Zeremi 12 - NYANMIƐN NDƐ'N 1998

¹ Anannganman, a ti sɛsɛ ngboko. Kɛ e nin wɔ e `si akplowa'n, ɔ ti-man su. Sanngɛ n waan e nin wɔ e ´koko sa nga a yo i nuan su'n i wun yalɛ. Kɛ ajalɛ nga klunwifuɛ'm be tu'n ɔ yo ye man be'n, n wun-mɛn i wlɛ. Kɛ be nga be yaci wɔ atin'n lɛ be fa uflɛ'n be ti be tilɛ lɛ cɛ'n, n wun-mɛn i wlɛ.

² A ta be kɛ waka sa. B'a tra ndin, be su nyin, be su su mma. Ɔ dunman'n jaso-man be nuan nun le, sanngɛ wuun be anwlɛn'n nun-man ɔ su.

³ N liɛ'n, a si min, Anannganman, a wun min, a si kɛ min anwlɛn'n wo ɔ su. Sran sɔ'm be liɛ'n, yi be sie be lɛ kɛ nnɛn bɔ be su wa ko kun be'n sa. Sie be ngunmin man be minndɛ be kunlɛ cɛn'n.

⁴ ?Cɛn onin ko nan awlaboɛ'n ɔ'a tu mɛn'n nun nan ninnge'm b'a yaci kee wulɛ fie'm be su? Nnɛn nin anunman'm be su wie wu mɛn'n nun sran'm bé sa tɛ'n dunman nun. Be ko se kɛ: «Nyanmiɛn'n wun-man sa nga e yo'n.»

⁵ «A nin be bɔ be wanndi bé ja nun'n be wanndi-ɔ ɔ wunmiɛn'n kpu ɔ wun. ?Yɛ wuun kɛ ɔ o lɛ'n, a nin nnɛn kpanngɔ'm be si akplowa-a ɔ yo ye? ?Sɛ mɛn b'ɔ ti fɔuun'n i nun cɛ yɛ a tran-an, ɔ́ wla kwla gua ase kan'n, sɛ a ju Zurdɛn i nuan susrɛ'n nun'n a yo i sɛ ko?

⁶ Wɔ akpasua sufuɛ mun be yo wɔ atɛ. Wɔ awlofuɛ mun bɔbɔ be yo wɔ atɛ wie. Be wlawla sran mun kɛ be yo wɔ like. Ɔ man sɛ be kan ndɛ fɛfɛ kle wɔ'n, nán fa su.»

Anannganman yili i fuɛ mun mannin gua man b'a yo wannzo

⁷ «M'an yi min awlo'n m'an man gua. M'an yi min aja'n i ase. M'an yi like nga n klo i lele tratra su'n m'an wla min kpɔfuɛ'm be sa nun.

⁸ Min nvlefuɛ'm be wa kacili kɛ asɔmɔli bɔ be o blo lɔ'n sa. B'a triki min kɔmin su, ɔ man min konvi tuli be su.

⁹ ?Min nvlefuɛ mun be yɛ b'a yo kɛ anunman wie sa bɔ nnɛn wlɛfuɛ'm be sɔ i wa be sɔ i wa sɔ-ɔ? Be `yiayia bo nun nnɛn mun. Man be wa di cɛn.

¹⁰ Nnɛn kankanfuɛ kpanngban kpa b'a saci min vinyi fie'n, b'a tiatia min fie'n su ninnge'm be su. B'a bubu min lika bɔ n klo-mɛn i ngowa'n sɔ flɛnnɛnnɛn.

¹¹ Ɔ man ɔ'a kaci kɛ aawlɛ flɛnnɛn sa. Ɔ'a yo kɛ sran bɔ sɛ ɔ'a tɔ i su'n sa. Kɛ n niɛn sa'n, ɔ'a nunnun mlɔnmlɔn. Mɛn'n ɔ'a saci, sanngɛ ɔ ti-man sran fi ndɛ.

¹² Ninnge fɛnfuɛ'm be fin aawlɛ flɛnnɛn'n nun lɔ oka treketreke'm be kwlaa be su be ba, Anannganman i tokofi'n ɔ'a di mɛn'n i bue kun wa lele ɔ'a kpɛn i bue kun lɔ. Sran fi su fite-man nun.

¹³ Be guali ble, sanngɛ like nga be kpɛ'n yɛlɛ owie. Be fɛli lele ngbɛn, be su nyan-man like. Anannganman i ya dan b'ɔ fali'n ti'n like nga amun luali'n i su mma nga amun tili'n ti, man nyannzuɛn ´kun amun.»

Anannganman nin be nga be mantan Izraɛl'n be lɛ i

¹⁴ Ndɛ nga Anannganman'n kɛnnin i Izraɛl i tranfuɛ tɛtɛ'm be wun'n yɛ: «Be sa kannin mɛn nga n fa mannin min nvle Izraɛlfuɛ mun'n b'ɔ ti be aja'n. N ´tu be be asiɛ'n su. Yɛ n ´tu Zidafuɛ mun be afiɛn lɛ wie.

¹⁵ Sanngɛ kɛ n ko tu be n ko wɔ'n, i sin n wa si be aunnvuɛ. N ´fa be n sa be sin be lika kunngun mun nin mɛn kunngun'm be nun.

¹⁶ Laa, be kleli min nvlefuɛ mun kɛ be `fa Baal dunman'n be ta nda, sanngɛ sɛ be suan min nvlefuɛ'm be nantilɛ'n nan sɛ be fa min dunman'n be ta nda be se kɛ: ‹N kan Anannganman'n, n ´fa be n ´sie i min nvlefuɛ'm be nun.

¹⁷ Sanngɛ nvle nga i waan ɔ di-man su'n, n ´tu i bo kɛ waka sa, n ´kun i.› » Anannganman'n yɛ ɔ kan sɔ-ɔ.