Zakari 2 - NYANMIƐN NDƐ'N 1998

Nnɛn wɛ mun nin blalɛ bofuɛ mun

¹ N ´to mín nyin ekun-ɔn m'an wun aolia nun like uflɛ: n ´nian-an, nnɛn wɛ nnan yɛ.

² Yɛ n usali anz ng'ɔ nin min koko yalɛ'n kɛ: «?Nguɛ yɛlɛ nnɛn wɛ nnan nga mun?» Ɔ tɛli min su kɛ: «Nvle sroesroe nga be kejeli Zidafuɛ nin Zerizalɛmfuɛ mun, nin Izraɛlfuɛ'm be nun bɔ man be bo sanndili mun-ɔn.»

³ Kpɛkuun Anannganman'n fali blalɛ bofuɛ nnan kleli min.

⁴ N usɛli i kɛ: «?Be wa yo nguɛ?» Ɔ tɛli min su kɛ: «Nvle sroesroe nga be kejeli Zidafuɛ'm be nun b'ɔ man be fite be bie-man'n, blalɛ bofuɛ sɔ'm be bali be wlanwlanlɛ. Be wɛ bɔ be fa sanngan Zidafuɛ'm be nun'n be bɛli i bubulɛ.»

Lika sunnzunlɛ nyanman

⁵ Kɛ n ´to mín nyin-ɔn m'an wun like kun ekun. N ´nian-an, sran kun yɛ ɔ o yɛ, i sa nun lika sunnzunlɛ nyanman.

⁶ Yɛ n usɛli i kɛ: «?A ´ko nin?» I waan: «N ´ko sunnzun Zerizalɛm, n ´nian kɛ i tɛtrɛ nun nin i tɛnndɛn nun be fa ti'n.»

⁷ Kpɛkuun anz ng'ɔ nin min koko yalɛ'n wunngeli anz kun wun lɔ, kɛ ɔ ´yo sɔ'n wuun i kusu su ba.

⁸ Yɛ klikli'n seli kasiɛn'n kɛ: «Wanndi ko se gbanflɛn nga nyanman wo i sa nun'n kɛ: ‹Nán be sisi Zerizalɛm wun, afin sran nin nnɛn nga be wa tran lɔ'n, be sɔnnin dan.

⁹ M bɔbɔ n ´fa sin m bo sin yia amun n ´si amun wun kɛ awa sa. N kunngba'n, n ´yi min anyrunnyan'n i nglo lɔ.› » Anannganman'n yɛ ɔ kan sɔ-ɔ.

An `wanndi bla

¹⁰ Anannganman wan yoo: «Amun bɔ n fuannin amun n sieli asiɛ'n i cɔnjɔ nnan'm be su'n, an `wanndi mɛn i nglo lɔ lika'n nun be bla.

¹¹ Siɔnfuɛ mun, an `wanndi be bla, amun bɔ an tran Babilɔni klɔ'n su'n, an `wanndi ndɛndɛ be bla.»

¹² Anannganman b'ɔ sie mɛn wunmuan'n yɛ ɔ sunmannin min be nga be fɛnnin amún bo ninnge'm bé wun wa-a. Ɔ fali ndɛ cinnjin kun wlali mín nuan kɛ n `kan kle be. I waan n `se be kɛ: «Sran ng'ɔ kan amun'n, wuun ɔ'a fɛ i sa ɔ'a wɔ mín nyin su.

¹³ E nin be e wa yia nun. Be nga be fɛnnin sran'm bé bo ninnge'n, be wa fɛn be liɛ'n wie kusu.» Kɛ ɔ ko yo sɔ'n, i liɛ amun wa wun i wlɛ sakpa sakpa kɛ Anannganman b'ɔ sie mɛn wunmuan'n yɛ ɔ sunmannin min-ɔn.

¹⁴ Anannganman b'ɔ sie mɛn wunmuan'n wan yoo: «Siɔnfuɛ mun, amun `bo sro, man amun wun blibli amun, afin e nin amun yɛ e wa tran-an .

¹⁵ I sɔ blɛ'n nun'n, sran sunman lika be ´fa be wun be ´mantan min, be ´kaci min sran. E nin amun e ´tran likawlɛ.» Kɛ ɔ ko yo sɔ'n, i liɛ'n amun wa wun i wlɛ sakpa sakpa kɛ Anannganman b'ɔ sie mɛn wunmuan'n yɛ ɔ sunmannin min amun sin-ɔn.

¹⁶ Anannganman'n ´fa Zida yo i liɛ mlɔnmlɔn i lika'n nun. Ɔ wa fa Zerizalɛm kɛ laa'n sa.

¹⁷ Nán man sran ba kun sa uke i nuan Anannganman'n i nyrun, afin ɔ su wa fin i bɔbɔ i lika'n nun lɔ ´fite .