Zakari 6 - NYANMIƐN NDƐ'N 1998

Kakaklolo nnan mun

¹ Kɛ n ´to mín nyin ekun n ´nian-an, kakaklolo nnan be fin oka nnyɔn be afiɛn b'a fite. Oka sɔ'm be ti aaba oka.

² Nnɛn kpanngɔ nga be minnda kakaklolo klikli'n be ti zoun-zoun, i nnyɔn su'n i nnɛn kpanngɔ'm be ti bleble,

³ i nsan su'n i liɛ'm be ti ufue-ufue, yɛ i nnan su'n i liɛ'm be ti nzuɛn-nzuɛn tata nun.

⁴ Yɛ n usali anz ng'ɔ nin min koko yalɛ'n kɛ: «?Kpli, nguɛ yɛlɛ nnɛn nga b'a minnda-minnda be sɔ mun?»

⁵ Kpɛkuun anz'n tɛli min su kɛ: «Aunngban bue nnan nga be fɛ i wa be fɛ i wa be ko jrannin mɛn wunmuan'n i Min'n nyrun'n be su kɔ siɛn'n .»

⁶ Kakaklolo nga i nnɛn kpanngɔ'm be ti bleble'n su to i ti nglo lɔ lika liɛ'n nun, nga kusu bɔ i nnɛn kpanngɔ liɛ'm be ti ufue-ufue'n ɔ su i su. Kakaklolo nga i nnɛn kpanngɔ'm be ti tata nun'n, ɔ su to i ti ngua lɔ lika liɛ'n nun.

⁷ Nga i nnɛn kpanngɔ'm be ti nzuɛn-nzuɛn'n be waan be ´ko wlan asiɛ wunmuan'n su. Yɛ anz'n seli be kɛ: «An `wɔ be ko wlan asiɛ'n su.» Yɛ be ko wlannin asiɛ'n su-ɔ.

⁸ Kpɛkuun ɔ flɛli min seli min kɛ: «Be nga be ɔli nglo lɔ lika liɛ nun'n, be ti man ya nga n fɛli i lɔfuɛ'm be wun'n, ɔ wa kan ase.»

Zozie i ti su sika kle'n

⁹ Anannganman'n seli min kɛ:

¹⁰ «Andɛ aliɛ ba liɛ nun'n, a wa kɔ Sofoni i wa Zozias i awlo lɔ. Kɔ lɔ nan ninnge nga be o be nga be trali be lomuɛn be sa nun nvle uflɛ nun lɔ'n bɔ be fa mannin Ɛldai, nin Tɔbiza, ɔ nin Zɛdaɛza kɛ be `fa blɛ min'n, sɔ nun. Sran sɔ mun'n, kɛ be ´fin Babilɔni lɔ be ´ba'n, lɛ yɛ be wluli-ɔ.

¹¹ Fa jɛtɛ ufue nin sika ɔkwlɛ fa yo kle nan fa wla Zozadak i wa Zozie b'ɔ ti Nyanmiɛn nyrun jranfuɛ'm be su kpɛn'n i ti.

¹² Nan se i kɛ Anannganman b'ɔ sie mɛn wunmuan'n waan: ‹Sran kun wo wa be flɛ i anyɛn. Ɔ ´fifi kan ɔ tran lɛ'n. I yɛ ɔ wa kplan mín sua nin-ɔn.

¹³ I yɛ ɔ ´kplan-an. Ɔ ´wla famiɛn ninnge mun, ɔ ´tran famiɛn bia'n su. Ɔ ´sie mɛn'n. Be ´fa min nyrun jranfuɛ kun be ´suɛn i. Be nnyɔn'n bé nuan ´sɛ be wun kpa .›

¹⁴ Sika kle'n ɔ ´ka min sua'n nun, ɔ ´yo Ɛldai, nin Tɔbiza, nin Zɛdaɛza, ɔ nin Ɛn b'ɔ ti Sofoni i wa'n be wla kpɛnlɛ like, nin i nzɔliɛ.»

¹⁵ Sran'm be ´fin mmua lɔ be ´ba Anannganman i sua'n i kplanlɛ. Kpɛkuun amun wa wun i wlɛ sakpa sakpa kɛ Anannganman b'ɔ sie mɛn wunmuan'n yɛ ɔ sunmannin min amun wun wa-a. Sɛ amún nyin yi Anannganman amun Nyanmiɛn'n sakpa'n, i sɔ sa liɛ nga lɛ mun be kwlaa be ´yo.