Zeremi 16 - NYANMIƐN NDƐ'N 1998

Zeremi i ngunmin kalɛ

¹ Anannganman'n seli min kɛ yoo:

² «Nán ja bla, nán wu ba (yasua annzɛ ba bla) mɛn nga nun.»

³ Ba yasua nin ba bla nga be ´wu be lika nga nun'n, be nin be nin mun, ɔ nin bé si nga be wuli be'n, bé wun ndɛ nga Anannganman'n kan'n yɛ:

⁴ «Be ´wu nyrɛnnɛn wie, sran fi su sun-man be, be su sie-man be. Be fuɛn'n ɔ ´kplɔ, ɔ ´yo kɛ angrɛ sa asiɛ'n su. Alɛ'n nin awe'n ´di be. Be fuɛn'm be ´yo apɛtɛkuasi nin nsoso'm be aliɛ.»

⁵ Yɛ Anannganman'n seli min ekun kɛ: «Awlo nga be yo sɛ nun'n, nán wlu nun. Nán kɔ sɛ bo, nán yo sran fi yako. Min klun jɔ-man nvle nga nunfuɛ'm bé wun kun. N yo-man be kpa kun, n si-man be aunnvuɛ kun.» Anannganman'n yɛ ɔ kan sɔ-ɔ.

⁶ «I kpɛnngbɛn o, i bakan o, be wa wu mɛn nga nun. Be su sie-man be, be su bobo-man bé wun kannin yɛ be su yi-man bé ti be dunman nun.

⁷ Sran fi nin i sɔfuɛ'm be su di-man aliɛ kɛ be ´fa fɔnvɔ be. Sran nga i si annzɛ i nin wuli'n, ɔ su nyan-man sran b'ɔ ´mɛn i nzan ´yo i yako-ɔ.

⁸ Kusu nán kɔ awlo nga be su di cɛn nun'n nun. Nán a nin sran mun be tran be di like be nɔn nzan lɛ.»

⁹ Afin Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n i wan yoo: «Nian su, n wa yo man cɛn dilɛ kpankpanlɛ'n nin aklunjuɛ kpanlɛ'n, ɔ nin yasua annzɛ bla nga b'a ja be wun uflɛ uflɛ'n be jue tolɛ'n ɔ wa wie wa lika nga nun amun blɛ su. Amún nyin'n ´ta nun.»

¹⁰ «Sɛ a kan ndɛ nga kwlaa kle nvle nga nunfuɛ mun nan be usa wɔ kɛ: ‹?Ɔ yo sɛ ti yɛ Anannganman'n kan nyrɛnnɛn sa nga mun kwlaa kle ye nin-ɔn? ?Nguɛ sa yɛ e yoli-ɔ? ?Fɔnlɛ sɛ yɛ e fɔnnin Anannganman e Nyanmiɛn'n i wun-ɔn?›,

¹¹ tɛ be su kɛ: ‹Anannganman'n waan: Amún si'm be yili min ase, be ko suli ninnge'm be su, be suli be, be kotoli be bo. Be yili min ase, b'a fa-man min mmla'n su.

¹² Amun kusu sa tɛ nga amun yoli'n, ɔ trali amún si'm be liɛ'n. Amun waan amun klun klo akunndan liɛ'n cɛ yɛ amun ´fa su-ɔ. Ɔ lɛ-man amun nun kun. Ndɛ nga n kan'n, amun tie-man.

¹³ I sɔ'n ti, n ´to amun n ´guɛ i mɛn wie nun. Amun ´kɔ mɛn kun bɔ amún si'm b'a si-mɛn i bɔ amun kusu amun si-mɛn i'n nun. Amun ´su like wie mun lɔ kɔnguɛ nin wia su, afin n su si-man amun aunnvuɛ kun.› »

Izraɛlfuɛ'm be sin salɛ dan'n

¹⁴ Anannganman'n wan yoo: «Cɛn wie lele be ´ta nda-a, be su se-man kɛ: ‹N kan Nyanmiɛn b'ɔ fali Izraɛlfuɛ mun Ezipt mɛn'n nun bali'n kun.›

¹⁵ Be wa se kɛ: ‹N kan Nyanmiɛn b'ɔ fali Izraɛlfuɛ mun mɛn'n i nglo lɔ lika'n nin mɛnmɛn ng'ɔ man be bo sanndili nun'n be nun bali'n.› Afin n ´fa be n ´sa be sin lika nga n fa mannin be nannan mun'n i nun.»

Be kwlaa nga be yo sa tɛ'n wie fi su fite-man nun

¹⁶ Anannganman waan: «N wa sunman jue trafuɛ kpanngban kɛ be ko tra be. I sin n ´sunman koniɛn difuɛ kpanngban kɛ be di be wun koniɛn oka mun, nin kpɔlɛ'm be su, ɔ nin yɛbuɛ buɛ'm be kwlakwla be nun.

¹⁷ Afin ajalɛ nga be ´tu'n, mín nyin o su. Wie fi ti-man fiawa min nyrun. Mín nyin ta bé sa tɛ mun weiin.

¹⁸ N ´dun mmua m ´man bé sa tɛ'n i akatua sɔ fa nnyɔn min mɛn bɔ be yoli i fiɛn'n ti, ɔ nin be tete like bɔ be lɛ-man nguan bɔ be fa bali min lika'n nun'n ti.»

Sran'm be kwlaa be Nyanmiɛn kpli'n i silɛ

¹⁹ Anannganman, wɔ bɔ a man wunmiɛn'n, bɔ a ti kɛ min sasawlɛ klɔ'n sa, kɛ sa tɔ'n, ɔ́ sin yɛ n fia-a. Nvle-nvle'm be ´fin mɛn'n i bue kun lɔ be ´ba ɔ sin be ´se kɛ: «Like nga e nannan'm be yaci é si'm bé sa nun'n, ɔ ti ato like, ɔ yo-man sa fi ye.

²⁰ ?Sran kun kwla yi like b'ɔ kwla niɛn i su-ɔ? ?Sɛ ɔ kwla yi'n, i sɔ like'n kwla niɛn i su?»

²¹ Anannganman waan: «I sɔ'n ti n wa kle be kɛ n lɛ kwlalɛ yɛ n kwla. Ɔ man be wa si kɛ min dunman'n yɛlɛ Anannganman.»