Zeremi 20 - NYANMIƐN NDƐ'N 1998

Zeremi i cilɛ bɔ be cili i'n

¹ Kɛ Zeremi kannin Nyanmiɛn nuan ndɛ sɔ'n, Pasir b'ɔ ti Imɛr i wa'n bɔ i kunngba'n ti Nyanmiɛn nyrun jranfuɛ nin Nyanmiɛn i sua'n su nianfuɛ'm bé su kpɛn'n ɔ tili.

² Ɔ boli Zeremi nan ɔ'a trɛ i ɔ'a ko ci i sran ciwlɛ waka ng'ɔ o Bɛnzamɛn Anuan Nglo-nglo'n b'ɔ o Nyanmiɛn i sua'n i nyrun lɔ'n i wun.

³ Kɛ aliɛ'n cɛnnin'n, Pasir nyannjili Zeremi kpɛkuun Zeremi seli i kɛ: «Anannganman'n flɛ-man wɔ Pasir kun, ɔ ´flɛ wɔ Magɔr-Misabib siɛn'n, i bo'n yɛlɛ kɛ Nyrɛnnɛn Bo Sin Yia Amun.

⁴ Anannganman'n wan yoo: ‹N ´fa nyrɛnnɛn'n n ´yi wɔ nin ɔ janvuɛ'm be su. Be kpɔfuɛ'm be ´kun be-ɔ, ɔ́ nyin ´ta nun. Yɛ n ´fa Zida nvle wunmuan'n i nunfuɛ mun m man Babilɔni famiɛn'n. Ɔ ´tra be lomuɛn kɔ i mɛn'n nun, wie kusu-ɔ, ɔ ´kun be.

⁵ Klɔ nga sufuɛ'm be ninnge kpakpa'n nin be bɛtrɔ mun, nin be junman'm be nuan ninnge'm be kwlakwla, nin Zida famiɛn'm be bɛtrɔ'n, n ´fa man be kpɔfuɛ mun be ´fa yo be liɛ. Be ´fɛn be ´sua kɔ Babilɔni.

⁶ Wɔ Pasir, a nin wɔ awlofuɛ'm be kwlaa be ´tra amun lomuɛn be ´kɔ. A ´kɔ Babilɔni, a ´wu lɔ, be ´sie wɔ lɔ, a nin ɔ janvuɛ nga a kannin Nyanmiɛn nuan ndɛ ato kleli be mun.› »

Zeremi i Nyanmiɛn wun ya falɛ

⁷ Anannganman, a lakalakali min n fali su. A nyannin min, a kwlali min. Ɔ lɛ-man cɛn kun bɔ be srisri-man min-ɔn. Sran'm be kwlaa be srisri min.

⁸ Ndɛ kwlaa nga n ´kan'n, i agualiɛ su san n ´kpan, san n ´kpan kɛ be ´kun min o! Be `de min o! Anannganman, ɔ ndɛ'n i kanlɛ'n ti min srisrilɛ yɛ be srisri min-ɔn, yɛ min nzowa yɛ be kpɛ i sa cɛn kwlaa-a.

⁹ Sɛ n waan: «M bu-man Anannganman i akunndan kun, yɛ n kɛn-mɛn i nuan ndɛ kun'n,» like wie yra min klun lɔ sa fiaan kɛ sin sa. N kplin mín nyin kɛ n ´yo nan ɔ `kan ase, sanngɛ ngbɛn-ɔn.

¹⁰ N ti mín wun ndɛ tɛtɛ bɔ sran sunman be kan'n. Be flɛ min: Nyrɛnnɛn'n ´Bo Sin Yia Amun. Wie'm be se kɛ: «An `sɛnmɛn i,» yɛ wie'm be sɔ su kɛ: «Ɛɛn, man e sɛnmɛn i.» Be kwlaa nga be nin min tran klanman laa'n, be su minndɛ kɛ n tɔ. Be waan: «Nga, ɔ ´fɔn le. E ´kwlɛ i yɛ e ´tu e klunngbɔ i su.»

¹¹ Sanngɛ Anannganman'n b'ɔ ti kɛ safunyrɛn sa'n, ɔ jin min sin. Min kpɔfuɛ'm be wa tɔ. Nán be yɛ be ´kwla-a. Be su nyan-man jranwlɛ, ɔ man be ´wun nyannzuɛn. Nyannzuɛn nga be wun i'n, ɔ su titi-man le. Bé wla su fi-mɛn i le.

¹² Anannganman, wɔ b'ɔ a sie mɛn wunmuan'n, ɔ liɛ a si sran jrɛin mun. Akunndan nga be ti fiawa sran i anwlɛn nun'n, a si be. Ɔ klunngbɔ nga a ´tu i be su'n, ɔ ´yo min nyrun. Afin ɔ́ ja su yɛ n fali min ndɛ'n m bali-ɔ.

¹³ An `to jue bo be flɛ Anannganman'n, an `mɛnmɛn i, afin kɛ yalɛfuɛ'n ɔ tɔ sran bɔ be ti sa tɛ yofuɛ'm bé sa nun'n, i yɛ ɔ de i-ɔ.

*

¹⁴ Cɛn nga be wuli min nun'n, sɛ ɔ ti sran'n, wuun n ´se kɛ nán cɛn sɔ'n ɔ wun ye le! Cɛn nga min nin guali min ase nun gblo'n, nán man cɛn sɔ'n ɔ yo kpa le!

¹⁵ Sran ng'ɔ ko boli i sɔ jasin fɛ liɛ'n kleli mín si'n b'ɔ seli kɛ: «Ɔ yi wuli ba yasua,» b'ɔ man i klun jɔli'n, nán man ɔ wun ye le!

¹⁶ Man sran sɔ'n yo kɛ klɔ nga Anannganman'n sacili be bɔ i waan ɔ si-man be aunnvuɛ kun'n sa. Nglɛmun'n, man ɔ ti kpankpanlɛ. Wia jran'n, man ɔ ti alɛ kpanlɛ.

¹⁷ Ee! Sɛ ɔ ti kɛ Nyanmiɛn man n wuli min nin klun'n, wuun man min nin kacili min ndia kpɛkun, wuun man min nin kali wunnzɛfuɛ titi.

¹⁸ Sɛ m'an fin-man min nin klun m'an fite-man'n, wuun i li flunman tra nyrɛnnɛn nga n ´wun i yɛ nin fɛlɛ nga n ´fɛ yɛ'n, ɔ nin nyannzuɛn nga n ´wun i cɛn kwlaa sa'n .