuɛn Zerizalɛm lɔ ɔli Babilɔni'n be kwlaa.

² Kɛ ɔ ´klɛ'n, wuun famiɛn Zekɔnias, nin i nin, nin awa junman difuɛ kpakpa mun, nin Zida nin Zerizalɛm famiɛn i awlo lɔ sran dandan mun, ɔ nin ajuin difuɛ mun b'a tu Zerizalɛm lɛ b'a ɔ.

³ Sedesias b'ɔ ti Zida famiɛn'n sunmannin Safan i wa Eleaza, nin Ilkiza i wa Gɛmaria. Ɔ sunmannin be Nɛbikadnɛzar b'ɔ ti Babilɔni famiɛn'n i wun lɔ, yɛ Zeremi fɛ i fluwa'n mannin be-ɔ. Ndɛ ng'ɔ klɛli i nun'n yɛ:

⁴ «Anannganman b'ɔ sie mɛn wunmuan'n, Izraɛl Nyanmiɛn'n waan be se be kwlaa nga be trali be lomuɛn Zerizalɛm fa ɔli Babilɔni'n be kɛ:

⁵ ‹An `kplan sua an `tran nun. An `di fie nan an `di i su like.

⁶ An `fa bian annzɛ bla nan an wu ba. An `fa bla man amun mma yasua mun. An `fa amun mma bla mun man aja. Man be wu ba. Amun `trɛ lɔ, nán amun ka kaan.

⁷ An `kunndɛ klɔ nga n trali amun ɔli su'n i kpa yolɛ. An `srɛ Anannganman'n be mɛn i. Afin sɛ ɔ nyan muae'n yɛ amun kusu amun ´nyan wie-ɔ.› »

⁸ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Nán amun tran lɛ man be nga be tɔn bé wun suɛn kɛ be ti Nyanmiɛn nuan ijɔfuɛ nga be nin amun o lɔ'n, ɔ nin be nga be yi wunnzue'n be `lakalaka amun. Laliɛ nga amun cɛn be'n, nán an fa yo nanndoliɛ like.

⁹ Be tɔn bé wun suɛn kɛ be ijɔ mín nuan, sanngɛ ato yɛ be bua-a. M'an sunman-man be.» Anannganman'n yɛ ɔ kan sɔ-ɔ.

¹⁰ Ndɛ nga Anannganman'n kɛn i ekun'n yɛ: «Kɛ Babilɔni'n i sielɛ'n i afuɛ ableso ko ju'n, n wa jran amun sin. Kpɛkuun amún wun ndɛ nga n kannin'n, n ´yiɛ i nuan: N ´fa amun m ´ba lika nga nun wa ekun.»

¹¹ Anannganman'n kannin ndɛ ekun, i waan: «Amún wun akunndan nga m bu'n, m bɔbɔ min yɛ n si i-ɔ. Akunndan kpa yɛ m bu i amun wun-ɔn, nán akunndan tɛ-ɔ. N kunndɛ kɛ amun nyrun atin'n yo weiin.

¹² I blɛ sɔ nun'n, sɛ amun srɛ min'n, n ´yaci amun nun amun ´kɔ. Sɛ amun flɛ min'n, nan an srɛ min'n, n ´ti amun srɛlɛ'n.

¹³ Sɛ amun tu amun klun kunndɛ min, amun ´wun min,

¹⁴ afin n ´kplin su kɛ amun `wun min. N ´yi amun nvle nin lika nga be trali amun lomuɛn ɔli nun'n be kwlaa be nun fite. N ´yiayia amun yɛ n ´fa amun sa amun sin lika nga n fuannin amun nun wa ɔli'n i nun.» Anannganman'n yɛ ɔ kan sɔ-ɔ.

¹⁵ Nan «Nyanmiɛn'n mannin ye i nuan ijɔfuɛ Babilɔni wa» bɔ amun kan'n, amun `yaci i kanlɛ.

¹⁶ Famiɛn'n ng'ɔ ti famiɛn David i bia'n su'n nin sran nga be o klɔ nga nun'n, bɔ be yɛlɛ amun niaan nga b'a tra-man be b'a ɔ-man'n, Anannganman kan be wun ndɛ.

¹⁷ I b'ɔ sie mɛn wunmuan'n i waan: «An `nian, n wa fa alɛ nin awe, ɔ nin tukpacɛ b'ɔ sa ndɛndɛ n ´yi be su. N ´yo man be ´kaci kɛ figie mma bɔ b'a kplɔ bɔ be di be-ɔ, ɔ yo-man ye'n sa.

¹⁸ N ´fa alɛ nin awe, ɔ nin tukpacɛ b'ɔ sa ndɛndɛ n ´su be su. N ´yo man asiɛ'n su famiɛn diwlɛ'm be wun be-ɔ be ´yo be sro.

¹⁹ Sa ti bɔ n ´yo be sɔ'n yɛlɛ min ndɛ bɔ n kan kleli be bɔ b'a tie-man'n.» Anannganman'n yɛ ɔ kan sɔ-ɔ. Ɔ kɛn i ekun kɛ: «N sunmannin min sufuɛ bɔ yɛlɛ min nuan ijɔfuɛ mun be sin, n sɔtɔli be sunmanlɛ-ɔ nán andɛ-ɔ. Sanngɛ be waan nán be yɛ be ko ti-ɔ.

²⁰ Sanngɛ amun liɛ'n, amun bɔ n trali amun Zerizalɛm n fa ɔli Babilɔni'n, an `tie min nuan ndɛ'n.»

²¹ Anannganman b'ɔ sie mɛn wunmuan'n, Izraɛl Nyanmiɛn'n wan yoo: «Kɔlaza i wa Akab nin Maazeza i wa Sedesias bɔ be tɔn bé wun suɛn kɛ be ijɔ mín nuan'n, bé wun ndɛ bɔ n kan'n yɛ: ‹An `nian, n ´fa be n ´wla Babilɔni famiɛn Nɛbikadnɛzar sa nun, ɔ ´kun be amun nyrun.

²² Zidafuɛ nga be fali be ɔli Babilɔni'n, be ´fa be dunman'n fa bo sannzan kɛ: Man Anannganman yo wɔ kɛ ɔ fa yoli Sedesias nin Akab bɔ Babilɔni famiɛn'n yili be sin nun'n sa.

²³ Sa ti b'ɔ ´yo sɔ'n yɛlɛ kɛ be boli tete Izraɛl nvle'n nun. Be kunndɛli be wiengu'm bé yi mun, yɛ m'an sunman-man be kpɛkuun be ɔli kɛ be su ijɔ mín nuan. N si i kwlakwla ng'ɔ o lɛ'n nun, ɔ yoli min nyrun.› » Anannganman'n yɛ ɔ kan sɔ-ɔ.

Sɛmaɛza i fluwa ng'ɔ klɛli'n i su ndɛ

²⁴ Anannganman b'ɔ sie mɛn wunmuan'n, Izraɛl Nyanmiɛn'n mannin Zeremi ndɛ kun kɛ ɔ `kan man Sɛmaɛza b'ɔ fin Neselam'n.

²⁵ Afin Sɛmaɛza sili i wue nun klɛli fluwa ko mannin sran nga be o Zerizalɛm'n nin Nyanmiɛn nuan ijɔfuɛ Maazeza i wa Sofoni, ɔ nin Nyanmiɛn nyrun jranfuɛ mun kɛ:

²⁶ «Sofoni, Anannganman'n fali wɔ sieli i Zɛozada osu kɛ a `yo Nyanmiɛn nyrun jranfuɛ kɛ ɔ ko yo nan w'a nian Nyanmiɛn i sua'n su, nan sran nga be ijɔ finfin'n bɔ be blɔ bé wun kɛ be ti Nyanmiɛn nuan ijɔfuɛ'n, w'a ci be kwlaa nin jrɔkɔ, nan w'a wla be kɔmin kaa'n ti.

²⁷ ?Yɛ ɔ yo sɛ yɛ man Zeremi b'ɔ ti Anatɔtfuɛ'n b'ɔ se i wun kɛ ɔ ti Nyanmiɛn nuan ijɔfuɛ'n ɔ nin amun o lɔ-ɔ? ?Ɔ yo sɛ yɛ man ɔ blɛli ye fluwa Babilɔni wa b'ɔ kɛnnin i nun kɛ:

²⁸ ‹An wa cɛ lɔ, an `kplan sua nan an tran nun, an `di fie nan an di i su like nin-ɔn?› ?Ɔ yo sɛ ti yɛ a tɛ-mɛn i su-ɔ?»

²⁹ Nyanmiɛn nyrun jranfuɛ Sofoni kanngannin fluwa sɔ'n Nyanmiɛn nuan ijɔfuɛ Zeremi nyrun.

³⁰ Yɛ Anannganman'n seli Zeremi kɛ:

³¹ «Sunman sran man ɔ ko se be nga be trali be lomuɛn wa ɔli'n be kɛ Sɛmaɛza b'ɔ ti Neselamfuɛ'n i wun ndɛ yɛ: i ndɛ ng'ɔ kan kle amun'n, ɔ kɛn i ngbɛn, m'an sunmɛn-mɛn i. Amún wla b'ɔ cici ti ngbɛn.»

³² Anannganman'n wan yoo: «E nin Sɛmaɛza b'ɔ ti Neselamfuɛ nin i osu'n y'a nyɛn i. I fuɛ'm be nun kun sa i nyin su tran-man su nan se kɛ nɛnnɛn nga n ´di min nvlefuɛ mun'n ɔ ´wun nun. Sa ti b'ɔ ´yo sɔ'n yɛlɛ kɛ ɔ su sran'm be bo kɛ nán be nyin yi min.»