Zakari 3 - NYANMIƐN NDƐ'N 1998

Nyanmiɛn nyrun jranfuɛ'm bé su kpɛn Zozie

¹ Anannganman'n fali Nyanmiɛn nyrun jranfuɛ'm bé su kpɛn Zozie kleli min. Ɔ nin Anannganman i anz'm be jinjin lɛ. Satan kusu jin i sa fama su, ɔ kunndɛ kɛ ɔ ´sɛnmɛn i.

² Yɛ Anannganman i anz seli Satan kɛ: «Satan, man Anannganman'n kle wɔ nun, afin i yɛ ɔ fali Zerizalɛm-ɔ. ?Kɛ Zozie o yɛ'n, ɔ ti-man kɛ yendre bɔ b'a tu i sin nun fo'n sa? »

³ Kɛ ɔ ´yo sɔ'n, wuun Zozie i wun tralɛ'n ti fiɛn sa, yɛ ɔ fa jin anz'n i nyrun lɛ-ɔ.

⁴ Yɛ anz'n seli sran nga be nin i be o lɛ'n be kɛ: «An `yi i wun tralɛ fiɛn'n.» Kɛ ɔ yoli sɔ'n, kpɛkuun ɔ seli Zozie kɛ yoo: «Nian, m'an nunnun ɔ sa tɛ'n, n su wa wla wɔ cɛn dilɛ tralɛ.»

⁵ Ɔ seli be ekun kɛ: «An `fa tannin tanmue yɛiin kun be `blɛ i ti'n bo.» Yɛ be ´fa tannin tanmue'n be ´cici i ti'n bo yɛ be ´wlɛ i wun tralɛ saun kun Anannganman i anz'n nyrun lɛ-ɔ.

⁶ Kpɛkuun anz'n kan kleli Zozie kɛ

⁷ Anannganman b'ɔ sie mɛn wunmuan'n wan yoo: «Min atin nga n kle wɔ'n, sɛ a fa su'n, yɛ sɛ a fa mín nuan su ndɛ'n, a ´yo mín sua nin min awlo'n bé su kpɛn. M ´man wɔ su, ɔ man a nin min sufuɛ nga be o wa yɛ mun be ´sɛ.»

Anannganman ´fɛ i sufuɛ'n ´ba

⁸ «Zozie, wɔ bɔ a ti min nyrun jranfuɛ'm bé su kpɛn'n, a nin ɔ wiengu nga be uka wɔ'n, sa ng'ɔ su wa ba'n, amun yɛ amun ti i nzɔliɛ like nin-ɔn, n su wa fa min sufuɛ nga be flɛ i anyɛn'n m ´ba .

⁹ M'an fa yɛbuɛ kun m'an sie Zozie nyrun lɛ, yɛbuɛ kunngba cenje sɔ'n, nyinma nso o su. Like nga bɔ be ko klɛ i su'n, m bɔbɔ yɛ n ´klɛ-ɔ. Kpɛkuun mɛn nga nun sa tɛ'n, n ´salo i le kunngba .

¹⁰ Kɛ cɛn sɔ'n ko ju'n, amun `flɛflɛ amun wiengu yɛ amun ´tran amun vinyi fie nin amun figie fie'm be nun fɔuun .» Anannganman b'ɔ sie mɛn wunmuan'n yɛ ɔ kan sɔ-ɔ.