Zeremi 13 - NYANMIƐN NDƐ'N 1998

Bé bo kplo b'ɔ kplɔli'n i ndɛ

¹ Anannganman'n seli min kɛ yoo: «Ko to lɛn kplo fa ci ɔ bo, sanngɛ nán wlɛ i nzue nun o.»

² Yɛ n ko toli bé bo kplo'n kɛ Anannganman kannin'n sa nan m'an fa ci mín bo.

³ Kpɛkuun Anannganman seli min ekun kɛ:

⁴ «Bé bo kplo nga a toli'n b'ɔ ci ɔ́ bo'n, fa kɔ Efrat nzue ba'n nuan lɔ fa ko fiɛ i yɛbuɛ buɛ wie nun.»

⁵ Yɛ n fa ko fiali Efrat nuan lɔ kɛ Anannganman seli min'n sa-a.

⁶ I osu'n cɛli lɔun kpa, kpɛkuun Anannganman'n waan: «Jaso kɔ Efrat nuan lɔ ko fa bé bo kplo bɔ n seli wɔ kɛ a ko fa fia lɔ'n.»

⁷ Yɛ n wɔli Efrat nuan lɔ yɛ n ´ko kunndɛ kan n sieli bé bo kplo'n nan m'an fa. N ´nian-an, ɔ'a saci, be fa yo like fi-ɔ, ɔ yo-man ye kun.

⁸ Yɛ Anannganman'n seli min kɛ:

⁹ «Min Anannganman'n min wan yoo: ‹Like nga Zidafuɛ'm be fa di be nuan, like nga Zerizalɛmfuɛ'm be fa di be nuan beblebe'n, kɛ n ´saci i sa.

¹⁰ Nvle tɛfuɛ nga, sran nga n kan ndɛ n kle be-ɔ ɔ gua bé su sin, bɔ be akunndan liɛ ng'ɔ o bé ti nun'n kunngba yɛ be si i'n, bɔ amuɛn mun yɛ be waan be fa man be nan be sɔ'n, nan be koto be bo'n, nvle sɔ'n, ɔ ´yo kɛ bé bo kplo nga be fa be yo like-ɔ ɔ yo-man ye kun yɛ'n sa.

¹¹ Afin n fali Izraɛl nvle wunmuan'n ɔ nin Zida akpasua wunmuan'n n cili mín bo kɛ sran fa bé bo kplo ci i bo'n sa. N waan n ´yo sɔ nan be `yo min nvle nan n ´nyan dunman, nan be `yo min anyrunnyan like, nan n `fa be di min gbanflɛn, sanngɛ b'a fa-man bé ti b'a de-man.› »

Izraɛlfuɛ'm b'a klɔklɔ Nyanmiɛn

¹² «Kan ndɛ ng'ɔ o yɛ'n kle be, se be kɛ: ‹Anannganman, b'ɔ ti Izraɛl Nyanmiɛn'n wan yoo: Sa ti bɔ be wu nzan sɛ'n, i nun nzan gualɛ ti-ɔ.› Sɛ be tɛ ɔ su kɛ: ‹E si kɛ kɛ be wu nzan sɛ'n, i nun nzan gualɛ ti-ɔ.›

¹³ Se be kɛ: ‹Anannganman'n wan yoo: N ´sanngan mɛn nga nunfuɛ'm be nun, i famiɛn nga be ti David famiɛn bia'n su mun o, min nyrun jranfuɛ mun o, min nuan ijɔfuɛ mun o, ɔ nin Zerizalɛmfuɛ'm be kwlaa, n ´sanngan be nun. Be ´yo kɛ nzan ɔ'a ti be sa.

¹⁴ N ´yo man be jaso be wiengu wun, siɛ mun nin ba mun be ´kun be wun. N su yaci-man sran fi lɛ. N su si-man wie aunnvuɛ mlɔnmlɔn, n ´nunnun be kwlaa'n kpan.› » Anannganman'n yɛ ɔ kan sɔ-ɔ.

Nyanmiɛn ndɛ i su falɛ ndɛndɛ'n ti kpa

¹⁵ An `sie amún su tie. An `yaci amún wun tulɛ'n. Anannganman'n kan ndɛ.

¹⁶ An `manman Anannganman amun Nyanmiɛn'n. Ɔ'a yo-man sɔ-ɔ, aosin'n ´ba. Ɔ man amún ja ´kpla oka mun lika tuun'n ti. Ɔ'a yo-man sɔ-ɔ, amun ´minndɛ kɛ aliɛ'n `cɛn lele ngbɛn. Anannganman ´yo man lika'n ɔ kaci aosin tritri kpa. Ɔ ´kaci i kɛ nyanmiɛn ble tuun'n sa.

¹⁷ Sɛ amu'an tie-man ndɛ nga'n, sunlɛ yɛ n ´fia n sun-ɔn amún wun tulɛ dan bɔ an tu'n ti. Anannganman i bua'm be lomuɛn bɔ be ´tra be kɔ'n ti, mín nyinmuɛn'n wie to wie atin nun.

Nyanmiɛn i ndɛ ng'ɔ kan kleli famiɛn'n i awlofuɛ mun'n

¹⁸ Se famiɛn'n nin i nin be kɛ: «An `bubu gua asiɛ wun gblo. Afin amun famiɛn kle klanman'n ɔ'a fin amún ti su ɔ'a tɔ.

¹⁹ B'a nyin mɛn'n i ngua lɔ klɔ'm be anuan mun. Sran fi nun-man lɔ b'ɔ ´tike-ɔ. B'a tra Zida nvle wunmuan'n lomuɛn b'a wɔ. Be trali be kwlaa ɔli.»

Zerizalɛm i nyin a gua ase

²⁰ «Zerizalɛm, man ɔ nyin'n su nian be bɔ be fin mɛn'n i nglo lɔ be su ba'n. ?Ɔ sran nga be fa be mannin wɔ'n be o nin? ?Ɔ sran sɔ mun bɔ man be ti a lɛ nyrun'n be o nin?

²¹ ?Be nga a fali ɔ wun mannin be man be sieli wɔ'n, kɛ be ´ba wɔ bolɛ'n, a ´se sɛ? ?Kɛ a ´wun kɛ be nga be nin wɔ mantan mun be su ba'n, ɔ klun'n su kisan-man wɔ fiaan kɛ bla bɔ i ba wulɛ ɔ'a to i'n sa?

²² A wa usa ɔ́ wun kɛ: ‹?Nguɛ ti yɛ sa nga'm be ju min su-ɔ?› Sɛ a ti bla'n, wuun n ´se kɛ sa tɛ dan bɔ a yoli'n ti yɛ be trali wɔ bɔ be nin wɔ lali kekle nun nin-ɔn.

²³ ?Etiopifuɛ kun kaci i wunnɛn kplo nin-ɔn ɔ yo ye? ?Kangale kun kaci i wunnɛn tata nun nin-ɔn, ɔ yo ye? Amun kusu kɛ an ti sɔ-ɔ. Amu'an yo sa tɛ'n lele ɔ'a kaci amun nzuɛn. I ti siɛn'n an yo sa kpa-a ɔ yo-man ye kun.

²⁴ N wa tru amun nun kɛ ijre bɔ aawlɛ flɛnnɛn nun aunngban'n fitɛ i kɔ'n sa.

²⁵ Zerizalɛm, sa ng'ɔ wa ju ɔ su'n yɛ ɔ o lɛ-ɔ. Ɔ liɛ nga m'an fa m'an sie wɔ'n yɛ ɔ o lɛ-ɔ. Afin a yili ɔ́ wla min su. A ko fali ɔ́ wla'n guali ato ninnge'm be su.» Anannganman'n yɛ ɔ kan sɔ-ɔ.

²⁶ Sɛ a ti bla'n, wuun n ´se kɛ: «N kusu n wa kpa ɔ bo nan a `wun nyannzuɛn.

²⁷ Ɔ bian bɔ a kunndɛli mín bo'n, ɔ nin ɔ bian sa ngboko'n, ɔ nin ɔ tekle dan nga a boli'n, n wunnin be kpɔlɛ'm be su nin fie'm be su. N wunnin ɔ tete ninnge mun. Zerizalɛm, yako nin ɔ́ wun saun bɔ ɔ waan a yo-man'n. ?Cɛn onin ko yɛ a ´yaci kokowa bolɛ nin-ɔn?»