Zakari 4 - NYANMIƐN NDƐ'N 1998

Kannin siewlɛ b'ɔ ti sika ɔkwlɛ'n ɔ nin olivie nnyɔn'n

¹ N wo lɛ kpɛkuun ɔ yo kɛ lafilɛ yɛ n su lafi sa, kpɛkuun anz nga e nin i e koko yalɛ'n ɔ'a tinnge min.

² Ɔ usa min kɛ: «?Nguɛ yɛ a wun i-ɔ?» Yɛ n waan: «Kannin siewlɛ b'ɔ ti sika ɔkwlɛ yɛ n wun i-ɔ. Kannin sɛ kun wo i ti su nglo, kpɛkuun kannin nso jinjin i ti su nglo lɔ wie, i kannin nzue sinsinwlɛ'n ti nso .

³ Olivie nnyɔn o kannin'n i ti su nglo ekun. Kun wo i sɛ'n i fama su, yɛ kun wo i bɛ su .»

⁴ Yɛ n usali anz ng'ɔ nin min koko yalɛ'n kɛ: «?Kpli, nguɛ yɛlɛ ninnge nga mun?»

⁵ Anz'n kusu usali min kɛ yoo: «?A si-man like sɔ mun?» Min waan: «Ɛɛn, kpli, n si-man be.»

⁶ Nan ɔ'a yiyi nun ɔ'a kle min. Yɛ ɔ seli min kɛ yoo: «Ndɛ nga Anannganman'n kan kle Zorobabɛl'n yɛ. I waan: ‹Nán kɛ ɔ wue kekle'n ti-ɔ, yɛ nan kɛ ɔ wunmiɛn dan'n ti, yɛ a kwla di junman nin-ɔn, sanngɛ min Wawɛ'n ti yɛ man a kwla di-ɔ.

⁷ ?Oka dan, a ti nzu Zorobabɛl nyrun? Zorobabɛl ´trɛtrɛ wɔ nun kpɛtɛɛ. Ɔ nun yɛ be yi yɛbuɛ nga be fa sie i Nyanmiɛn i sua'n i ti nun lɔ nin-ɔn. Be ´yi wuun be ´kpan: Ɔ ti klanman o! Ɔ ti klanman o!› »

⁸ Anannganman'n kannin ndɛ kleli min ekun, i waan:

⁹ «Zorobabɛl b'ɔ wlali sua nga bo ase'n, i kunngba'n yɛ ɔ ´wie i kplan-an.» Kɛ ɔ ko yo sɔ'n, amun wa wun i wlɛ sakpa-sakpa kɛ Anannganman b'ɔ sie mɛn'n wunmuan'n yɛ ɔ sunmannin min-ɔn.

¹⁰ ?Sua yɛ'n, kɛ be ´bo i kplanlɛ bo'n, sran wie'm b'a yi-man bé nyin saa, yɛ b'a sri-mɛn i kplanfuɛ mun? Sanngɛ cɛn nga be ´wun kɛ Zorobabɛl su kplan sua sɔ'n ´kɔ'n, be klun ´jɔ. Nan yoo, kannin nso nga a wun i lɛ'n, Anannganman'n i nyinma mun-ɔn. Ɔ fa wlan asiɛ wunmuan'n su .

¹¹ Yɛ n usɛli i kɛ: «?Yɛ olivie nnyɔn nga kun wo kannin siewlɛ'n i fama su yɛ kun wo i bɛ su'n, nguɛ mun-ɔn?»

¹² N usɛli i ekun kɛ: «?Yɛ olivie sama nnyɔn nga be o sika ɔkwlɛ tiyo nga sika ɔkwlɛ'n sin nun'n nin?»

¹³ Ɔ tɛli min su kɛ: «?A si-man be?» Min waan: «Ɛɛn kpli, n si-man be.»

¹⁴ Yɛ ɔ seli min kɛ: «Sran nnyɔn nga be guali be ti su ngo bɔ be su asiɛ wunmuan sufuɛ'm be Min'n, be-ɔ .»