Zeremi 25 - NYANMIƐN NDƐ'N 1998

Be trali Izraɛlfuɛ'm be lomuɛn afuɛ ableso

¹ Zida nvle'n i wun ndɛ nga Nyanmiɛn kan kleli Zeremi'n yɛ, Zozias b'ɔ ti Zida famiɛn'n i wa Zozakim i sielɛ'n i afuɛ nnan'n su yɛ ɔ kannin ndɛ sɔ'n kleli i-ɔ. Babilɔni famiɛn Nɛbikadnɛzar kusu i sielɛ'n i afuɛ klikli'n su-ɔ.

² Zeremi kusu wa kan kleli sran mun, ɔ kɛnnin i Zidafuɛ mun nin Zerizalɛmfuɛ'm be nyrun. I waan:

³ «Amɔn b'ɔ ti Zida famiɛn'n i wa Zozias i sielɛ'n i afuɛ blu-nin-nsan'n su yɛ Anannganman'n fɛli i ndɛ'n wlali mín nuan-an. Kɛ ɔ fɛ i lɛ b'ɔ ´fa ju ndɛ'n ɔ ti i afuɛ ablaɔn-nin-nsan. M'an sɔtɔ i kanlɛ m'an kan m'an flan nun lele nán tilɛ yɛ an ko ti-ɔ.

⁴ Anannganman'n ɔ sunmannin i sufuɛ mun sanngɛ nán ndɛ-ɔ. Ɔ sunmannin i nuan ijɔfuɛ mun, nán ndɛ-ɔ. Amun waan nán amun yɛ an ko ti-ɔ. Amun waan amun sie-man amún su be tie-man.

⁵ I nuan ijɔfuɛ'm be seli amun kɛ: ‹Amun kwlaa an `yaci amun nzuɛn tɛ'n, an `yaci amun aeliɛ tɛtɛ'n, i liɛ'n, amun ´ka lika nga Anannganman'n fa mannin amun nannan mun nin amun'n, amun ´ka nun mlɔnmlɔn.›

⁶ Be seli amun kɛ: ‹Nán an fa amun wun mantan amuɛn mun, nán an sɔ be, nán an koto be bo. Nán an fa amún sa nuan like man be, be kun min ya. Sɛ amu'an yo-man sɔ'n, n su yo-man amun like fi.

⁷ Sanngɛ nga n kan kleli amun'n, amu'an ti-man. An fali amún sa nuan ninnge mun amun kunnin min ya, ɔ man kusu sa nyannin amun.›

⁸ I sɔ'n ti, Anannganman b'ɔ sie mɛn wunmuan'n wan yoo: ‹Bɔ amu'an fa-man min ndɛ'n su'n,

⁹ n wa ko yia amun mɛn'n i nglo lɔ nvle'm be kwlakwla, yɛ n ´yia min sufuɛ Nɛbikadnɛzar b'ɔ ti Babilɔni famiɛn'n. N ´fa be m ´ba kɛ be nin mɛn nga nunfuɛ mun nin mɛn nga be mantan wa'n be nunfuɛ mun be wa kun nan be `bo wa mɛn'n. Ɔ man kɛ sran'm be wa wun amun'n, amun ´yo be sro, be ´fa amun di flɛn, yɛ be ´nunnun amun mlɔnmlɔn.

¹⁰ N ´yo man bo srolɛ'n nin aklunjuɛ jue'n, nin yasua annzɛ bla nga b'a ja be wun uflɛ uflɛ'n be jue tolɛ'n, nin ble silɛ mannzin'n i tɛlɛ'n, ɔ nin kannin mun bɔ be kpaja'n i kwlakwla sɔ'n ´wie.

¹¹ Mɛn nga ´nunnun mlɔnmlɔn. Nvle sɔ'm be kwlakwla be nunfuɛ'm be ´su Babilɔni famiɛn'n afuɛ ableso .›

¹² Anannganman waan: ‹Kɛ afuɛ ableso sɔ'n ko wie'n, e nin Babilɔni famiɛn'n nin i mɛn'n nunfuɛ mun e ´yia nun. Yialɛ bɔ e nin be e ´yia nun'n, be sa tɛ bɔ be yo'n ti-ɔ. N ´yo man Kaldefuɛ sɔ'm be mɛn'n ´nunnun mlɔnmlɔn.

¹³ Mɛn sɔ'n i wun sa kwlaa nga m man Zeremi kannin b'ɔ klɛ fluwa nga nun'n, nvle-nvle'm be kwlaa bé wun sa nga Zeremi kannin'n, n ´fa sa sɔ mun n ´yi be su.

¹⁴ Babilɔnifuɛ'm be bɔbɔ be wa su nvle wie mun bɔ be lɛ wunmiɛn kpa'n, be ´su famiɛn dandan kpa mun. Sa nga be yoli'n, n ´nian su n ´yo be wie.› »

Jɔlɛ dilɛ klowa'n

¹⁵ An `se kɛ sɛ, Anannganman b'ɔ ti Izraɛl famiɛn'n seli min kɛ yoo: «Min ya'n ti dan kɛ klowa bɔ nzan'n ɔ'a yi i piɛ'n sa, klowa sɔ'n yɛ ɔ o yɛ, sɔ nun. Fa man nvle nga n ´sunman wɔ be nun'n be nunfuɛ'm be kwlaa man be nɔn.

¹⁶ Man be nɔn nan bé ja'n tanndan bé bo, nan be nyin su kpɛ be blɛ bɔ be wa wun sran nga be ´fa tokofi kun be'n.»

¹⁷ Yɛ n sɔli klowa sɔ b'ɔ wo Anannganman sa nun'n nun-ɔn. Yɛ n fa mannin nvle nga Anannganman'n sunmannin min be nun'n be kwlaa-a.

¹⁸ N fa mannin Zerizalɛmfuɛ mun nin Zida klɔ'm be nunfuɛ mun. N fa mannin famiɛn mun nin be awlo lɔ sran dandan mun, nan be nunnun, nan sɛ sran'm be wun be-ɔ, be `bo kitika, be `fa be di flɛn, be `fa be bo sannzan .

¹⁹ N fa mannin Ezipt famiɛn'n nin i sonja kpɛnngbɛn mun, nin i awlo lɔ sran dandan mun, ɔ nin i nvle wunmuan'n.

²⁰ N fa mannin Ezipt lɔ nvle fanunfanun'm be nunfuɛ mun. N fa mannin Iz mɛn nun lɔ famiɛn'n be kwlakwla. N fa mannin Filisti mɛn'n nun lɔ famiɛn'm be kwlakwla, i Askalɔn lɔ liɛ mun o, nin Gaza lɔ liɛ mun o, nin Ekrɔn lɔ liɛ mun o, ɔ nin Asdɔd mɛn nunfuɛ'n be onga nga be ka'n.

²¹ N fa mannin Edɔmfuɛ mun, nin Moabfuɛ mun, ɔ nin Amɔnfuɛ mun.

²² N fa mannin Tir famiɛn mun, nin Sidɔnfuɛ'm be famiɛn mun, ɔ nin mɛn nga be o jenvie'n i bue kun lɔ'n be famiɛn mun.

²³ N fa mannin Dɛdanfuɛ mun, nin Temafuɛ mun, nin Bizfuɛ mun, ɔ nin be nga be yi be fuka'n su akanza'n mun .

²⁴ N fa mannin Arabi famiɛn mun. N fa mannin wia atɔliɛ lɔ famiɛn nga be tran aawlɛ flɛnnɛn'n nun mun.

²⁵ N fa mannin Zimri famiɛn'm be kwlakwla. N fa mannin Elam famiɛn'm be kwlakwla. N fa mannin Medi famiɛn'm be kwlakwla.

²⁶ N fa mannin mɛn'n i nglo lɔ famiɛn nga be o koko o, nga be o mmua o, be kwlakwla. N fa mannin asiɛ'n su famiɛn diwlɛ be nunfuɛ'm be kwlakwla. Sesak famiɛn'n yɛ ɔ kasiɛn nɔnnin-ɔn.

²⁷ I waan n `se be kɛ: «Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n wan yoo: ‹An `nɔn, an `bo nan an `fi, tokofi'n ɔ wa fa nyrɛnnɛn yi amun afiɛn'n i ti yɛ amun ´yo sɔ-ɔ. An `fin ase, nán an kwla amun wun su man kun.›

²⁸ Sɛ be waan be fa-man nzan nga a fa tinndin be nyrun'n, se be kɛ: ‹Min Anannganman b'ɔ sie mɛn wunmuan'n min waan: Amun `nɔn.›

²⁹ ?Kɛ bɔ klɔ nga min dunman'n wo su yɛ'n n dun mmua n fali nyrɛnnɛn'n n yili su nin-ɔn, yɛ amun li yɛ n ´yaci n ´cɛ amun-ɔn? N su yaci cɛ-man amun. N ´fa alɛ'n n yi i asiɛ wunmuan'n su. Min Anannganman b'ɔ n sie mɛn wunmuan'n yɛ ɔ kan sɔ-ɔ.»

³⁰ Anannganman seli min ekun kɛ: «Kan mín nuan ndɛ'n ng'ɔ o lɛ'n kwlaa kle be, yɛ kan gua su kɛ: ‹Anannganman'n wo nglo lɔ ɔ kpan ya su fiaan fiaan. Ɔ o i lika'n nun lɔ ɔ kpan. Ɔ kpan i lika'n nun lɔ, ɔ kpan ya su fiaan fiaan. Ɔ kpan kɛ be bɔ be kpita vinyi mma'n be fa kpan'n sa. Ɔ kpan mɛn nunfuɛ'm be kwlaa be su.

³¹ Be ti i ngan asiɛ'n i tiwa'n kwlaa su. Anannganman'n nin nvle-nvlefuɛ'm be su di ndɛ. Ɔ nin sran'm be kwlaa be su di ndɛ. Ɔ fa sran tɛtɛ mun man alɛ'n man ɔ di be.› » Anannganman'n yɛ ɔ kan sɔ-ɔ.

³² Anannganman b'ɔ sie mɛn wunmuan'n wan yoo: «Nyrɛnnɛn'n tɔ nvle kun su, kpɛkuun ɔ sa nvle uflɛ. Aunngban dan kpa kun fin asiɛ'n i tiwa lɔ ɔ su wa tu ba.»

³³ Sran nga Anannganman'n man be ´wu cɛn sɔ'n nun'n, be ´gua lɛ sa. Kɛ ɔ fɛ i asiɛ'n i bue kun b'ɔ ´fa ju i bue uflɛ su'n, be su yo-man be sɛ. Be su sie-man be. Be ´kplɔ asiɛ'n su.

³⁴ Izraɛl su kpɛn mun, an `sun, an `kpan. Min nvle'n i su nianfuɛ mun, an `la kondo. Amun kɔmin kpɛlɛ liɛ'n ɔ'a ju. Be wa kun amun kɛ be fa kun bua nene kpakpa mun'n sa.

³⁵ Izraɛl su kpɛn'm be wun-man kɔwlɛ kun. Min nvle'n i su nianfuɛ mun, be lɛ-man fiawlɛ kun.

³⁶ Izraɛl su kpɛn'm be yɛ be ´kpan lɔ lɛ-ɔ. Min nvle'n i su nianfuɛ'm be yɛ be ´sun lɔ lɛ-ɔ. Sa ti bɔ be kpan'n yɛlɛ kɛ Anannganman'n ɔ'a nunnun be nnɛn'm be didiwlɛ'n.

³⁷ Anannganman'n i ya dan'n b'ɔ fali'n ti, bua'm be tuin'n nglanman'm b'a tɔ bliin.

³⁸ Ɔ'a yi i sa i nvle'n su kɛ asɔmɔli ɔ'a tu i mma'm be sin sa. Nyrɛnnɛn b'ɔ alɛ'n fa ba n ti'n, yɛ Anannganman'n i ya dan'n ti'n, be mɛn'n ɔ'a wie nunnun.