Zeremi 18 - NYANMIƐN NDƐ'N 1998

Zeremi i sɛ ufuɛ i sin kɔlɛ ndɛ

¹ Anannganman'n seli min kɛ yoo:

² «Jaso kɔ sɛ ufuɛ'n i wun lɔ man n kan min ndɛ kun n kle wɔ.»

³ N wɔli sɛ ufuɛ'n i wun lɔ, kɛ n ´ju lɔ'n, wuun ɔ su wu like.

⁴ Like ng'ɔ wuli i sɔ'n ɔ'a yo-man kpa. Wufa'n ɔ yo sɛ ufuɛ'm bé sa nun sɔ titi. Nan sɛ ufuɛ sɔ'n ɔ'a fa ɔ'a wu like uflɛ nga i wulɛ yo i fɛ'n.

⁵ Yɛ Anannganman'n kannin ndɛ nga kleli min-ɔn. Ɔ usali kɛ:

⁶ «?Izraɛlfuɛ mun, min nin amun e kwla yo-man kɛ sɛ ufuɛ ng'ɔ lɛ'n sa? Afin amun wo mín sa nun kɛ wufa'n fa o sɛ ufuɛ'n i sa nun'n sa.

⁷ Ɔ ju blɛ wie-ɔ n kan kɛ n ´tu nvle wie annzɛ kusu famiɛn diwlɛ wie bo kɛ waka sa, wie ju kusu-ɔ, n kan kɛ m ´bubu i annzɛ n ´nunnun i.

⁸ Sanngɛ sɛ nvle nga n kɛnnin i ndɛ sɔ'n i nunfuɛ'm be yaci sa tɛ yolɛ'n, n kaci aniɛn'n, sa nga min waan n ´fa yo be'n, n fa fli be.

⁹ Ɔ ju blɛ wie kusu-ɔ, n kan kɛ n ´kplan nvle wie annzɛ famiɛn diwlɛ wie kɛ sua sa, wie kusu-ɔ, n kan kɛ n ´tɛ i kɛ waka sa.

¹⁰ Sanngɛ sɛ nvle sɔ'n lo min ngasi nan n kan ndɛ n kle i-ɔ ɔ guɛ i su sin'n, n kaci aniɛn. Ye nga n guguli kɛ n ´yo mɛn i'n, n yo-mɛn i kun.»

¹¹ Ɔ man se Zidafuɛ mun nin Zerizalɛm klɔ'n sufuɛ'm be kɛ: «Anannganman'n wan yoo: ‹N su siesie amún wun sa kun, n su bu amun wun akunndan tɛ kun. I sɔ'n ti, man amun kwlaa an kaci amun nzuɛn'n. An `nanti klanman kɛ ɔ fata'n sa.› »

¹² Sanngɛ be tɛ min su kɛ: «Nán kle ɔ wun yalɛ. Ye akunndan liɛ'n su yɛ e ´fa-a. E liɛ nga e waan e ´yo'n yɛ e ´yo-ɔ.»

Izraɛl i Anannganman wla filɛ

¹³ I sɔ'n ti Anannganman'n wan yoo: «?An `kpɛn n sin usa nvle-nvle'm be nun nian sɛ b'a kan ndɛ sa'n wie amu'an ti i le o? Sa nga Izraɛl yoli'n i tɛ liɛ'n ɔ lɛ-man wunsu.

¹⁴ ?Laglasi ng'ɔ gua Liban lɔ oka'm be su'n ɔ wie? ?Nzue ng'ɔ fin mmua, b'ɔ sonji'n b'ɔ jɔ'n, ɔ'a wie nun le?

¹⁵ Sanngɛ kpɛkuun min nvlefuɛ'm bé wla ɔ'a fi min. Be yra ansans be fa man ninnge finfin mun. B'a yo man b'a yaci be atin'n lɛ. B'a yaci be atin laa'n lɛ. B'a ko fa atin nga b'a yi-man'n.

¹⁶ B'a yo man kɛ a wun be mɛn'n sa-a, ɔ yo sro, sran'm be yaci-mɛn i finfin yolɛ, be kwlaa nga be sin lɛ'n, be nuan bo bé wun, yɛ be keje be ti sɛkɛsɛkɛsɛkɛ.

¹⁷ Kɛ be nyinma ´gua be kpɔfuɛ'm bé wun cɛ'n, wuun m'an yo man b'a bo b'a sanndi. Be nyrɛnnɛn cɛn sɔ nun'n, n ´kaci n sin n ´si be.»

Zeremi i wun ndɛ bɔ be cicili'n

¹⁸ Be wie'm be se kɛ: «An man e cici Zeremi i wun ndɛ, afin i kunngba'n ti man Nyanmiɛn nyrun jranfuɛ'n su wie-man nan se kɛ mmla'n ´ka lɛ mlin. Ngwlɛlɛfuɛ'm be kusu be su wie-man nan se kɛ e su nyan-man afɔtuɛ manfuɛ kun. Nyanmiɛn nuan ijɔfuɛ'm be su wie-man nan se kɛ e su ti-man Nyanmiɛn nuan ndɛ'n kun. Man e saci i wun. Sɛ ɔ kan ndɛ siɛn'n, nán e sie é su kun.»

¹⁹ Anannganman, sie ɔ́ su ti nga n kan'n. Tie ndɛ bɔ min kpɔfuɛ'm be kan'n.

²⁰ ?Be fa tɛ be tua kpa kalɛ? B'a kpɛ min bo kunman nan n `tɔ nun nan n `wu. Man ɔ wla kpɛn su kɛ min yɛ n jran ɔ nyrun n kannin bé ti ndɛ yɛ man a yacili ya nga a fɛli i bé wun nin-ɔn.

²¹ I sɔ'n ti, yo man awe'n kun be mma mun. Fa be bɔbɔ yi i alɛ'n nun. Man be yi'm be mma'm be fi be sa. Man be ka angboti. Man tukpacɛ b'ɔ sa ndɛndɛ'n kun bé wun mun. Man alɛ'n di be mma gbanflɛn mun.

²² Kɛ bɔ b'a kpɛ min bo kunman kɛ be ´tra min'n, bɔ b'a sua aya min bo nan n `tɔ nun'n ti, sunman sonja mun man be ko fu be nun nan be ti kpankpanlɛ be awlo'm be nun.

²³ Anannganman, ɔ bɔbɔ a si cicilɛ nga b'a cici kɛ be ´kun min'n. I sɔ'n ti sɛ be yi ɔ kpatalɛ tɛ'n, nán sɔ nun. Nán nunnun bé sa tɛ'n nan ɔ jaso ɔ nyrun lɛ. Nán be kwla jran ɔ nyrun. Man bé wun ya tran ɔ klun tititi.