Zakari 5 - NYANMIƐN NDƐ'N 1998

Sannzan bɔ Nyanmiɛn wa bo'n i wun fluwa

¹ Kɛ n ´to mín nyin sa ekun n ´nian-an, fluwa kun yɛ b'a nnyɔn-nnyɔn yɛ aunngban'n ´fa sin nglo lɔ kɔ yɛ.

² Kpɛkuun anz'n usali min kɛ: «?Nguɛ yɛ a wun i-ɔ?» Min waan: «N wun fluwa kun b'ɔ ti nyɔnnyɔnwa. N wun kɛ aunngban'n su fa tu sin nglo. I tɛnndɛn nun'n ti mɛtri blu yɛ i tɛtrɛ nun'n ti mɛtri nnun.»

³ Kpɛkuun i waan: «Sannzan ng'ɔ wa tɔ mɛn wunmuan'n su'n i wun fluwa-a. Ɔ ti klɛwa kɛ be ´kan awiefuɛ'm be kwlakwla be bo mɛn'n nun. Be kwlaa nga be ta nda ngbɛn-ngbɛn'n, be ´fuan be .

⁴ Anannganman b'ɔ sie mɛn wunmuan'n wan yoo: ‹I sɔ sannzan liɛ'n, m bɔbɔ min yɛ n ´fa ba-a. Ɔ ti kɛ sin sa, ɔ ´wlu awiefuɛ nin be nga be bo min dunman be ta nda ngbɛn-ngbɛn'n bé sua'm be nun, kpɛkuun ɔ ´ka lɔ lele ɔ ´yra bé sua sɔ'm be ja mun o, be nun yɛbuɛ mun o, ɔ ´yra be kwlakwla sekeseke kpan.› »

Klunwi'n i nzɔliɛ

⁵ Anz ng'ɔ nin min koko yalɛ'n bali min wun lɛ kpɛkuun ɔ seli min kɛ: «Man ɔ́ ti'n su nian like ng'ɔ ´ba lɔ lɛ'n.»

⁶ Yɛ n usɛli i kɛ: «?Nguɛ yɛlɛ sɔ'n?» I waan: «Gbogbo-ɔ. Mɛn'n nun sa tɛ'n kwlaa nga be yoli'n wo nun.»

⁷ Sunmun yɛ be fa yoli i su tre nin-ɔn. Kpɛkuun n ´nian-an, gbogbo'n i tre'n ɔ'a mɛn i wun su, kpɛkuun bla kun yɛ ɔ ti nun yɛ.

⁸ Anz'n waan: «Klunwi'n i nzɔliɛ-ɔ.» Kpɛkuun yɛ ɔ su i bo yili i gbogbo'n nun, yɛ ɔ fɛli i tre'n katali su-ɔ.

⁹ Kɛ n ´to mín nyin ekun n ´nian-an, bla nnyɔn yɛ be ´tu be ´sin nglo yɛ. Aunngban'n fita be ndɛwa'n nun pɛpɛpɛ. Be ndɛwa'n ti kɛ anunman wɔngɔ ndɛwa sa. N ´nian-an b'a man gbogbo'n su be nin i su tu kɔ nglo.

¹⁰ Yɛ n usali anz nga e nin i e koko yalɛ'n kɛ: «?Be ´fa gbogbo'n be ´ko nin?»

¹¹ I waan: «Be ´ko kplan sua'n Mezopotami mɛn'n nun lɔ be mɛn i. Kɛ be wie i kplan'n, be ´siesie lika kun be ´fa taka nun.»