Zeremi 11 - NYANMIƐN NDƐ'N 1998

Nvle nga i nunfuɛ'm be tali nda ngbɛn'n

¹ Anannganman'n fali ndɛ ng'ɔ o yɛ'n wlɛli i Zeremi nuan. I waan:

² «Kan kle Zidafuɛ mun nin Zerizalɛmfuɛ mun, se be kɛ: ‹An `fa aenguɛ nga e nin amun e trali'n i nun ndɛ'm be su.›

^3-4 Se be kɛ Anannganman b'ɔ ti Izraɛl Nyanmiɛn'n waan yoo: ‹Sran nga ɔ'a nian-man aenguɛ nga e nin amun e trali su ɔ'a nanti-man'n, i yako! Aenguɛ sɔ'n yɛlɛ nga kɛ ɔ fin cɛn bɔ n fali amun nannan mun ɔ liɛ Ezipt sin fɛtɛ sɔ'n nun fiteli'n e trali'n. N seli be kɛ: Sɛ an tie min aniɛn nan an nian sa nga n fa sieli amun nyrun'n i kwlaa su'n, an ´yo min nvle yɛ min kusu n ´yo amun Nyanmiɛn.

⁵ Kpɛkuun nda nga n tali amun nannan mun kɛ n ´fa asiɛ bɔ ti nnɛn tawlɛ klanman b'ɔ kunngba'n yo like ye'n m ´man be'n, n ´yiɛ i nuan.› I kusu yɛ amun wun i andɛ yɛ, yɛ n tɛli i su kɛ: ‹Anannganman, man ɔ yo sɔ!› »

⁶ Anannganman'n seli min kɛ: «Kan ndɛ ng'ɔ o yɛ'n Zida klɔ'm be su, kan sin Zerizalɛm akpɔ'm be su. Se kɛ: ‹An `nian aenguɛ sɔ'n su be nanti.

⁷ Kɛ ɔ fin cɛn bɔ n fali amun nannan mun Ezipt mɛn'n nun m bali'n yɛ m boli ndɛ nga mun be kan klelɛ'n bo-ɔ. Lele ndɛ n tɛ kan n tɛ kle be. N se be kɛ: An `tie min aniɛn'n,

⁸ sanngɛ b'a sie-man bé su nan se kɛ tielɛ yɛ be ´tie-ɔ. Bé klun klo like liɛ nga be waan be ´yo'n yɛ be yoli-ɔ. Kɛ n kɛn i lele bɔ b'a fa-man su'n, yɛ min kusu n niannin aenguɛ sɔ'n nun sa ng'ɔ ti bɔ n `fa yo be'n yɛ n fa yoli be-ɔ.› »

⁹ Anannganman'n seli min kɛ: «Zidafuɛ nin Zerizalɛmfuɛ kpa'n, b'a cici min wun ndɛ.

¹⁰ Nga be nannan'm bɔ be waan be fa-man min ndɛ'n su'n be yoli'n, yɛ be kusu be su yo i siɛn nin-ɔn. B'a ɔ amuɛn'm be sulɛ. Izraɛlfuɛ nin Zidafuɛ'm b'a yi aenguɛ nga e nin be nannan mun e trali'n i ase.»

¹¹ I sɔ'n ti Anannganman'n wan yoo: «Nyrɛnnɛn nga n wa fa yi be su'n, be su kwla fin-man nun fite-man. Sɛ be kpan flɛ min-ɔn, m ´bu min sukpɔ nun waka.

¹² Zida klɔklɔ'm be sufuɛ mun ɔ nin Zerizalɛmfuɛ'm be ´kpan flɛ be amuɛn nga be yra ansans man be'n, sanngɛ be de be nyrɛnnɛn sɔ nun-ɔn, ɔ su yo-man ye.

¹³ Zidafuɛ'm be amuɛn'm be kpanngban nin be klɔ'm be nuan'n sɛ. Yɛ kɛ be klɔ'm be akpɔ'm be nuan'n fa ti'n, i su yɛ be nian be taka be nyannzuɛn like kɛ Baal sa'n i sɔwlɛ mun-ɔn.

¹⁴ I sɔ'n ti Zeremi, nán kpata nvle nga nunfuɛ'm be ti. Nán sun flɛ min, nán kpata min. Afin kɛ nyrɛnnɛn'n ´tɔ be su'n, sɛ be flɛ min'n, n su tie-man.»

Izraɛl ti kɛ olivie bɔ Anannganman tali'n sa

¹⁵ Anannganman waan: «?Min sran kpa, a ba nguɛ yolɛ mín sua'n nun wa? ?Wɔ bɔ sa tɛtɛ'n cɛ yɛ a yo'n a bu i kɛ nda nga a ta min'n ɔ nin sraka nga a yi man min'n, be ´yi sa ng'ɔ o ɔ su'n nan ɔ klun wa jɔ?»

¹⁶ Anannganman flɛli amun kɛ Olivie Klanman B'ɔ Su Mma Kpa, sanngɛ nganniɛn dan kun tɛli, kpɛkuun ɔ fali sin yili i nun, yɛ i sama'm be wieli saci.

¹⁷ Anannganman b'ɔ sie mɛn wunmuan'n b'ɔ tali amun'n, sa tɛ nga Izraɛlfuɛ mun nin Zidafuɛ'm be yoli'n, ansans nga be yra mannin Baal'n ti ɔ'a siesie kɛ nyrɛnnɛn tɔ amun su.

Zeremi i yalɛ bɔ be kleli i'n

¹⁸ Anannganman'n yili sa'n i nglo kleli min, ɔ man m'an wun i wlɛ. M'an wun min wun akunndan nga be bu'n.

¹⁹ Laa n ti kɛ bua nga ɔ'a kpɛ cro wie bɔ be ´fɛ i kɔ i kunlɛ-ɔ ɔ kpli-man'n sa. Min wun akunndan tɛtɛ wla nga be ´bu'n, n si-man nun. Be ko se kɛ: «E `kun waka'n nin i mma mun, man be jaso lɛ. Nán be bo be ndɛ su di jɔlɛ kun.»

²⁰ Yɛ Anannganman b'ɔ sie mɛn wunmuan'n, kusu b'ɔ ti jɔlɛ difuɛ kun b'ɔ di ndɛ nanwlɛ, akunndan nga sran'm be bu i be klun lɔ'n, ɔ si. Kɛ a ´tu ɔ klunngbɔ be su'n, ɔ ´yo min nyrun. Ɔ sa nun yɛ min ndɛ'n ɔ wo-ɔ.

²¹ Ɔ man Anatɔtfuɛ mun bɔ be kunndɛ kɛ n wu'n bɔ be waan: « Nán kan Anannganman'n i nuan ndɛ'n, ɔ'a yo-man sɔ-ɔ, e ´kun wɔ'n,»

²² be ti Anannganman'n wan yoo: «E nin be e wa yia nun. Alɛ'n ´di be gbanflɛn mun, awe'n kun bé mma yasua nin bé mma bla mun.

²³ Nyrɛnnɛn nga n wa fa yi i Anatɔtfuɛ'm be su'n, be nun kun sa su fite-man nun.»