Zakari 14 - NYANMIƐN NDƐ'N 1998

Alɛ kasiɛn'n nin Anannganman i balɛ'n

¹ Zerizalɛmfuɛ mun, Anannganman i ya cɛn'n ɔ'a mantan koko. Sɛ cɛn sɔ'n ɔ ju'n, be ´cɛ amún wun ninnge kpakpa'm be nun amun nyrun lɛ be ´fa.

² N ´yiayia nvle-nvle'm be nunfuɛ mun be nin Zerizalɛmfuɛ mun be ´kun. Be ´fa klɔ'n, be ´fa sua'm be nun ninnge kpakpa mun, be nin amún yi mun be ´la kekle nun. Be ´tra klɔ'n sufuɛ'm be bue ´kɔ, sanngɛ be nga'm be ´ka klɔ'n su lɛ.

³ Kpɛkuun Anannganman'n nin nvle sɔ mun be ´ko kun. Kɛ alɛ tɔ titi-ɔ ɔ fa yo'n, i su yɛ ɔ ´nian yo-ɔ.

⁴ I sɔ blɛ nun'n, ɔ ´jran Olivie Oka b'ɔ o Zerizalɛm wun lɛ wia afiliɛ lika liɛ'n nun lɔ'n su. Kpɛkuun Olivie Oka'n ´kpaci i afiɛn. Be wun kongo kun ɔ ´fɛ i wia afiliɛ lɔ lika'n nun ɔ ´to i ti wia atɔliɛ lɔ lika'n nun. Oka'n i bue kun ´kɔ nglo lɔ lika'n nun, i bue kun ´kɔ ngua lɔ lika'n nun .

⁵ Kpɛkuun amun ´wanndi be ´sin oka bue nnyɔn sɔ'm be afiɛn kongo'n nun. Kongo sɔ'n fɛ i lele kpɛn Atzɛl. Amun ´wanndi kɛ Zida famiɛn Ozias blɛ su asiɛ b'ɔ kejeli bɔ amun nannan'm be fa wanndili'n sa. Kpɛkuun Anannganman min Nyanmiɛn'n ɔ ´ba, ɔ nin i anz'm be kwlaa yɛ be ´ba-a .

⁶ I sɔ blɛ nun'n, lika'n su kpaja-man, lika'n ´yo munnduun kɛ bɔlɛ sa, i kusu nán bɔlɛ-ɔ.

⁷ I sɔ blɛ liɛ'n, Anannganman kunngba cɛ, yɛ ɔ si i-ɔ. Ɔ ´yo cɛn kun b'ɔ nin cɛn kun mun ti-man kun. Blɛ sɔ'n nun'n, kɛ aliɛ'n ko cɛn'n, wuun ɔ'a cɛn. Ɔ lɛ-man kɛ lika ɔ'a san. Nnɔsua nun'n, lika'n ɔ ´kpaja bɔ yɛiin.

⁸ Blɛ sɔ nun'n, nzue nyinma kun ´tɛ Zerizalɛm, ɔ ´sonji. I bue ´kɔ jenvie ng'ɔ o wia afiliɛ lɔ lika'n nun, i bue kusu ´sonji kɔ jenvie kun ng'ɔ o wia atɔliɛ lɔ'n nun. Wawa nun o, munngun nun o, kɛ ɔ'a nyan sonjilɛ'n, yɛ ɔ'a nyɛn i-ɔ.

⁹ Anannganman'n yɛ ɔ ´sie mɛn wunmuan nin-ɔn. I kunngba yɛ ɔ ´yo Nyanmiɛn bɔ sran'm be kwlaa be su i-ɔ. I kunngba yɛ sran'm be kwlaa be ´bo i dunman-an.

¹⁰ Lika ng'ɔ mantan Zerizalɛm lɛ'n, kɛ ɔ fɛ i Gɛba b'ɔ o mɛn'n i nglo lɔ lika'n nun b'ɔ ´fa ju Rimɔn ngua wa lika nun'n, ɔ ´yo kpɛtɛkplɛɛ. Kpɛkuun Zerizalɛm ´tran nglo. Ɔ ´kɛ i osu nun lɛ. Ɔ ´fɛ i Bɛnzamɛn anuan'n nun lɛ ɔ ´fa ju cɔnjɔ su anuan'n nun lɔ kan anuan klikli'n wo lɛ'n. Kpɛkuun ɔ ´fɛ i Ananeɛl i sasawlɛ nglo sua'n wun lɛ ɔ ´fa ju famiɛn'n i nzan yiwlɛ'n nun lɔ.

¹¹ Be ´tran Zerizalɛm lɛ siɛn nin-ɔn be klun su ti-man be kun, be su kɛn-mɛn i nunnunlɛ ndɛ kun .

¹² Nvle nga be sonja mun bɔ be nin Zerizalɛmfuɛ'm be ´ba kunlɛ'n, sa nga bɔ Anannganman ´fa wla be nun'n yɛ. Bé wunnɛn'n ´kplɔ sanngɛ wuun bé nyin tɛ o su. Be nyinma'n ´kplɔ bé ti nun, be taaman'n ´kplɔ bé nuan nun.

¹³ I sɔ blɛ'n nun'n, Anannganman'n ´fa utre dan kpa yi be afiɛn. Be ´sɔsɔ be wiengu sa, be ´bo be wiengu acɔliɛ.

¹⁴ Zidafuɛ'm be ´kun Zerizalɛm ti alɛ. Be ´de nvle nga be mantan be lɛ'n bé bo ninnge mun bé sa nun. Jɛtɛ ufue nin sika ɔkwlɛ'n, ɔ nin tralɛ'n, be wa flafla be kaka kpa.

¹⁵ Like nga Anannganman yoli be bɔ be nin Izraɛl be bali kunlɛ'n, ɔ ´fa yo be nnɛn mun wie. Be nnɛn kpanngɔ mun nin be aflunmun wafa-wafa mun, ɔ nin be nyɔnngɔnmɛn mun, like kunngba'n ɔ fa ´yo be wie.

¹⁶ I sɔ blɛ nun'n nvle-nvle'm be nunfuɛ nga be nin Zerizalɛmfuɛ be bali alɛ kunlɛ'n, bɔ alɛ'n ɔ'a di-man be'n, be ´ba Zerizalɛm afuɛ'n kwlakwla be wa koto Anannganman b'ɔ sie mɛn wunmuan'n i bo. Be ´di kpata bo tranlɛ cɛn'n .

¹⁷ Asiɛ'n su nvle nga be nunfuɛ'm b'a ɔ-man Zerizalɛm b'a ko koto-man Anannganman b'ɔ sie mɛn wunmuan'n i bo'n, nzue'n su tɔ-man be mɛn liɛ'n nun.

¹⁸ Sɛ Eziptfuɛ'm be waan be kɔ-man Zerizalɛm wie'n, nzue'n su tɔ-man be mɛn'n nun. Sa nga Anannganman'n ´fa yi i nvle nga be nunfuɛ'm b'a ɔ-man b'a ko di-man kpata bo tranlɛ cɛn'n yɛ ɔ o lɛ-ɔ.

¹⁹ Ezipt nin nvle nga be nunfuɛ'm b'a ɔ-man b'a ko di-man cɛn sɔ'n, sa ng'ɔ ´tɔ be su'n yɛ ɔ o lɛ-ɔ.

²⁰ I sɔ blɛ nun'n, be ´klɛ nnɛn kpanngɔ'm bé ja glein'm be su kɛ: «Nga ti Anannganman liɛ klonglo.» Blalɛ sɛ nga be o Anannganman i sua'n nun'n, be ´yo Nyanmiɛn liɛ kɛ klowa nga be o i sɔwlɛ'n su'n sa.

²¹ Zerizalɛm klɔ'n su blalɛ sɛ mun nin Zida nvle'n nun blalɛ sɛ'm be kwlakwla be ´yo Anannganman b'ɔ sie mɛn wunmuan'n i liɛ klonglo. Be kwlaa nga be ´ba tɛ yilɛ'n, be ´tɔn tɛ nnɛn'n sɛ sɔ'm be nun. I sɔ blɛ nun'n, aata difuɛ fi su tran-man Anannganman b'ɔ sie mɛn wunmuan'n i sua'n nun kun.