Zeremi 27 - NYANMIƐN NDƐ'N 1998

Zeremi i kɔmin su waka sualɛ

¹ Kɛ Zozias b'ɔ ti Zida famiɛn'n i wa Sedesias boli mɛn'n i sielɛ bo'n, Anannganman kannin ndɛ yɛ'n kleli Zeremi. Ɔ seli i kɛ:

² «Yo nyanman nga be fa ci sran'n ɔ nin be kɔmin su waka fa sie ɔ kɔmin su.

³ Kpɛkuun sunmanfuɛ nga be bali famiɛn Sedesias wun wunlɛ Zerizalɛm'n, fa man be man be fa ko man Edɔm famiɛn'n, nin Moab famiɛn'n, nin Amɔnfuɛ'm be famiɛn'n, nin Tir famiɛn'n, ɔ nin Sidɔn famiɛn'n.

⁴ Ndɛ nga n kan kleli wɔ'n, kan kle be man be ko koko kle bé min mun. Se be kɛ Anannganman b'ɔ sie mɛn wunmuan'n, Izraɛl Nyanmiɛn'n waan amun `ko kan ndɛ yɛ'n kle amun min mun.

⁵ I waan: ‹M bɔbɔ min yɛ n yili asiɛ'n nin sran mun, ɔ nin nnɛn nga be o asiɛ'n su mun-ɔn. Min fanngan nin min kwlalɛ'n be ti yɛ man n yili be-ɔ. Sɛ min waan n ´fa asiɛ'n m ´man sran wie'n, n su fa mɛn i n klun klo.

⁶ Ɔ man m'an fa mɛn ng'ɔ o yɛ'n i kwlakwla m'an wlɛ i Nɛbikadnɛzar b'ɔ ti Babilɔni famiɛn'n i sa nun. Bo nun nnɛn mun bɔbɔ, m'an fa be m'an mɛn i kɛ be su i.

⁷ Nvle'm be kwlaa be ´su i nin i wa'n, ɔ nin i anunman'n. Be ´su be lele san nvle nga b'a tin'n nin famiɛn dandan mun be ´fa be mɛn liɛ'n kusu.

⁸ Nvle nin famiɛn diwlɛ kun nga'm be nunfuɛ mun be waan be su-man Nɛbikadnɛzar b'ɔ ti Babilɔni famiɛn'n, sɛ be waan be fa-man be kɔmin'n mɛn-mɛn i nan ɔ sie-man su be kɔmin su waka'n, n ´fa alɛ'n nin awe'n, ɔ nin tukpacɛ b'ɔ sa ndɛndɛ'n n ´fa yi i sɔ nvle liɛ'm be su lele san be ´nunnun treketreke.›

⁹ Nan i ti'n, sɛ amun kɔmiɛn mun, nin amun ngɔnyinman yifuɛ mun, nin amun laliɛ cɛnfuɛ mun, nin amun nzraama kannganfuɛ mun, ɔ nin amun bae difuɛ'm be se amun kɛ: ‹Amun su ko su-man Babilɔni famiɛn'n,› nán amun fa su.

¹⁰ Ndɛ nga be kan kle amun'n ti ato, sɛ amun tie-ɔ, be ´tra amun kɔ mɛn wie nun. N ´fuan amun wa, amun ´wu.

¹¹ Nvle nga kusu bɔ i nunfuɛ'm be fa be kɔmin'n man Babilɔni famiɛn'n nan ɔ sie su be kɔmin su waka nan be su i'n, n ´yo man be ´di alaje famiɛn sɔ'n i mɛn'n nun. Be ´di fie lɔ be cɛ, lɔ yɛ be ´tran-an.» Anannganman'n yɛ ɔ kan sɔ-ɔ.

¹² Ndɛ kunngba sɔ'n yɛ n kan kleli famiɛn Sedesias-ɔ. N seli i kɛ: «An `fa amún kɔmin'n man Babilɔni famiɛn'n man ɔ sie su be kɔmin su waka. An `su i, an `su i nvle'n nan amu'an nyan nguan.

¹³ ?Kɛ alɛ'n, nin awe, ɔ nin tukpacɛ b'ɔ sa ndɛndɛ'n be kun wɔ nin ɔ nvlefuɛ mun'n, i kpa lika'n yɛlɛ onin? Afin Anannganman'n waan nvle nga i nunfuɛ'm be waan be su-man Babilɔni famiɛn'n, sa nga be o lɛ'n be ´tɔ be su.

¹⁴ Nyanmiɛn nuan ijɔfuɛ nga be se amun kɛ: ‹Amun su su-man Babilɔni famiɛn'n› ato yɛ be bua kle amun-ɔn, nán an fa be ndɛ'n su.»

¹⁵ Anannganman wan yoo: «M'an sunman-man be. Bé wun suɛn yɛ be tɔn i kɛ be ijɔ mín nuan lɛ ngbɛn-ɔn. Sɛ amun tie be ndɛ'n, n ´fuan amun, amun ´wu, amun nin be nga be tɔn bé wun suɛn kɛ be ti min nuan ijɔfuɛ sɔ mun yɛ amun ´wu-ɔ.»

¹⁶ N kan kleli Nyanmiɛn nuan ijɔfuɛ nin sran'm be kwlaa kɛ: «Anannganman'n wan yoo: ‹Amun sran'm bɔ be tɔn bé wun suɛn kɛ be ti min nuan ijɔfuɛ nga be se amun kɛ: Anannganman'n i sua nun ninnge nga be fa ɔli Babilɔni ɔ cɛ kaan be wa fa ba'n, nán amun tie ndɛ nga be kan'n, ato yɛ be bua-a.

¹⁷ Nán amun tie, an `su Babilɔni famiɛn'n. Sɛ an su i'n, amun ´nyan nguan. ?Kɛ klɔ nga ´nunnun mlɔnmlɔn'n, i klanman liɛ'n yɛlɛ onin?›

¹⁸ Sɛ be waan be ti Nyanmiɛn nuan ijɔfuɛ nan Anannganman'n ijɔ kle be'n, man be srɛ Anannganman b'ɔ sie mɛn wunmuan'n nan ninnge nga be kɛli i sua nun'n nin Zida famiɛn'n i sua'n nun'n, ɔ nin Zerizalɛm ninnge mun'n, nán be fa be wɔ Babilɔni.

¹⁹ Afin Anannganman lɛ ndɛ kɛni sua ja mlomlo mun nin kpongbo dan'n, nin kpongbo nga be kondo be mun, ɔ nin ninnge uflɛ nga be kali klɔ nga su'n be su .

²⁰ Kɛ bɔ famiɛn Nɛbikadnɛzar ´fa Zida famiɛn Zozakim i wa Zekɔnias nin Zida nin Zerizalɛm kpɛnngbɛn mun Zerizalɛm lɛ ´kɔ Babilɔni'n, ɔ'a fa-man ninnge sɔ mun.

²¹ Ninnge nga be kali Anannganman i sua'n nun'n nin Zida famiɛn'n i sua nun'n, ɔ nin Zerizalɛm klɔ nun'n, bé wun ndɛ bɔ Anannganman b'ɔ sie mɛn wunmuan'n, Izraɛl Nyanmiɛn'n ɔ kan'n yɛ. I waan:

²² ‹Ninnge sɔ mun'n, be ´fa be kɔ Babilɔni, be ´ka lɔ lele san m bɔbɔ min yɛ n ´ko fa be lɔ m ´ba lika nga nun wa-a.› » Anannganman'n yɛ ɔ kan sɔ-ɔ.