Zeremi 2 - NYANMIƐN NDƐ'N 1998

Nzue ti klengle'n i lɛ yacilɛ

¹ Anannganman'n kaleli min kɛ:

² «Ko se Zerizalɛmfuɛ'm be kɛ: ‹Anannganman'n waan: Mantanlɛ nga kɛ amun tɛ yo kɛ talua sa'n amun nin min mantannin'n, klolɛ nga amun fa kloli min kɛ be fa klo bla bɔ b'a jɛ i uflɛ sa'n b'ɔ man an suli min su aawlɛ flɛnnɛn, bɔ be kwla di-man nun fie'n i nun'n, mín wla o su.

³ I blɛ sɔ nun'n, wuun Izraɛl ti min liɛ mlɔnmlɔn kɛ mma klikli nga afuɛ nuan'n ju be ti'n sa. Sran kwlaa ng'ɔ kɛn i-ɔ, ɔ nin min e lɛ i. I sɔfuɛ'n ´wun nyrɛnnɛn.› » Anannganman'n yɛ ɔ kan sɔ-ɔ.

⁴ «Zakɔb akpasua sufuɛ mun, Izraɛl akpasua kunngun'n nunfuɛ mun, an `sie amún su be tie Anannganman i nuan ndɛ'n.»

⁵ Anannganman'n wan yoo: «?Nguɛ sa tɛ yɛ amun nannan'm be wunnin min wun, b'ɔ man b'a mantan-man min kun, bɔ be ko suli ninnge finfin'm be su, bɔ b'a yo finfin sa-a?

⁶ B'a usa-man kɛ: ‹?Anannganman'n b'ɔ fali ye Ezipt lɔ bali'n, b'ɔ kleli ye atin aawlɛ flɛnnɛn nun lɔ'n, ɔ liɛ lika kee sɔ'n, lika kunman-kunman sɔ'n, nzue we lika sɔ'n, awlaboɛ lika sɔ'n, lika bɔ sran fi sin-man nun'n, bɔ sran fi tran-man lɔ'n, Anannganman sɔ'n wo nin?

⁷ N fali amun m bali asiɛ kpa su nan amun di i su ninnge kpakpa'n wie. An bali min mɛn'n nun, kpɛkuun an wa yoli i fiɛn. M bɔbɔ min like'n, an fa yoli tete like.›

⁸ Nyanmiɛn nyrun jranfuɛ'm b'a usa-man kɛ: ‹?Anannganman kpa'n wo nin?› Be bɔ mmla'n wo bé sa nun'n, b'a si-man min. Amun su kpɛnngbɛn'm be jasoli mín wun. Nyanmiɛn nuan ijɔfuɛ'm be yoli Baal nuan ijɔfuɛ. Like nga be yo-man like fi ye'n, bé wun yɛ be fali bé wun mantannin-ɔn.

⁹ I sɔ ng'ɔ o lɛ'n ti'n Anannganman'n wan yoo: ‹M ´man amun ndɛ lelele. E nin amun anunman mun e wa nyɛn i.

¹⁰ An `wɔ Kitimfuɛ'm bɔ be tran nzue'n i afiɛn lɔ'n bé wun nian. An `sunman sran Kedar lɔ man be ko usa-usa lɔ be nian sɛ sa kɛ nga sa ɔ'a yo lɔ le'n.

¹¹ ?Awlanmannun, nvle wie o lɛ b'ɔ kaci i amuɛn mun-ɔn? ?Kannzɛ bɔ be ninnge sɔ'm be ti-man amuɛn kpa'n be kaci be? Sanngɛ kpɛkuun min nvle bɔ n dili i nɛnnɛn n yoli i Nyanmiɛn'n, ɔ yaci min lɛ cɛ ɔ ko fa like nga be yo-man sa fi ye'n.

¹² Nyanmiɛn su lɔfuɛ mun, man amún nuan bo amún wun. Man sa sɔ'n ɔ yo amun koun lele amún wun glɔ amun kplɛkɛɛ.

¹³ Afin min nvle'n ɔ'a yo sa tɛtɛ nnyɔn, yɛlɛ kɛ min bɔ n ti kɛ nzue ti b'ɔ wie-man nun sa'n, be yaci min lɛ, kpɛkuun be ko kplan nzue guawlɛ b'ɔ tɛtɛli bɔ be gua nun nzue-ɔ, ɔ ´jran-man.› »

Be sin bɔ be kaci si Anannganman'n ɔ ti sa tɛ dan

¹⁴ «?Izraɛl ti kanga? ?Ɔ ti afanniɛn ba? ?Cɛcɛ, yɛ ɔ yo sɛ ti yɛ man be trɛ i be kɔ kɛ be su di afɛn sa nin-ɔn?

¹⁵ I ti asɔmɔli'm be kpan sa-a, nán sa yolɛ-ɔ. B'a nunkun i mɛn'n mlɔnmlɔn. B'a wɔ i klɔ'm be nun, sin su di be, sran fi tran-man be su kun.

¹⁶ Mɛnfisfuɛ mun nin Tapanɛsfuɛ mun bɔbɔ b'a kpu Izraɛlfuɛ'm bé ti'm be su.

¹⁷ ?Izraɛl nvle, nán ɔ bɔbɔ yɛ man i sɔ sa'n ju wɔ su-ɔ? Afin Anannganman bɔ yɛ ɔ ti wɔ atin klefuɛ'n, a kacili ɔ sin sili i.

¹⁸ ?Ezipt lɔ Nil nzue'n ba'n i nzue nɔnlɛ'n ɔ wa yo wɔ sɛ? ?Asiri lɔ Efrat nzue ba'n i nzue i nɔnlɛ'n ɔ wa yo wɔ sɛ?

¹⁹ Ɔ klunwi'n i su sa'n yɛ ɔ taka ɔ́ ti su lɛ-ɔ. Wɔ ajalɛ tɛ nga a tuli'n i su afɛ'n yɛ a ´fɛ i lɛ-ɔ. A wa wun kɛ kannzu min Anannganman bɔ n ti ɔ Nyanmiɛn'n min ase yilɛ'n, ɔ nin ɔ́ nyin b'ɔ yi-man min'n, ɔ ti sa tɛ dan kpa.» Anannganman Nyanmiɛn b'ɔ sie mɛn wunmuan'n yɛ ɔ kan sɔ-ɔ.

Ɔ nyin kan-man ase

²⁰ «Izraɛl nvle, a jasoli min wun nán ndɛ-ɔ. A kpɛli nyanman nga n fa wlali ɔ kɔmin'n nun ɔ'a cɛ. Ɔ fiteli ɔ́ nuan kɛ yoo: ‹N su-man wɔ kun.› Siɛn'n, kpɔlɛ kanngan'm be kwlaa'm be su waka nga be lɛ nnya'm be kwlaa be bo yɛ a la a bo tekle nin-ɔn.

²¹ Kusu n kpali wɔ kɛ be kpa vinyi mma kpa'n sa yɛ n tali wɔ-ɔ. N tali wɔ kɛ vinyi wie bɔ fiɛn kaan sa nun-mɛn i wun'n sa. ?Ɔ yo sɛ yɛ man a wa kaci yoli blo vinyi nin-ɔn?

²² Sa tɛ nga a yoli'n, kannzɛ bɔ a fa blɔ nzue kpu'n, sɛ a fa sanmlan kaka wunnzin'n, ɔ su nunnun-man. Blɔ nzue sɔ'n nin sanmlan sɔ'n be su tu-mɛn i mín nyrun lɛ.» Anannganman Nyanmiɛn'n yɛ ɔ kan sɔ-ɔ.

²³ «?Ɔ yo sɛ yɛ man a kwla se kɛ: ‹M'an yo-man fiɛn, m'an ko sɔ-man Baal nin-ɔn?› Sanngɛ wuun ɔ osu'n yɛ ɔ o kongo nun lɔ kɛ nyɔnngɔnmɛn talua wie b'ɔ sin kɔ wa sin kɔ wa'n sa.

²⁴ A ti kɛ blo aflunmun bla bɔ aawlɛ flɛnnɛn nun yɛ ɔ tran'n sa. Kɛ i like'n ko fu i'n, wuun ɔ su siesie i bue, yɛ i wlɛwlɛ liɛ'n i ti be trɛ i-ɔ, ɔ la. Kɛ i anglo'n ko ju'n, i kunndɛlɛ yo-man ya aflunmun yasua'm bé sa nun.

²⁵ Kɛ n se wɔ kɛ Izraɛl, nian ɔ́ wun, ɔ'a yo-man sɔ-ɔ ɔ́ ja'n kpla, ɔ konviabo'n ɔ ´wu kee'n, a tɛ min su kɛ: ‹Cɛcɛ, be yaci min diin! Aofuɛ mun yɛ n klo be-ɔ. Be su yɛ n ´su-ɔ.›

²⁶ Cɛn kun Izraɛlfuɛ'm be wa wun nyannzuɛn kɛ awiefuɛ bɔ b'a trɛ i'n sa, i sran ngbɛn mun o, i famiɛn mun o, i famiɛn i awlo lɔ sran dandan mun o, i Nyanmiɛn nyrun jranfuɛ mun o, i Nyanmiɛn nuan ijɔfuɛ mun o, be wa wun nyannzuɛn.

²⁷ Be ko se waka'n kɛ: ‹A ti mín si.› Be ko se yɛbuɛ'n kɛ: ‹Wɔ yɛ a wuli min-ɔn.› Be nian-man min nyrun kun. Be kaci bé sin si min. Sanngɛ kɛ sa'n ɔ wa nyan be'n, kpɛkuun wuun be ´su kpan be ´sun flɛ min kɛ: ‹Bla a de ye.›

²⁸ ?Zidafuɛ mun amuɛn nga amun yili be'n be o nin? Sɛ be kwla de amun'n, man be wa de amun blɛ bɔ nyrɛnnɛn'n tɔ amun su'n. Afin amun amuɛn kpanngban nin amun klɔ mun be nuan'n sɛ.»

*

²⁹ Anannganman'n usa kɛ: «?Ɔ ju sɛ ti yɛ man min yɛ amun nin min lɛ i-ɔ? Amun kwlakwla amu'an fɔnndɔn min.

³⁰ M boli amun lele ngbɛn. Amun bolɛ sɔ'n ɔ'a yo-man like fi ye. An trali min nuan ijɔfuɛ mun, an kunnin be kɛ asɔmɔli wlɛfuɛ wie yɛlɛ amun sa.»

³¹ ?Ajulisufuɛ mun, an `sie amún su tie ndɛ nga Anannganman kan'n, i waan: «?Izraɛlfuɛ mun, m'an kaci amun nyrun kɛ aawlɛ flɛnnɛn sa annzɛ kɛ lika nga aosin'n dun su tritritri'n b'ɔ yo sro'n sa?» ?Min nvlefuɛ mun, nguɛ ti yɛ an ijɔ se kɛ: «Kan e klo kɛ e ´kɔ lɛ'n, e su kɔ! E su sa-man e sin ɔ́ wun» nin-ɔn?

³² ?Talua kun wla kwla fi i talua ninnge'm be su? ?Talua bɔ b'a jɛ i uflɛ'n i wla kwla fi i njuaba'n su? Sanngɛ min nvlefuɛ'm be liɛ'n, be wla fili min, be si-mɛn i afuɛ.

*

³³ Bian nga a klo be'n, a si bé wun atin'n kpɛ klanman. I dunman nun ti siɛn'n sa tɛtɛ yolɛ'n ti-man kekle ɔ́ sa nun.

³⁴ Aunnvuɛfuɛ nga w'a fite-man be su kɛ be su yo sa'n bɔ sanngɛ a kunnin be'n, be mmoja'n guagua lele ɔ gua ɔ tralɛ'n i nuan su'n nun.

³⁵ Sanngɛ a blu sa ng'ɔ o lɛ'n su a ko se kɛ: «M'an yo-man sa, nán ɔ fa mín wun ya sɔ. Selɛ nga a seli kɛ w'a yo-man tɛ'n ti e nin wɔ y'a nyɛn i.»

*

³⁶ ?Ɔ yo sɛ yɛ man a kaci ajalɛ ndɛndɛ sa-a? Ezipt'n kusu ɔ wa gua ɔ́ nyin ase kɛ Asiri'n fa guali ɔ́ nyin ase'n sa.

³⁷ Kɛ a fin lɔ ´ba'n, ɔ́ sa'n gua ɔ́ ti, afin Anannganman klo-man sran nga a nin be di anuansɛ lɛ'n. A su nyan-man ɔ́ ti.