Zeremi 17 - NYANMIƐN NDƐ'N 1998

Zidafuɛ'm be sa tɛ'n

¹ Zidafuɛ'm bé sa tɛ'n ɔ ti kɛ blalɛ yɛ b'a fa klɛ sa, ɔ ti kɛ diaman kpɛngbɛ yɛ b'a fa klɛ sa, sɛ n ´kwla se, ɔ klɛ be anwlɛn'n nun. Ɔ klɛ be Nyanmiɛn sɔwlɛ like nga be ti kɛ nnɛn wɛ sa'n be su.

² Ɔ man be mma'm be wla su fi-man sraka yiwlɛ nin waka nga be taka be bɔ be sɔ be'n, nin waka nga be lɛ fɔnvɔ'n, ɔ nin kpɔlɛ kendenglein mun.

³ Zerizalɛmfuɛ mun bɔ amun o oka b'ɔ o lika kpɛtɛkplɛɛ nun'n, sa tɛ nga amun yoli'n ti, amun amuɛn sɔwlɛ nga amun fa truli lika'n nun'n ti, n wa fa amun ninnge nin amun bɛ trɔ mun m ´man amún bo ninnge fɛnfuɛ mun.

⁴ Aja nga n fa mannin amun'n, amun bɔbɔ ti man ɔ ´fi amun sa. N ´yo man amun kpɔfuɛ'm be ´tra amun kɔ mɛn wie bɔ amun si-mɛn i'n nun. Afin min ya'n b'ɔ jue kɛ sin sa'n amu'an sɔ i nuan. Ɔ ´jue lele be yo i like fi-ɔ ɔ su yo-man ye.

Be nga be fa bé wla guɛ i sran su'n

⁵ Anannganman'n wan yoo: «Sran ng'ɔ yaci min Anannganman'n n lɛ bɔ sran su yɛ i wla'n wo'n, bɔ klɔ sran bɔ i nyin tɛ'n i su yɛ ɔ lafi'n nán man ɔ wun ye le!

⁶ I sɔ sran liɛ'n i agualiɛ'n yo kɛ susrɛ kan wie b'ɔ o lika kee'n nun'n sa. Ɔ ´minndɛ muae'n lele ɔ ´fɛ ngbɛn. Afin i sɔfuɛ'n ɔ'a yo kɛ ɔ ko trannin aawlɛ flɛnnɛn'n nun kan lika'n ti yrawa lɛ'n nun sa, ɔ ti kɛ njin asiɛ bɔ sran fi tran-man lɔ'n sa.

⁷ Sran nga i wla'n taka Anannganman'n su'n, bɔ Anannganman'n su yɛ ɔ lafi'n, i liɛ su ti ye!

⁸ Ɔ ti kɛ waka wie b'ɔ jin nzue nuan'n sa, bɔ i olui'm be trɛ kɔ nzue ba'n nuan'n sa. Wia'n ´bo-ɔ, i ndɛ nun-man nun. I nnya'n blo-man le. Afuɛ nga nzue'n ɔ'a tɔ-man-an, ɔ ti-mɛn i ndɛ mlɔnmlɔn. Ɔ yaci-man mma sulɛ le.

⁹ Klɔ sran'n i klun akunndan'n ti tɛ tra like kwlaa, be yo akunndan sɔ'n i sa fi-ɔ ɔ yo-man ye . ?Wan cɛ yɛ ɔ kwla si-ɔ?»

¹⁰ «M bɔbɔ min Anannganman n si klɔ sran klun akunndan'n, n wun i anwlɛn'n nun lɔ. Ɔ man n nian kɛ sran kun fa nanti'n. N nian kɛ i aeliɛ'n fa ti'n su yɛ n fɛ i nuan like mɛn i-ɔ.

¹¹ Sran ng'ɔ fa gblɛ fa nyɛn i wun'n, ɔ ti kɛ cinndalo wie b'ɔ utu klenzua bɔ nɛ́n i yɛ ɔ toli'n su sa. I nguan'n wie-man nan ninnge sɔ'n b'a fi i sa. I agualiɛ su'n, ɔ kaci kɛ sinnglinfuɛ sa.»

Anannganman b'ɔ ti nguan manfuɛ'n

¹² Famiɛn bia kun o lɛ ɔ lɛ nyrun kpa. Kɛ ɔ fin mɛn'n i bo bolɛ nun'n i dunman'n ti fuwa. I su yɛ e Nyanmiɛn i sua'n taka-a.

¹³ Anannganman, wɔ bɔ ɔ su yɛ Izraɛl i wla'n wo'n, be bɔ be kaci be sin be si wɔ'n be ´wun nyannzuɛn. Be bɔ be yaci wɔ lɛ kɔ like uflɛ sin'n, be ti kɛ dunman bɔ b'a klɛ i aunnyan nun bɔ i nunnunlɛ ɔ yo-man ya'n sa. Afin Anannganman b'ɔ ti kɛ nzue ti kun bɔ i nun nzue'n ti klengle b'ɔ wie-man nun le sa'n, b'a yaci i lɛ.

Zeremi i Nyanmiɛn srɛlɛ

¹⁴ Anannganman, yo min juejue. Sɛ a yo min juejue-ɔ, n ´yo juejue sakpa. De min. Sɛ a de min-ɔn, n ´nyan n ti sakpa. Afin wɔ yɛ man n di alaje-ɔ.

¹⁵ Sran'm be se min kɛ: «?Nyrɛnnɛn nga Anannganman kɛnnin i ndɛ'n, ɔ yo sɛ ti yɛ i nuan yia-man-an? Man ɔ ju nan e nian e!»

¹⁶ Kusu nán kɛ min yɛ n suli wɔ bo kɛ a fa nyrɛnnɛn'n yi ye su-ɔ. Nán kɛ n klo kɛ nyrɛnnɛn sa'n bla-a. Ndɛ ng'ɔ fin mín nuan fite'n yɛ ɔ wo lɛ-ɔ, ɔ bɔbɔ a si.

¹⁷ Nán yo man min akunndan'n sanngan, afin nyrɛnnɛn blɛ nun'n, ɔ sin yɛ n fia-a.

¹⁸ Min yalɛ klefuɛ mun be yɛ ɔ ti bɔ be wun nyannzuɛn-ɔn, nán min-ɔn. Be yɛ ɔ ti bɔ be klun titi be-ɔ, nán min-ɔn. Yo man nyrɛnnɛn blɛ'n ju, man ɔ tɔ be su. Fa nyrɛnnɛn fa nnyɔn yi be su.

Wafa ng'ɔ fata kɛ be sie wunmiɛn-delɛ-cɛn'n i ngunmin'n

¹⁹ Anannganman'n seli min kɛ yoo: «Kɔ ko jran sran kpa'm be anuan'n nun kan Zida famiɛn'm be sin lɛ'n, jran Zerizalɛm anuan'n kwlaa nun.

²⁰ Se sran'm be kɛ: ‹Wɔ Zida famiɛn, amun Zidafuɛ mun kwlaa, yɛ amun Zerizalɛmfuɛ mun kwlaa bɔ amun sin anuan nga nun wa'n, an `sie amún su tie Anannganman i nuan ndɛ'n.›

²¹ Anannganman'n wan yoo: ‹An `nian amun wun kpa. Wunmiɛn-delɛ-cɛn'n nun nán an sua trɔ. Nán an fa trɔ wlu Zerizalɛm klɔ'n nun.

²² Kusu nán an fa trɔ amun awlo lɔ be fite. Nán an yo junman fi. An `sie wunmiɛn-delɛ-cɛn'n i ngunmin man min kɛ n fa kan kleli amun nannan mun'n sa.

²³ N kan kleli be-ɔ, b'a sie-man be su b'a tie-man, b'a kpɛ-man bé nyin wa nan se kɛ tilɛ yɛ be ´ti-ɔ.›

²⁴ Anannganman'n waan: ‹Sanngɛ amun liɛ'n, sɛ amun tie mín nuan ndɛ'n, nan amu'an fa-man trɔ b'a wlu-man Zerizalɛm klɔ'n nun wunmiɛn-delɛ-cɛn nun'n, sɛ an sie wunmiɛn-delɛ-cɛn'n i ngunmin be man min nan amu'an di-man junman fi cɛn sɔ nun'n,

²⁵ i liɛ'n famiɛn nga be tran David i famiɛn bia'n su'n, bɔ be fu kakaklolo nun annzɛ nnɛn kpanngɔ su'n, be nin be awlo lɔ sran dandan mun nin Zidafuɛ mun nin Zerizalɛm klɔ'n sufuɛ mun be su yaci-man klɔ i anuan'n nun sinlɛ le. Sran ´tran klɔ sɔ'n su titi.

²⁶ Sran'm be ´fɛ i Zida klɔ mun nin Zerizalɛm asa'm be su, nin Bɛnzamɛn nvle'n nun tɔnun lika nun, nin oka lika mun, ɔ nin ja ngua lɔ lika'm be nun be wa yi tɛ nga be yrɛ i nnɛn'n kɔlikɔli'n, ɔ nin bo kun yolɛ'n i su tɛ mun min sua'n nun. Yɛ be yi sraka nga be fa ble annzɛ like ng'ɔ ti kɛ ble sa'n be ´yi sraka'n man min.

²⁷ Nan sanngɛ sɛ amu'an sie-man amún su'n, sɛ amu'an sie-man wunmiɛn-delɛ-cɛn'n i ngunmin b'a man-man min nan an sua trɔ an fa sin Zerizalɛm klɔ'n i anuan nun, wunmiɛn-delɛ-cɛn nun'n, i liɛ'n, n ´trɔ klɔ'n nun sin yɛ sin sɔ'n ɔ ´di Zerizalɛm sua kpakpa mun, ɔ su nuan-man le.› »