Zeremi 26 - NYANMIƐN NDƐ'N 1998

Sran'm be waan be ´kun Zeremi

¹ Zozias b'ɔ ti Zida famiɛn'n i wa Zozakim'n i famiɛn dilɛ'n i bo bolɛ nun'n, Anannganman'n kannin ndɛ yɛ'n kleli Zeremi. I waan:

² «Anannganman'n wan yoo: ‹Ko jran min sua'n i awlo klun'n nun nan kan ndɛ nga n ´fa wla ɔ́ nuan yɛ'n kwlaa kle sran nga be fin Zida klɔ klɔ'm be su ba min bo kotolɛ'n, kan ndɛ sɔ'n kwlaa kle be. Nán yaci wie lɛ.

³ Nja, sɛ be ti-ɔ, sɛ be kwlaa be ´yaci bé sa tɛ yolɛ nin o. I liɛ'n, wuun akunndan tɛ nga be aeliɛ tɛtɛ'n ti n sunnzunnin i nin be'n, n ´fa fli be.› »

⁴ Se be kɛ Anannganman'n wan yoo: «Amun `tie ndɛ nga n kan'n, amun `nian min mmla bɔ n fa mannin amun'n su.

⁵ Amun `sie amún su min sufuɛ bɔ yɛlɛ min nuan ijɔfuɛ bɔ n sunmannin be amun sin'n be ndɛ bɔ be kan'n i bo. N sɔtɔli be sunmanlɛ nan andɛ sa-a, sanngɛ amun waan nán amun yɛ amun ko tie-ɔ.

⁶ Sɛ amu'an tie-man, sa nga n fa yoli Silo'n, i kunngba'n yɛ n ´fa yo min sua nga-a. Yɛ n ´yo man mɛn'n nun nvle-nvle'm be kwlakwla be ´bo klɔ nga dunman be ´fa bo sannzan.»

⁷ Nyanmiɛn nyrun jranfuɛ mun nin Nyanmiɛn nuan ijɔfuɛ mun, ɔ nin sran nga be o lɛ'm be kwlaa be tili ndɛ nga Zeremi kɛnnin i Anannganman i sua'n i awlo klun nun lɔ'n.

⁸ Kɛ Zeremi wieli ndɛ nga Anannganman'n fa wlɛli i nuan kɛ ɔ `kan kle sran'm be kwlaa'n kan cɛ'n, yɛ be trɛli i-ɔ. Be waan: «A wuli yɛ a o lɛ! A wuli yɛ a o lɛ!

⁹ ?Wan yɛ ɔ tuli wɔ kɛ a se kɛ Anannganman'n waan: ‹Sua nga ´yo kɛ Silo fa yoli'n sa nan ɔ ´nunnun, nan sran su tran-man su kun nin-ɔn?› » Yɛ be kwlaa be ´kpɛ sin yia Zeremi Nyanmiɛn i sua'n i awlo'n nun-ɔn.

¹⁰ Kɛ Zida famiɛn'n i awlo lɔ sran dandan'm be tili'n, be fin famiɛn sua'n nun lɔ be bali kɛ Anannganman'n i sua'n wo lɛ'n, be wa trannin sua'n i anuan bɔ be flɛ i kɛ Anuan Uflɛ'n nyrun lɛ.

¹¹ Yɛ Nyanmiɛn nyrun jranfuɛ mun nin Nyanmiɛn nuan ijɔfuɛ'm be seli famiɛn'n i awlo lɔ sran dandan mun nin sran nga be o lɛ'm be kɛ: «Ɔ kannin klɔ nga i wun ndɛ tɛ, yɛ amun bɔbɔ be tili i lɛ-ɔ, ɔ man i ti be `kun i.»

¹² Yɛ Zeremi seli famiɛn i awlo lɔ sran dandan mun nin sran nga be o lɛ'm be kwlaa kɛ: «Anannganman'n yɛ ɔ sunmannin min kɛ n `kan sua nga nin klɔ nga bé wun ndɛ nga an tili i lɛ nin-ɔn.

¹³ Nan i ti an `kaci amun nzuɛn'n nin amun aeliɛ mun. An `tie Anannganman amun Nyanmiɛn'n i aniɛn'n nan sa ng'ɔ kɛnnin i kɛ ɔ ´fa yo amun'n, ɔ'a fa fli amun.

¹⁴ Min liɛ'n, min yɛ n wo amún sa nun yɛ. Nga amun nian b'ɔ ti su'n, an `fa yo min.

¹⁵ Sanngɛ man amun wun i wlɛ kɛ sɛ amun kun min'n, wuun amu'an kun min ngbɛn, m'an yo-man sa, ɔ man kusu amun ´fɛ i su afɛ'n, amun o, klɔ nga o, i sufuɛ mun o, amun ´fɛ i su afɛ'n. Afin nanwlɛ, Anannganman'n yɛ ɔ sunmannin min amun sin kɛ n kan ndɛ sɔ'n kwlakwla n kle amun-ɔn.»

¹⁶ Kpɛkuun famiɛn i awlo lɔ sran dandan mun nin sran nga be o lɛ'm be kwlaa be seli Nyanmiɛn nyrun jranfuɛ mun nin Nyanmiɛn nuan ijɔfuɛ'm be kɛ: «Bian nga nin wulɛ fata-man. Anannganman e Nyanmiɛn'n yɛ ɔ fali ndɛ ng'ɔ kannin'n wlɛli i nuan kɛ ɔ `kan-an.»

¹⁷ Kpɛnngbɛn'm be wie bɔbɔ be jasoli nan b'a se nzrafuɛ'm be kɛ:

¹⁸ «Ezekias b'ɔ ti Zida famiɛn'n i blɛ su'n, Mise b'ɔ fin Mɔresɛt'n ɔ kannin Nyanmiɛn nuan ndɛ kleli Zidafuɛ'm be kwlaa kɛ: ‹Anannganman b'ɔ sie mɛn wunmuan'n wan yoo: Siɔn ´yo kɛ asiɛ bɔ b'a funndan nun sa. Zerizalɛm ´kaci kɛ yɛbuɛ yɛ b'a tiɛn i nuan'n sa, yɛ oka nga Nyanmiɛn i sua'n wo su'n ɔ ´kaci bo.›

¹⁹ ?I sɔ bɔ Mise kannin'n ti man Ezekias b'ɔ ti famiɛn'n nin Zidafuɛ'm be kunnin i? Ezekias buli Anannganman'n i sran yɛ ɔ kpɛtɛli i, ɔ man kusu sa nga Anannganman'n waan ɔ ´fa yi be su'n ɔ fa flili be. Kpɛkuun e bɔbɔ e ´yo é wun tɛ dan kɛ nga sa.»

Zozakim man be kunnin Iri b'ɔ ti Nyanmiɛn nuan ijɔfuɛ'n

²⁰ Sran'm be nun kun ekun kannin Nyanmiɛn nuan ndɛ. Sɛmaɛza i wa-a, be flɛ i kɛ Iri, ɔ fin Kirzat-Zearim. E klɔ'n nin e mɛn'n i wun ndɛ nga Zeremi kɛnnin i yɛ'n, ɔ kannin wie.

²¹ Kɛ famiɛn Zozakim nin i sonja mun, ɔ nin i awlo lɔ sran dandan'm be tili Iri i ndɛ b'ɔ kannin'n, bɔ be kunndɛ kɛ be kun i'n, ɔ tili, yɛ srɛ'n b'ɔ kunnin i'n ti'n ɔ wanndi ɔli Ezipt.

²² Kpɛkuun famiɛn Zozakim sunmannin sran Ezipt. Ɔ sunmannin Akbɔr i wa Ɛlnatan nin sran wie mun i sin.

²³ Be ko trali Iri Ezipt lɔ be fa bali famiɛn Zozakim ja su nan ɔ'a yo man b'a kun i nin tokofi, nan b'a yi i fuɛn'n sran nga be lɛ-man nyrun'n be kunman'n nun.

²⁴ Safan i wa Asikam li yɛ ɔ sasali Zeremi yɛ man b'a fɛ-mɛn i b'a man-man sran'm be kɛ be `kun i-ɔ.