Zeremi 1 - NYANMIƐN NDƐ'N 1998

¹ Ndɛ nga Zeremi kannin'n yɛ ɔ o yɛ. Bɛnzamɛn nvle'n nun lɔ klɔ nga be flɛ i kɛ Anatɔt'n, lɔ Nyanmiɛn nyrun jranfuɛ'm be nun kun bɔ be flɛ i kɛ Ilkiza'n i wa yɛlɛ Zeremi.

² Anannganman kannin ndɛ kleli i famiɛn Zozias i sielɛ'n i afuɛ blu-nin-nsan'n su. Amɔn b'ɔ ti Zida famiɛn'n i wa yɛlɛ Zozias.

³ Ɔ kannin ndɛ kleli i ekun famiɛn Zozias b'ɔ ti Zida famiɛn'n i wa bɔ be flɛ i Zozakim'n i blɛ su lele fa juli Zozias i wa Sedesias b'ɔ ti Zida famiɛn'n i sielɛ'n i afuɛ blu-nin-kun'n i anglo nnun'n su. Ɔ kannin ndɛ kleli i lele juli blɛ bɔ be trali Zerizalɛmfuɛ mun be lomuɛn ɔli'n.

M'an fa min ndɛ'n m'an wla ɔ́ nuan

⁴ Anannganman'n kannin ndɛ kleli min. I waan:

⁵ «N si wɔ kwlaa nan m'an siesie wɔ ɔ́ nin klun lɔ. N fali wɔ n sieli i ngunmin kwlaa nan b'a wu wɔ. N dun mmua n sieli wɔ kɛ a ijɔ mín nuan kle nvle-nvle mun .»

⁶ N tɛli su kɛ: «Ee min Min Anannganman, n ti bakan n si-man ijɔ .»

⁷ Yɛ Anannganman'n seli min kɛ: «Nán se kɛ a ti bakan, sran nga n sunman wɔ bé sin'n, kɔ be kwlaa bé sin. Ndɛ kwlaa nga n waan a `kan'n, kan.

⁸ Nán yo srongble sran fi nyrun, afin n jin ɔ sin, n ´de wɔ.» Anannganman'n yɛ ɔ kan sɔ-ɔ.

⁹ Yɛ Anannganman tinngɛli i sa'n nun nan ɔ'a kan mín nuan'n, yɛ ɔ seli min kɛ: «M'an fa min ndɛ'n m'an wla ɔ́ nuan.

¹⁰ Nian, m'an fa wɔ m'an sie i nvle-nvle nin famiɛn diwlɛ'm bé su. A ´tu wie'm be bo: A ´bu wie mun yi be ase kɛ waka sa. A ´kun wie mun. A ´nunnun wie mun. A ´kplan wie kɛ sua sa. A ´ta wie kɛ waka sa.»

Be nin wɔ be ´kun sanngɛ be su kwla-man wɔ

¹¹ Anannganman'n usali min kɛ: «?Zeremi, nguɛ yɛ a wun i-ɔ?» Min waan: «N wun Amandie sama kun.»

¹² Yɛ Anannganman'n waan: «I yɛ a wunnin i lɛ-ɔ, afin ndɛ nga n wa kan kle wɔ lɛ'n, n ´jran su kpa n ´yo i nuan like'n.»

¹³ Yɛ Anannganman'n usali min ekun kɛ: «?Nguɛ yɛ a wun i-ɔ?» Min waan: «N wun blalɛ sɛ kun b'ɔ like ng'ɔ o nun'n tu kpuyɔ-kpuyɔ kpa. I nyin'n kaci mɛn'n i nglo lɔ lika'n nun.»

¹⁴ Yɛ Anannganman'n seli min kɛ: «Nyrɛnnɛn ng'ɔ ´tɔ amun mɛn'n nunfuɛ'm be kwlaa be su gbuun'n, ɔ ´fin nglo lɔ lika nun yɛ ɔ ´ba-a.

¹⁵ Nian, n wa flɛ famiɛn diwlɛ ng'ɔ o Izraɛl mɛn'n i nglo lɔ'n i nun nin akpasua kunngun'm be nun sran mun kɛ be bla. Be wa kpɛ be ngblaliɛ mun Zerizalɛm anuan'n nun Zerizalɛm klɔ'n i talɛ'm be wun sɛsɛsɛ ɔ nin Zida klɔ'm be talɛ'm be wun.

¹⁶ Sa tɛ kwlaa nga be yoli'n ti'n bé fɔ nga n kannin kɛ m ´bu be'n, m ´bu, yɛlɛ kɛ be kacili be sin sili min: be yrali ansans mannin amuɛn mun, be bɔbɔ be yoli amuɛn mun, kpɛkuun be bli bé nyin be kotoli be bo.

¹⁷ Nan i ti'n, tanndan wɔ wun, jaso ko kan ndɛ nga n ´fa wla ɔ́ nuan yɛ'n kle be. Nán srɛ kun wɔ bé wun, ɔ yo sɔ-ɔ, n ´yo man srolɛ nga a sro be'n ɔ ´yo dan tra su.

¹⁸ Ɔ fin ndɛ, n ´yo man a ´yo cinnjin kɛ klɔ bɔ b'a si i wun'n sa. A ´yo kekleke kɛ blalɛ mlomlo wie sa. A ´yo kɛ aaba talɛ sa mɛn'n nunfuɛ'm be kwlaa be lika: i Zida famiɛn mun o, be awlo lɔ sran dandan mun o, i Nyanmiɛn nuan ijɔfuɛ mun o, ɔ nin mɛn nga nunfuɛ'm be kwlaa .

¹⁹ Be nin wɔ be ´kun, sanngɛ be su kwla-man wɔ, afin n jin ɔ́ sin, n ´de wɔ.» Anannganman'n yɛ ɔ kan sɔ-ɔ.