Zeremi 14 - NYANMIƐN NDƐ'N 1998

Nzue b'ɔ ko jran'n i ndɛ

¹ Nzue b'ɔ ko jran'n i ti yɛ Anannganman'n kannin ndɛ nga kleli Zeremi-ɔ.

² «Zida nvle'n wo nyrɛnnɛn nun. I klɔ'm be su saci. Zerizalɛmfuɛ'm be su sun flɛ Nyanmiɛn.

³ Sran dandan'm be sunman be sran mun kɛ be ko sa nzue blɛ be. Be kɔ-ɔ, be nyan-man nzue gbo'm be nun lɔ. Be fa be sɛ kee'm be sa be sin ba. Be kata bé ti yɛ be ba-a nyannzuɛn'n dunman nun.

⁴ Nzue'n tɔ-man mɛn'n nun. Asiɛ'n ɔ'a tɛtɛ sa, i ti fie difuɛ'm be si-man wie se, be kata bé ti nyannzuɛn'n dunman nun.

⁵ Flete b'ɔ o bo nun lɔ'n bɔbɔ, ijre b'ɔ nyɛn-mɛn i nan ɔ'a di'n ti, ɔ wu ba-a, ɔ yaci i lɛ kɔ.

⁶ Blo aflunmun'm be ko jran kpɔlɛ'm bé ti afiɛn treketreke'n su. Be sie be bue'n kɛ be ´ti nvan kɛ nsoso mun sa. Be kunndɛ nnya-nnya'n lele be nyinma'n bloblo bé ti nun ngbɛn.»

(Izraɛlfuɛ'm be waan)

⁷ «Kɛ e nian e sa tɛ mun'n, e si kɛ y'a fɔn, sanngɛ Anannganman, nian ɔ dunman'n ti uka ye. E yoli nyin kekle'n sunman. E fɔnnin ɔ wun.

⁸ ?Wɔ bɔ ɔ su yɛ Izraɛlfuɛ'm be fa be wla'n gua'n, wɔ bɔ sɛ sa tɔ be su-ɔ, wɔ yɛ a ti be defuɛ'n, ɔ yo sɛ ti yɛ a yo ɔ́ wun kɛ aofuɛ wie sa sɔ-ɔ? ?Ɔ yo sɛ ti yɛ a yo ɔ́ wun kɛ sran wie b'ɔ su sin kɔ i lika yɛ wa a sike sran cɛn kun sa sɔ-ɔ?

⁹ ?Ɔ yo sɛ ti yɛ a yo kɛ sran b'ɔ kwlɛ-mɛn i wun kan sa sɔ-ɔ? ?Ɔ yo sɛ ti yɛ a yo kɛ sonja b'ɔ de sran-an ɔ yo-man ye sa nin-ɔn? Kusu wuun a nin ye yɛ e o wa-a, Anannganman. E o ɔ dunman nun. Nán yi ye ase.»

*

¹⁰ Nvle nga nunfuɛ'm be wun ndɛ bɔ Anannganman kan'n yɛ: «Be akunndan'n ti nnyɔn-nnyɔn ngboko. Bé nyin kan-man ase. Anannganman'n klo-mɛn i sɔ'n. I nyin wo bé sa tɛ'm be su. Ɔ ´bu be fɔ bé sa tɛ'n ti.»

¹¹ Anannganman'n seli min kɛ: «Nán kpata nvle nga nunfuɛ'm be ti, nán srɛ like kpa man be.

¹² Sɛ be ci nglɛmun be kpata min bɔbɔ-ɔ, n su sie-man mín su. Sɛ be yi tɛ nga be yrɛ i nnɛn'n kɔlikɔli nin o, sɛ be yi sraka be mannin min o, n su sɔ-man nun. N ´fa alɛ nin awe, nin tukpacɛ b'ɔ sa ndɛndɛ'n n ´wiewie be.»

¹³ Yɛ n tɛli su kɛ: «Ee! Anannganman Nyanmiɛn kpli, Nyanmiɛn nuan ijɔfuɛ'm be seli be kɛ: ‹Alɛ su tɔ-man amun su. Awe su kpɛn-man amun su. Nyanmiɛn'n ´yo man amun ´nyan fɔundi dan lika nga nun wa.› »

¹⁴ Yɛ Anannganman'n tɛli min su kɛ: «I sɔ sran liɛ'm be tɔn be wun suɛn ngbɛn, nán min yɛ n sunmannin be-ɔ. M'an fa-man ndɛ m'an sie-man be nyrun, m'an kan-man ndɛ m'an kle-man be. Bé ti nun ninnge nga be wun i'n, ɔ ti ato. Sa nga be kɛn i kɛ ɔ wa ju'n, finfin ndɛ yɛ be kan-an. Be kpɛ bé ti nun yɛ be kan-an.»

¹⁵ I sɔ'n ti, nga n kan man be'n yɛ: «Be nga m'an sunman-man be bɔ be tɔn be wun suɛn kɛ be ijɔ mín nuan'n bɔ be kɛn i kɛ: ‹Alɛ su tɔ-man mɛn nga nun, awe su kpɛn-man mɛn nga nun.›, be nga be tɔn be wun suɛn kɛ be ti min nuan ijɔfuɛ'n, alɛ'n nin awe'n yɛ ɔ ´kun be-ɔ.

¹⁶ Sran nga kusu bɔ be kan ndɛ sɔ'n kle be'n, awe'n nin alɛ'n ´kun be, be ´gua Zerizalɛm akpɔ'm be su flɛnnɛnnɛn! Be su nyan-man sran fi b'ɔ ´sie be-ɔ. Be nin be yi mun nin be mma yasua mun, ɔ nin be mma bla mun, sa tɛ nga be yoli'n, n ´fa taka bé ti afiɛn.»

¹⁷ «Se be kɛ yoo: ‹Mín nyinmuɛn'n bu kɔnguɛ nin wia nun. Nán ɔ yaci bulɛ le. Afin nyrɛnnɛn dan kpa ɔ'a tɔ min nvle'n bɔ sɛ ɔ ti bla-a, wuun n ´se kɛ ɔ nian si-man bian le'n su. Kannin ng'ɔ ɔ'a tu i'n ti-man blɛblɛ.

¹⁸ A kɔ fie su lɔ-ɔ, kɛ fuɛn'm be tru sa. A wlu klɔ nun-ɔn, awe'n kle-man sran'm be yalɛ ngowa. Yɛ min nuan ijɔfuɛ nin min nyrun jranfuɛ'm be wlan mɛn nun'n, be wun-man sa ng'ɔ ju'n be nyanndra.› »

(Izraɛlfuɛ'm be waan)

¹⁹ «?Nan Zida i blo yɛ a yi i mlɔnmlɔn-ɔn? ?Ɔ konvi li yɛ ɔ'a tu Siɔn su-ɔ? ?Ɔ yo sɛ ti yɛ a bo ye nin kannin ng'ɔ tu be-ɔ be nyɛn-mɛn i wun ayre nin-ɔn? Y'a minndɛ fɔundi'n lele ngbɛn. E minndɛ juejue yolɛ'n, sanngɛ sa ng'ɔ ba'n ɔ yo sro.

²⁰ Anannganman, e si kɛ e ti-man sɛsɛ ɔ nyrun. E si kɛ é si'm be yoli sa tɛ. Nanwlɛ e fɔnnin ɔ́ wun.

²¹ Nian ɔ dunman'n ti nán yo ye finfin. Nán yo ɔ famiɛn bia klanman'n i wannzo. Nán ɔ́ wla fi aenguɛ nga a nin ye trali'n su, nán saci i.

²² ?Nvle nga nunfuɛ'm bé finfin ninnge nga be su be'n, onin cɛ yɛ ɔ kwla tɔ nzue-ɔ? ?Nzue'n fin nglo lɔ tɔ sa ngbɛn? ?Nán wɔ yɛ man nzue'n tɔ-ɔ? Anannganman e Nyanmiɛn, ɔ su yɛ é wla'n wo-ɔ. Afin wɔ yɛ a yo sa ng'ɔ o lɛ i kwlaa nin-ɔn.»