Zakari 9 - NYANMIƐN NDƐ'N 1998

IZRAƐL NIN MƐN KUN NGA MUN Sa ng'ɔ ´tɔ nvle nga be mantan Izraɛl lɛ'n be su'n

¹ Ndɛ cinnjin yɛ'n, Anannganman'n kan man Adrak lɔ lika'n i nunfuɛ mun. I sɔ ndɛ liɛ'n, ɔ kan man Damas klɔ lɔfuɛ mun kusu, afin nán Izraɛl akpasua'm be ngunmin yɛ be ti Anannganman'n liɛ-ɔ. Klɔ sran'm be kwlaa be ti i liɛ.

² Ndɛ sɔ'n ti Amat b'ɔ o Damas wun lɔ'n i nunfuɛ'm be liɛ ekun, ɔ ti Tirfuɛ mun nin Sidɔnfuɛ mun, ɔ liɛ ngwlɛlɛfuɛ sɔ mun, ɔ ti be liɛ wie.

³ Tirfuɛ'm be sisili be klɔ'n wun, be tian sika'n nuan kɛ fa sa. Sika ɔkwlɛ'n kusu, ɔ bo kwle kɛ akpɔ su ndutre wie sa.

⁴ Sanngɛ e Min'n wa de like sɔ mun, ɔ ´bu klɔ'n i wun talɛ'n guɛ i jenvie'n nun, kpɛkuun ɔ ´to sin yi i klɔ'n nun, sin sɔ'n ´di klɔ'n.

⁵ Askalɔnfuɛ'm be ´wun i, kpɛkuun srɛ ´kun be. Gazafuɛ'm be kusu, srɛ'n dunman nun ti be wa usu dan. Ekrɔnfuɛ'm be kusu, be su si-man wie se kun, be ´sokpa. Gaza klɔ'n ɔ su nyan-man famiɛn kun, Askalɔn klɔ'n kusu, sran fi su tran-man su kun.

⁶ Aofuɛ nga be si-man be finwlɛ'n be wa tran Asdɔd klɔ'n su. «N ´nunnun like nga Filistifuɛ'm be fa di bé nuan'n.

⁷ Nnɛn ng'ɔ wu i sa su'n i nnɛn'n nin amuɛn nnɛn nga be di'n, n ´de i bé nuan nun. Be onga kan nga be ka'n, be ´yo min liɛ. Be ´yo min sran mun kɛ Zidafuɛ'm be sa. Ekrɔnfuɛ'm be ´yo min nvle'n nun sran mun kɛ Zɛbisfuɛ'm be sa.

⁸ Alɛ kunfuɛ nga be sin'n, be ti n ´sasa min mɛn'n. Sran fi sa su yo-mɛn i nunfuɛ'm be tɛtɛ kun, afin mín nyin o be su siɛn'n.»

Zerizalɛmfuɛ mun, amun famiɛn'n ba

⁹ Siɔnfuɛ mun, man amun wun blibli amun, amun `tu kpɛn! Zerizalɛmfuɛ mun, amun `bo sro. Amun `nian, amun famiɛn'n su ba amun wun. Ɔ ti sran kpa, ɔ kwla, ɔ ti wɛtɛfuɛ. Ɔ'a fu aflunmun bɔ ɔ'a kpɛ cro kun su. Aflunmun sɔ'n ɔ ti aflunmun bla kun wa .

¹⁰ Ɔ ´yi alɛ kakaklolo mun Efraim lɔ. Ɔ ´yi alɛ kunlɛ ta mun, ɔ ´kan fɔundi ndɛ kle mɛnmɛnfuɛ mun. Kɛ ɔ fɛ i jenvie ng'ɔ ti njin nzue klakla'n i nuan b'ɔ ´fa ju Mediterane jenvie'n nuan'n, yɛ kɛ ɔ fɛ i Efrat nzue ba'n nuan b'ɔ ´fa ju asiɛ'n i awieliɛ lɔ'n, i yɛ ɔ ´sie-ɔ .

Bisuafuɛ'm be nun yacilɛ

¹¹ Anannganman wan yoo: «Aenguɛ nga e nin amun e trali bɔ e guali i ti nnɛn mmoja ase'n, i dunman nun ti n ´yi amun nun sran nga be ti bisuafuɛ bɔ be gua be gbo bɔ nzue nun-man nun'n i nun n ´fite .

¹² Bisuafuɛ mun, amun nga an sunnzun kɛ amun ´nyan be ti'n, an `sa amun sin bla klɔ bɔ b'a sisi i wun'n nun. Afɛ nga an fɛli'n, n ´nian su n ´yo amun ye. Ye sɔ bɔ n ´yo amun'n, ɔ ´ju amun afɛ'n i sɔ kpɛ nnyɔn .

¹³ Min ta bɔ n to'n yɛlɛ Zida, m'an cuɛn nun m'an sie. I su ta mma'n yɛlɛ Efraim, m'an fa sie ta'n su. Siɔn, n wa su ɔ nunfuɛ'm be bo kɛ be nin Zavanfuɛ'm be `ko kun. I sran sɔ'm be wa yo min sa nun kɛ safunyrɛn wie sa nun tokofi sa.»

¹⁴ Anannganman'n ´fite i sran'm bé ti su nglo. I ta mma'n ɔ ´tu kɔ kɛ nyanmiɛn b'ɔ su kpa sin'n sa. Anannganman Nyanmiɛn'n ɔ ´bo awɛ, kpɛkuun ɔ ´ba mɛn'n i ngua lɔ lika'n nun lɔ aunngban dan'n i nun.

¹⁵ Anannganman b'ɔ sie mɛn wunmuan'n ɔ ´sasa i sran mun. Be ´kun be kpɔfuɛ mun, be ´wla kpafloko nun yɛbuɛ be ´nunkun be. Be kpɔfuɛ sɔ'm be mmoja'n ɔ ´sonji kɛ nzan sa. Ɔ ´yo kɛ b'a kun nnɛn sa, be mmoja'n ɔ ´yi kpongbo nga be fa kpɛntɛn-kpɛntɛn mmoja'n. Ɔ ´yo kɛ Nyanmiɛn i sɔwlɛ'n i cɔnjɔ'm be su mmoja'n sa.

¹⁶ Cɛn sɔ nun'n, Anannganman Nyanmiɛn ´de i sran mun kɛ nnɛn kankanfuɛ'n fa de i nnɛn mun'n sa. Be ´yo kɛ famiɛn kle'n i nun yɛbuɛ kpakpa bɔ be bo mianmian'n sa i lika'n nun.

¹⁷ I lika sɔ'n i kpa ng'ɔ wa yo'n, yɛ i klanman ng'ɔ wa yo'n, ɔ lɛ-man wunsu. Gbanflɛn'm be wa di ble'n be ´nyin, yɛ talua'm be wa nɔn vinyi nzue lɔflɛ'n be ´nyin wie kusu.