Zeremi 23 - NYANMIƐN NDƐ'N 1998

Nvlefuɛ'm be nyrun dunfuɛ kpa nin tɛ mun

¹ Anannganman wan yoo: «Be nga be dun nvlefuɛ'm be nyrun mmua'n be yako! Amun bɔ amun ti kɛ min bua mun sa bɔ amun yoli man min sran mun bɔ be ti kɛ min kuku nun bua mun sa'n b'a bo b'a sanndi, bɔ b'a mlin'n, amun yako!»

² Anannganman b'ɔ ti Izraɛl Nyanmiɛn'n waan: «Min nvle'n i atin klefuɛ mun, kɛ ɔ ´yo bɔ amu'an nian-man min bua'm be lika b'ɔ amun yoli man be bo sanndili'n, bɔ amun man be mlinnin'n ti'n, amun aeliɛ tɛtɛ sɔ'n ti min kusu e nin amun e wa yia nun.

³ Min bua bɔ m man be bo sanndili mɛnmɛn'n be nun'n, n ´yiayia be nga be ka mun. N ´fa be n sa be sin be tuin'n nun. Be ´wu ba kaka, be ´trɛ.

⁴ N ´fa bua sunianfuɛ nga be ko nian be su kpa'n n ´sie bé su. Ɔ man srɛ su kun-man be kun. Be su usu-man kun. Kun sa su tu-man nun.»

⁵ Anannganman wan yoo: «Cɛn wie lele David i anunman kpa nanwlɛ su kun wa jaso i osu. Ɔ ´yo famiɛn kpa kɛ ɔ fata'n sa. Ɔ ´nian mmla'n su ɔ ´di jɔlɛ nanwlɛ mɛn'n nun.

⁶ I blɛ su Zidafuɛ'm be ´nyan be ti, Izraɛlfuɛ'm be ´di alaje. Be wa flɛ i kɛ: ‹Anannganman'n ti e ti ndɛ kanfuɛ .›

⁷ Iyo! Cɛn wie lele be ´ta nda-a, be su se-man kɛ: ‹N kan Anannganman'n b'ɔ fali Izraɛlfuɛ mun Ezipt mɛn'n nun bali'n› kun,

⁸ sanngɛ be ´se kɛ: ‹N kan Anannganman b'ɔ yiayiali Izraɛlfuɛ nga be bo sanndili Izraɛl mɛn'n i nglo lɔ mɛn'n nin mɛn kun nga'm be nun'n, b'ɔ fali be bali kɛ be tran be mɛn'n nun'n.› »

Be nga be tɔn be wun suɛn kɛ be ti Nyanmiɛn i nuan ijɔfuɛ'n

⁹ Be nga be tɔn be wun suɛn kɛ be ti Nyanmiɛn i nuan ijɔfuɛ'n be yɛ n kan m man be-ɔ. Min anwlɛn'n ɔ'a kpɔtɔ min klun. Mín wun usu min. M'an yo kɛ sran bɔ ɔ'a nɔn nzan ɔ'a bo sa. M'an yo kɛ sran bɔ nzan'n ɔ'a kun i sa Anannganman'n ɔ nin i ndɛ'n be dunman nun ti.

¹⁰ «Tekle bofuɛ'm b'a yi mɛn'n piɛ! Tete sa'm be ti sa yalɛ ɔ'a tɔ mɛn'n su. Aawlɛ flɛnnɛn nun nnɛn'm be didiwlɛ'n ɔ'a wu kee! Afin sa tɛtɛ'n yɛ sran'm be kunndɛ i yolɛ-ɔ. Sa tɛ yolɛ'n yɛ be wun kpɛ su-ɔ.

¹¹ Anannganman'n wan yoo: ‹Min nuan ijɔfuɛ mun nin min nyrun jranfuɛ'm be kwlaa b'a saci. Be yo sa tɛ'n lele be fa wlu mín sua'n nun.

¹² I sɔ'n ti atin nga be nanti su'n, ɔ wa yo ndrɔn, aosin'n ɔ wa wla su, afin blɛ nga e nin be yia nun'n, n ´fa nyrɛnnɛn'n n ´yi be su, bé ja'n ´seli, be ´tɔ.› » Anannganman'n yɛ ɔ kan sɔ-ɔ.

Be nga be tɔn be wun suɛn sɔ'm b'a saci b'a tra Samari lɔfuɛ mun

¹³ «Like nga Samari lɔ be nga be tɔn be wun suɛn kɛ be ti min nuan ijɔfuɛ'n be yoli bɔ n wunnin i'n, n waan m'an wun wie ngboko. Baal nuan yɛ be ijɔ be mlin Izraɛlfuɛ bɔ be ti min sran mun-ɔn,

¹⁴ sanngɛ like nga Zerizalɛm lɔ liɛ'm be yoli bɔ n wunnin i'n, ɔ yo sro. Be bo tekle, yɛ ato'n yɛ be bua-a. Be wla be bɔ be yo sa tɛ'n be fanngan, kɛ ɔ ´yo nan be wie fi ɔ'a yaci-man sa tɛtɛ'n yolɛ'n ti. Be ti kɛ Sodɔmfuɛ'm be sa. Zerizalɛmfuɛ'm be ti kɛ Gomɔrfuɛ'm be sa min nyrun.»

¹⁵ Ɔ man ndɛ bɔ Anannganman b'ɔ sie mɛn wunmuan'n kan man Nyanmiɛn nuan ijɔfuɛ sɔ mun'n yɛ. I waan: «N wa man be kondu man be di, n ´gua nzue'n nun duwlɛ man be nɔn, afin sa tɛ nga ɔ'a tru mɛn wunmuan nun yɛ'n ɔ fin Zerizalɛm lɔ be nga be tɔn be wun suɛn kɛ be ti min nuan ijɔfuɛ mun.»

Be nga be bu be wun kɛ be ti Nyanmiɛn i nuan ijɔfuɛ bɔ sanngɛ be bua ato'n

¹⁶ Anannganman b'ɔ sie mɛn wunmuan'n wan yoo: «Be nga be bu be wun kɛ be ijɔ min nuan'n, be ndɛ nga be ´kan kle amun'n, nán amun fa amún su sie i bo. Aolia nun like nga be ´kɛn i ndɛ kle amun'n, ɔ fin be bɔbɔ be akunndan'n nun. Nán min nuan su ndɛ-ɔ.

¹⁷ Be se be bɔ be bu-man min like fi'n be kɛ: ‹Anannganman waan: Amun ´di alaje.› Be se be bɔ be klun sa'n cɛ yɛ be waan be ´yo'n, bɔ be su mlin'n be kɛ yoo: ‹Sa su nyan-man amun.›

¹⁸ Kɛ min Anannganman min nin min fuɛ mun e ´koko e yalɛ'n, ɔ waan sɛ sran sɔ'm be nun onin yɛ ɔ ko trɛnnin i bo bɔ i su tili a o! ?Wan cɛ yɛ ɔ sieli i su tili b'ɔ wunnin i wlɛ-ɔ?»

(Zeremi waan)

¹⁹ Anannganman ɔ'a fa ya kekle kpa, i ya'n ɔ ti kɛ aunngban dan sa. Aunngban dan sɔ'n ɔ kpɛ sin sa tɛ yofuɛ'm bé ti su.

²⁰ Sɛ a ´wun kɛ Anannganman'n i ya'n ɔ ´jɔ'n, wuun sa ng'ɔ guguli kɛ ɔ ´yo'n ɔ'a wie kwlaa yo. Cɛn wie yɛ amun wa wun i wlɛ-ɔ.

(Anannganman waan)

²¹ «M'an sunman-man be kpɛkuun b'a wanndi b'a wɔ. M'an fa-man ndɛ m'an wla-man bé nuan kpɛkuun be su kan mín nuan ndɛ sɔ ngbɛn.

²² Sɛ ɔ ti kɛ e nin min sran mun e ´koko e yalɛ-ɔ be trɛnnin i bo'n, wuun ndɛ nga e kannin'n be ko kan kleli min sran mun man be yacili ajalɛ tɛ tulɛ'n, wuun be guali be aeliɛ tɛtɛ'm be ase.»

Anannganman'n wo lika kwlaa

²³ ?N ti Nyanmiɛn kun bɔ n wun-man mmua-a? N wun ase n kɔ mmua yɛ n wo lika kwlaa.

²⁴ ?Ɔ lɛ kɛ sran kun ɔ'a fia kpa nan n wun-mɛn i? Anannganman'n yɛ ɔ usa sɔ-ɔ. Ɔ usa ekun kɛ: «?Nán min yɛ n wo lika kwlaa nin-ɔn, nyanmiɛn su wa o, asiɛ'n su lɔ o?»

Be nga be tɔn be wun suɛn kɛ be ijɔ Nyanmiɛn nuan'n

²⁵ Ndɛ nga be nga be waan be ijɔ min nuan'n be kan'n, n tili. Be tɔn bé wun suɛn kɛ be ijɔ mín nuan. Be ko se kɛ: «N cɛnnin laliɛ kun, n cɛnnin laliɛ kun.»

²⁶ ?Nan kɛ sran sɔ'm be ´bua ato'n tɔn min bo sa bɔ titi? ?Kɛ be ´fa ato bualɛ'n be ´fa cici bé ti sa? ?Kɛ be ´kpɛ bé ti nun be ´ijɔ min nuan sa?

²⁷ Be ´kan be laliɛ nun ndɛ'm be kle be wiengu sɔ nan min sran'm be wla fi min kɛ be nannan'm bé wla fili min, Baal dunman nun'n sa.

²⁸ Sɛ Nyanmiɛn nuan ijɔfuɛ kun cɛn laliɛ'n, m'an se-man kɛ nán ɔ kan. Man ɔ kan. Nga kusu bɔ n kannin ndɛ n kleli i'n, man ɔ nian su kɛn i cɛ. Anannganman'n usa kɛ: «?Awie ja'n nin awie ba'n be ti-man ngunmin-ngunmin?

²⁹ Mín nuan ndɛ'n ti kɛ sin sa yɛ ɔ o lɛ-ɔ. Ɔ ti kɛ marto kekleke b'ɔ kpuke yɛbuɛ nun'n sa.»

³⁰ Anannganman waan: «Ɔ man min Anannganman'n e nin be nga be tɔn bé wun suɛn kɛ be ijɔ min nuan'n, bɔ be wua min nuan ndɛ nga min nuan ijɔfuɛ'n be kan'n, e wa yia nun.

³¹ Min Anannganman, be nga be fa be bɔbɔ be ndɛ'n be fa yo min ndɛ be kan'n, e nin be e wa yia nun.

³² Min Anannganman, be nga be kpɛ gblɛ se kɛ b'a wun aolia nun like be fa mlin min sran mun'n, e nin be e wa yia nun, afin min yɛ n sunmannin be-ɔ, be yo-man sa kpa fi be man-man min sran mun. Min Anannganman min yɛ n kan sɔ-ɔ.›

³³ Nan yoo: ‹Sɛ min nvlefuɛ mun annzɛ Nyanmiɛn nuan ijɔfuɛ sɔ mun annzɛ Nyanmiɛn nyrun jranfuɛ sɔ'm be nun kun usa wɔ kɛ: ?Nguɛ sa yɛ Anannganman'n ɔ'a siesie kɛ ɔ ´fa yi é su-ɔ? Kan sa sɔ'n kle be. Se be kɛ: Anannganman'n waan: N ´yi amun ase.›

³⁴ Nyanmiɛn nuan ijɔfuɛ sɔ mun annzɛ Nyanmiɛn nyrun jranfuɛ sɔ mun, annzɛ nvle nunfuɛ ng'ɔ kan sa nga n ´fa yi be su'n i ndɛ'n, i sɔ sran liɛ'n, e nin i nin i awlofuɛ mun e ´yia nun.

³⁵ Nga an ´usa amun wiengu'n yɛlɛ kɛ: ‹?Anannganman'n tɛli su seli sɛ? ?Annzɛ Anannganman'n kannin nguɛ ndɛ?›

³⁶ Nán an usa sa nga n ´fa yi amun su'n i ndɛ kun. Sran ng'ɔ usa sɔ'n, i sɔ b'ɔ usali'n ti sa ´nyɛn i, afin min bɔ n lafi-man'n, min Anannganman bɔ n sie mɛn wunmuan'n, min bɔbɔ min Nyanmiɛn'n an kpɛ min ndɛ'n wun.

³⁷ Nga an `usa Nyanmiɛn nuan ijɔfuɛ'n yɛlɛ kɛ: ‹?Anannganman'n tɛli su seli sɛ? ?Anannganman'n seli sɛ?›

³⁸ Sran ng'ɔ bo sa nga Anannganman ´fa yi be su'n su'n, Anannganman'n wan yoo: ‹I sɔ ndɛ bɔ n seli amun kɛ nán an kan bɔ amun waan i yɛ an ´kan'n,

³⁹ i ti n wa yi amun ase mlɔnmlɔn. N ´fuan amun min nyrun wa, yɛ klɔ bɔ n fa mannin amun nin amun nannan mun'n n ´nunnun i.

⁴⁰ Amún nyin ase nga n ´gua'n, bé wla su fi-mɛn i le nan kɛ ɔ ´yo-ɔ ɔ'a yo.› »