Zakari 10 - NYANMIƐN NDƐ'N 1998

Nyanmiɛn yɛ ɔ tɔ nzue nin-ɔn

¹ An `srɛ Anannganman man nzue'n `tɔ munngun nun. Afin nzue dandan nga be tɔ'n, i yɛ ɔ tɔ be-ɔ. Ɔ ´tɔ nzue dan kpa ´man amun nan amun kwlaa amun fie'm be su ninnge be `wla nnya klanman kpa.

² Ndɛ nga amuɛn'm be kan'n ti ato ndɛ. Gblɛ yɛlɛ wunnzue nga kɔmiɛnfuɛ'm be yi'n. Finfin ndɛ yɛ laliɛ cɛnfuɛ'm be kan-an, be lakalaka amun ngbɛn. I sɔ'n ti yɛ min sran'm b'a yo aunnvuɛfuɛ yɛ be wlan-wlan daan kɛ bua bɔ be lɛ-man kankanfuɛ bɔ b'a bo je'n sa nin-ɔn.

Anannganman ɔ ´yiayia Izraɛlfuɛ'm be nuan yɛ ɔ ´de be

³ «Aofuɛ nga be waan be su sie min sran mun'n, e nin be e wa yia nun. Sakpa, m bɔbɔ min Anannganman bɔ n sie mɛn wunmuan'n, min waan. Zidafuɛ'm bɔ be ti kɛ min sa nun nnɛn sa, n wa nian be lika, n ´fa be n ´kɔ alɛ kunlɛ kɛ nnɛn kpanngɔ nga be lɛ nyrun'n sa .

⁴ Kpɛnngbɛn wafa'n kwlaa be ´fin min nvle'n nun. Be ´yo cinnjin kɛ yɛbuɛ b'ɔ tra sua'n i cɔnjɔ'm be ase'n sa, Be ´yo kɛ waka nga be kplan be bɔ be cici tannin sua'n bé wun'n sa.

⁵ Be wa yo safunyrɛn, be ´tiatia be kpɔfuɛ'm be su kɛ be tiatia klɔ nun akpɔ'n nun aunnyan'n su'n sa. Be ´kun alɛ'n kɛ ng'ɔ o lɛ'n sa, afin m bɔbɔ min Anannganman'n n jin bé sin.

⁶ N ´yo man Zidafuɛ'm be ´yo yakpa. N ´de Izraɛlfuɛ mun. N ´fa be m ´ba be osu laa'n nun, n ´klo be, n ´yo be kɛ n nian yi-man be ase le sa, afin n ti Anannganman be Nyanmiɛn. Be flɛ min-ɔn, n ´sro.

⁷ Efraimfuɛ'm be ´yo kɛ safunyrɛn mun sa, be klun'n ´jɔ kɛ sran bɔ b'a nɔn nzan'n sa. Kɛ be mma'm be wun i sɔ'n, ɔ ´yo be fɛ, min Anannganman n dunman nun ti be klun ´jɔ.

⁸ M ´bo feliman n ´fa flɛflɛ be, afin m'an fua kɛ n ´de be, be wa trɛ kɛ be fa trɛli laa'n sa.

⁹ N yoli man be bo sanndili nvle'm be nun, sanngɛ kɛ be o mmua lɔ'n, bé wla wa kpɛn min su. Be nin be mma'm be ´ka nguan nun, kpɛkuun be ´sa bé sin be ´ba.

¹⁰ N ´fa be Ezipt mɛn'n nun m ´ba, n ´fa be Asiri lɔ m ´ba, n ´fa be m ´ba Galaad nin Liban mɛn'n nun. Sanngɛ lika sɔ'n su ju-man be.

¹¹ Be ´kpɛ jenvie'n b'ɔ ti awlaboɛ like'n. Jenvie'n i bolɛ ng'ɔ bo'n, n ´jrɛn i. Nil nzue ba'n ´wie nun sekeseke, Asiri bɔ i nunfuɛ'm be yo bé wun dandan'n, ɔ ´tɔ. Eziptfuɛ'm be kusu be su kwla-man kun.

¹² N ´yo man min sran'm be ´yo yasua. Be ´nian min dunman'n su yɛ be ´nanti-ɔ. M bɔbɔ min Anannganman'n, min yɛ n kan sɔ-ɔ.»