Zakari 7 - NYANMIƐN NDƐ'N 1998

Zerizalɛm nunnunlɛ'n i su nglɛmun cilɛ'n i su kosan

¹ Kɛ be sieli Dariis famiɛn'n i afuɛ nnan'n i anglo ngwlan'n nga be flɛ kɛ Kisle anglo'n i le nnan'n su'n, Anannganman kannin ndɛ kleli Zakari.

² Betɛlfuɛ'm be sunmannin Sarɛzɛr nin Regɛm-Melɛk nin i sran mun kɛ be ko kpata Anannganman.

³ Be waan be ´usa Nyanmiɛn nyrun jranfuɛ nin Nyanmiɛn nuan ijɔfuɛ nga be tran Anannganman b'ɔ sie mɛn wunmuan'n i sua'n nun'n be kɛ: «?Sunlɛ nga e sun i anglo nnun'n su'n, ɔ nin nglɛmun nga e ci bɔ e sɔ i yolɛ lele ɔ'a fa ju ndɛ yɛ'n, e ´yo sɔ tititi?»

⁴ Ɔ man Anannganman b'ɔ sie mɛn wunmuan'n i nuan toli min.

⁵ I waan n `se Nyanmiɛn nyrun jranfuɛ nin mɛn nga nunfuɛ'm be kwlaa kɛ: «?Nglɛmun nga an ci'n nin sunlɛ nga an sun afuɛ nuan kun nun anglo i nnun'n su nin anglo i nso'n su bɔ ɔ'a di afuɛ ableso yɛ'n, amun waan min yɛ an ci nglɛmun sɔ'n be man min-ɔn?

⁶ ?I nun bɔ an ´di ndrɔlɔ'n, wuun an ´nɔn i su nzan'n, min yɛ an di be man min-ɔn? ?Min yɛ an nɔn be man min-ɔn?»

⁷ ?I nun nga bɔ sran ba'n tɛ jin Zerizalɛm'n su, bɔ wuun klɔ nga be mɛntɛn-mɛntɛn i lɛ mun be o be olɛ bliin'n, bɔ sran'm be tɛ o ngua lɔ lika'n nun nin lika kpɛtɛkplɛɛ'n nun lɔ'n, nán ndɛ nga Anannganman fa wlɛli i nuan ijɔfuɛ'm bé nuan laa bɔ be kannin'n yɛ ɔ lɛ-ɔ?

⁸ Anannganman'n waan Zakari `se kɛ

⁹ Anannganman b'ɔ sie mɛn wunmuan'n seli amun laa kɛ yoo: «Amun ´bu ndɛ-ɔ, an `nian nanwlɛ'n be `di. An `klo be wiengu, an `yo be wiengu kpa.

¹⁰ Nán an kle aika mma nin bla nga be ti angboti'm be yalɛ. Nán an kle aofuɛ nin yalɛfuɛ'm be yalɛ. Nán amun bu amun wiengu wun akunndan tɛ.»

¹¹ Sanngɛ b'a sie-man be su, be yoli nyin kekle.

¹² Be buli bé su nun waka kpɔ! Mmla nin ndɛ nga Anannganman b'ɔ sie mɛn wunmuan'n i Wawɛ'n fa wlɛli i nuan ijɔfuɛ laa'm bé nuan kɛ be kan'n, be waan nán be yɛ be ko ti-ɔ. Ɔ man i kusu ɔ wa fali ya dan kpa.

¹³ I waan: «Kɛ bɔ n flɛli be bɔ be waan be ti-man'n ti, n kusu sɛ be flɛ min-ɔn n su ti-man.

¹⁴ N kannin be bo n guɛli i nvle nga be bɔbɔ be si-man nun laa'n be nun. Be mɛn'n tɔli bliin, sran fi kɔ-man lɔ, yɛ sran fi fin-man lɔ ba-man. Be bɔbɔ be yoli man be mɛn sɔ'n bɔ i nun yo-man fɛ ngowa'n, ɔ kali lɛ ngbɛn.»