Zakari 13 - NYANMIƐN NDƐ'N 1998

¹ «I sɔ blɛ nun'n, nzue nyinma kun wa nyrɛn viaa ɔ salo David i osufuɛ mun nin Zerizalɛmfuɛ'm bé sa tɛ nga be yoli'n, ɔ nin bé wun fiɛn mun.»

Amuɛn'm be dunman'n ´wie mɛn'n nun

² «I sɔ blɛ nun'n, n ´yo man amuɛn'm be dunman'n ´nunnun mɛn'n nun, ɔ man be su bo-man be dunman be di-man jɔlɛ kun. Be nga be tɔn bé wun suɛn kɛ be ti min nuan ijɔfuɛ'n, n ´nunnun be. Kpɛkuun amuɛn'm be akunndan bulɛ'n, n ´yi i sran'm bé ti nun.» Anannganman b'ɔ sie mɛn wunmuan'n yɛ ɔ kan sɔ-ɔ.

³ «Sran ng'ɔ di wlɛwlɛ kɛ ɔ ´ijɔ min nuan ekun'n, i si nin i nin nga be wuli i'n be ´se i kɛ yoo: ‹Kɛ bɔ a bua ato guɛ i Anannganman wun'n, wulɛ yɛ a ´wu-ɔ.› Ɔ man sɛ i si nin nin be ´nian nan ɔ su kɛn i ndɛ sɔ mun'n, be ´wɔ i cua be ´kun i.

⁴ I sɔ blɛ nun'n, be nga be tɔn be wun suɛn kɛ be ti min nuan ijɔfuɛ sɔ'm be aolia nun ninnge nga be wun i'n, i kanlɛ ´yo be nyannzuɛn. Ɔ su kpɛn-man be klun kɛ be `wla nnɛn ndrɛ tralɛ nan be `lakalaka sran mun kun.

⁵ Be liɛ nga be ´kɛn i siɛn'n, yɛlɛ kɛ: ‹N ti-man Nyanmiɛn nuan ijɔfuɛ. N ti min fie difuɛ min kaan nun lele yɛ ɔ'a fa ju yɛ.›

⁶ Sɛ be usɛ i kɛ: ‹?Yɛ nguɛ kannin kannvuɛn yɛlɛ nga be o ɔ wue'n nun lɛ'n?› Ɔ ´tɛ su kɛ: ‹Min janvuɛ'm be awlo lɔ yɛ be yoli min like sɔ nin-ɔn.› »

Anannganman ti i nvlefuɛ'm be Nyanmiɛn

⁷ Anannganman b'ɔ sie mɛn wunmuan, ɔ kan ndɛ kle tokofi'n kɛ sran sa. I waan: «Tokofi, jaso, a nin min nnɛn kankanfuɛ'n be `yia nun, min nnɛn kankanfuɛ bɔ n fɛli i n yoli min mantanfuɛ'n, a nin i be `yia nun. Kun nnɛn kankanfuɛ'n yɛ bua'm be ´bo sanndi nan e nin nnɛn kanngan'm e ´yia nun .»

⁸ Anannganman seli ekun kɛ yoo: «Be bu mɛn'n nun sran'm be nun nsan, bue nnyɔn be ´wu, bue kunngba yɛ ɔ ´ka lɛ-ɔ .

⁹ Be sɔfuɛ mun'n n ´yi be nun fiɛn'n, n ´yo be kɛ sika ɔkwlɛ bɔ be klo i be yi i nun fiɛn'n sa. Kpɛkuun sɛ be flɛ min'n, n ´tɛ be su, n ´se kɛ: ‹Min sran yɛlɛ amun.› Be kusu be ´se kɛ: ‹Anannganman'n ti e Nyanmiɛn.› »