Zeremi 10 - NYANMIƐN NDƐ'N 1998

Amuɛn'm be nin Nyanmiɛn be sɛ-man

¹ Izraɛlfuɛ mun, an `tie ndɛ nga Anannganman'n kan kle amun'n.

² Anannganman'n wan yoo: «Nán an sɔnnzɔn nvle kun nga mun. Nzɔliɛ ng'ɔ fite nyanmiɛn'n b'ɔ la nglo lɔ plaii'n i su'n b'ɔ yo nvle kun nga'm be sro'n, nán be yo amun sro.

³ Nvle kun nga'm be ninnge nga be yo'n ɔ ti finfin like. Be ko kpɛ waka bo nun, ajuin difuɛ'n fɛ i soma'n fa sɛ.

⁴ Be fa jɛtɛ ufue annzɛ sika ɔkwlɛ be klo guɛ i wun be fa yo i klanman. Kpɛkuun be fa kpɛngbɛ be fa trɛ i ase nan ɔ'a tɔ-man.

⁵ Ɔ ti kɛ like nga be sie i fie'm be nun be fa wlanwlan anunman mun'n sa. Be ijɔ-man, kusu be nanti-man, sran yɛ ɔ sua be-ɔ. Nán amun sro be. Be yo sran sa-a ɔ yo-man ye. Be yo i sa kpa kusu-ɔ ɔ yo-man ye.»

⁶ Anannganman, like fi nin wɔ sɛ-man. A ti dan kɛ a kwla bɔ ɔ dunman'n fa fu ju'n sa.

⁷ ?Nvle wunmuan'n be famiɛn: wan cɛ yɛ ɔ lɛ atin se kɛ i nyin yi-man wɔ-ɔ? A nin ainyiɛ fata. Afin nvle nin famiɛn diwlɛ'm be nun ngwlɛlɛfuɛ'm be kwlaa be nun sran fi nin wɔ sɛ-man .

⁸ Be kwlakwla be ti sinnglinfuɛ kpan. Waka bɔ be sɔ i'n kle kɛ be ti finfinfuɛ.

⁹ Be ko fa jɛtɛ ufue fɛtɛfɛtɛ Tarsis lɔ annzɛ sika ɔkwlɛ nnya Ifaz lɔ. Sika tɔnfuɛ'm be di i wun junman, ajuin difuɛ'm be di i wun junman, kpɛkuun be fa kɛtɛ i wun klanman cɛ. Be yo wie ɔkwlɛ, wie kusu ti ɔkwlɛ srosrowa. I kwlaa ng'ɔ o lɛ'n, ɔ ti ajuin difuɛ'm bé sa nuan like.

¹⁰ Anannganman'n ɔ ti Nyanmiɛn sakpa. Ɔ ti Nyanmiɛn kun b'ɔ lafi-man. I kunngba'n ti famiɛn b'ɔ ti adudua. Kɛ ɔ ko fa ya sa'n, asiɛ wunmuan'n keje. Nvle-nvle'm be nunfuɛ'm be yo i like'n wie fi-ɔ ɔ yo-man ye.

¹¹ «An `se be kɛ yoo: ‹Ninnge sɔ'm bɔ nán be yɛ be yili nglo lɔ nin asiɛ'n, be ´nunnun asiɛ'n su. Be su wun-man be kun.› »

¹² I kwlalɛ b'ɔ kwla'n ɔ man ɔ yili asiɛ'n. I ngwlɛlɛ'n man ɔ wlali mɛn'n i bo ase. I ngwlɛlɛ'n man ɔ trɛli nglo lɔ'n nun kɛ tannin sa.

¹³ I nuan b'ɔ ´uke sa'n, kpɛkuun nyanmiɛn su lɔ nzue'm b'a kan b'a bo nun. Nzue'n mlan dan kpa asiɛ'n i bue kun lɔ. Ɔ man nyanmiɛn'n kpa sin kpɛkuun nzue'n tɔ. Aunngban'n fin i finwlɛ nun fite.

¹⁴ Sran'm be kwlaa be kaci sinnglinfuɛ. Be wun-man sa wlɛ. Ajuin difuɛ nga be yi amuɛn ba'n be wun nyannzuɛn. Be wun kɛ bé sa nuan like sɔ'n be ti finfin like. Nguan fi nun-man be nun.

¹⁵ Be ti ninnge finfin, be nin finfin yolɛ fata. Cɛn nga Anannganman'n ´tu be fɔ'n, be ´wie nunnun.

¹⁶ Sanngɛ sran ng'ɔ ti kɛ Zakɔb osu nunfuɛ'm be anyanbeun like sa'n, ɔ ti-man kɛ ninnge finfin sɔ'm be sa. Afin i yɛ ɔ ti mɛn wunmuan'n i bofuɛ nin-ɔn. Sran sɔ'n, Izraɛl ti i liɛ mlɔnmlɔn. I dunman'n yɛlɛ Anannganman b'ɔ sie mɛn wunmuan'n.

Sacilɛ bɔ ɔ'a mantan koko'n (Zeremi waan)

¹⁷ Zerizalɛm klɔ, bɔ ɔ kpɔfuɛ'm b'a sin b'a yia wɔ'n, man ɔ onga b'ɔ nannan asiɛ wun'n su.

¹⁸ Anannganman'n wan yoo: «Ndɛkɛn liɛ'n, n wa finndin mɛn nga nunfuɛ mun n yi i lɔ. Kɛ n ´fuan be'n, m ´mantan be koko nan m'an nyan be.»

(Zerizalɛm waan)

¹⁹ «Ee! Nian kannin bɔ ɔ'a tu min-ɔn! Nga wu-ɔ ɔ yo-man ye. Min bɔ n waan: ‹Min afɛ'n ti-man dan sɔ nan n suɛn i bo-ɔ ɔ yo ye'n,

²⁰ yɛ mín tannin sua'n ɔ'a bubu yɛ i nyanman'm b'a kpɛkpɛ yɛ. Min mma'm b'a ɔ, b'a fi mín sa. N lɛ-man sran fi b'ɔ ´man mín tannin sua'n su-ɔ. N lɛ-man sran fi b'ɔ ´tanndan nun-ɔn.› »

(Zeremi waan)

²¹ Bé su kpɛn mun yɛ be yoli-ɔ. Be yoli sinnzin, b'a mantan-man Anannganman'n, i ti yɛ b'a si-mɛn i yo bɔ sran nga be nian be su'm be bo sanndili-ɔ.

²² An `tie nganniɛn ng'ɔ tɛ ba'n. Mɛn i sannganlɛ like kun fin mɛn'n i nglo lɔ lika'n nun su ba. Ɔ wa nunnun Zida klɔ mun. Be ´kaci nsoso'm be lawlɛ.

Zeremi su srɛ i nvle'n i ti

²³ Anannganman, n si kɛ sran'n i nguan'n nun-mɛn i sa nun. Ajalɛ ng'ɔ tu'n, ɔ fin-mɛn i .

²⁴ Anannganman, a ´tu min fɔ-ɔ, tu i kɛ ɔ fata'n sa. Nán tu i ya su. Ɔ'a yo-man sɔ-ɔ, n su fite-man nun.

²⁵ Be ng'ɔ fata kɛ ɔ ya dan'n tran be su'n, yɛlɛ mɛn nga be si-man wɔ'n, yɛlɛ minniɛn nga be bo-man ɔ dunman'n. Afin be su fɛn ɔ nvlefuɛ'm be bo ninnge mun. Be su saci be tranwlɛ'n, be su nunnun be.