Zeremi 19 - NYANMIƐN NDƐ'N 1998

Nzue sɛ'n i bolɛ

¹ Anannganman'n seli Zeremi kɛ: «Ko to nzue sɛ kun sɛ ufuɛ'n i sa nun. Kpɛkuun flɛ kpɛnngbɛn'm be nun wie nin Nyanmiɛn nyrun jranfuɛ kpɛnngbɛn'm be nun wie.

² Nan `fin klɔ nun fite. A ´kɔ'n, sin Sɛ Bue Anuan'n nun. Kɔ Inɔm kongo'n i wun lɔ. A ju lɔ'n, n ´fa ndɛ n ´wla ɔ́ nuan yɛ a ´kan-an.

³ Se kɛ: ‹Zida famiɛn mun nin Zerizalɛm klɔ'n sufuɛ mun, an `tie ndɛ bɔ Anannganman'n kan'n. Anannganman b'ɔ sie mɛn wunmuan'n, Izraɛl Nyanmiɛn'n wan yoo: An `nian, n wa fa nyrɛnnɛn sa kun n ´yi i lika nga su. Nyrɛnnɛn sa sɔ'n, sran kwlaa nga be kɛn i ndɛ kle i'n, ɔ kpiti kpli.

⁴ Afin be kacili be sin be sili min. Be yoli lele man a wun lika nga-a, a si-mɛn i kun. Be yrali ansans mannin amuɛn wie mun bɔ bé si mun nin Zida famiɛn mun be si-man be laa'n nan se kɛ be bɔbɔ. Sran nga b'a yo-man sa'n, b'a kun be lele be mmoja'n ɔ'a yi lika sɔ'n.

⁵ B'a siesie Baal i sɔwlɛ'n kɛ be ´yra be mma mun be fa sɔ Baal sɔ'n. Kusu wuun n nian se-man be kɛ be yo i sɔ like le. M'an kɛn-mɛn i sɔ m'an kle-man be, i sɔ akunndan bɔbɔ nian ba-man mín ti nun le.› »

⁶ I sɔ'n ti Anannganman'n wan yoo: «Cɛn wie'n, be su flɛ-man lika nga Tɔfɛt annzɛ Inɔm kongo kun. Be wa flɛ i sran'm be nunnunlɛ kongo.

⁷ Lika nga nun wa'n, n ´saci Zidafuɛ mun, nin Zerizalɛmfuɛ'm be ngwlɛlɛ'n nga be ´fa'n. N ´yo man be ´tɔ be kpɔfuɛ'm be nyrun. Be bɔ be klo-man be nin nguan'n, be ´nyan be. N ´fa be saka'n n ´fa gua anunman nin bo nun nnɛn'm be bo man be di.

⁸ N ´yo man klɔ nga kɛ sran be ´wun i'n, be ´bo bli. N ´yo man kɛ be nga be sin'n be wun sacilɛ bɔ ɔ'a saci'n, be ´bo awuyomo, yɛ be ´didi i wun.

⁹ Be kpɔfuɛ mun nin be bɔ be klo-man be nin nguan'n, be wa sanngan be nun. Nyrɛnnɛn nga be ´fa yi be su'n, i dan liɛ'n be flɛ-man. N ti man be ´di be mma'm be nnɛn'n, yɛ be ´di be wiengu nnɛn.»

¹⁰ Kpɛkuun, bo nzue sɛ'n be nga be nin wɔ o lɛ'n be nyrun nan se be kɛ:

¹¹ «Anannganman b'ɔ sie mɛn wunmuan'n wan yoo: ‹M ´bo nvle nga nin klɔ nga kɛ be fa bo nzue sɛ'n sa. Be siesie be ekun-ɔn ɔ su yo-man ye. Tɔfɛt lɔ yɛ be wa sie fuɛn mun siɛn nin-ɔn, afin be su nyan-man lika uflɛ be sie-man be nun.

¹² Sa nga n ´fa yo klɔ nga nin i sufuɛ mun yɛ ɔ o lɛ-ɔ. N ´yo man klɔ nga ´yo kɛ Tɔfɛt sa.› » Anannganman'n yɛ ɔ kan sɔ-ɔ.

¹³ «Zerizalɛm awlo mun nin Zida famiɛn'm be awlo mun be wa yo fiɛn kɛ Tɔfɛt lika'n sa. Sua nga be fu bé ti su lɔ be yra ansans man nzraama mun bɔ be gua nzan man ninnge mun'n, be kwlakwla be ´yo fiɛn .»

¹⁴ Kɛ Zeremi fin Tɔfɛt lɔ kan Anannganman'n sunmɛnnin i kɛ ɔ `ko kɛn i nuan ndɛ'n lɔ bali'n, ɔ ko jrannin Nyanmiɛn i sua'n i awlo'n nun. Ɔ seli sran nga be o lɛ'm be kwlaa kɛ:

¹⁵ «Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹An `nian, nyrɛnnɛn sa nga n kɛnnin i ndɛ'n, n wa fa yi i klɔ nga nin i asa'n su klɔ'm be kwlaa be su, bé nyin kekle bɔ be yoli'n bɔ n kan ndɛ-ɔ be ti-man'n ti.› »